لەگەڵ هاتنی مانگی رەمەزان رێژەی سواڵكردن زیادی كردووە

لەگەڵ هاتنی مانگی رەمەزان رێژەی سواڵكردن زیادی كردووە

ئەگەرچی رۆژانە بەردەوم لەكوچەو كۆڵان‌و ناو بازاڕ بەبەردەوامی سواڵكەر ئەبینرێ‌، بەڵام لەگەڵ هاتنی مانگی رەمەزان، سواڵكەرەكان ئەم مانگە بەدەرفەت ئەزانن، بۆ راكێشانی هەست‌وسۆزی خەڵكی‌و دەست دەكەن بەدیاردەی سواڵكردن، لەنێو بازار و كوچەو كۆڵانەكان، بەشێكی سواڵكەرەكانیش هەركە مانگی رەمەزان دێت لە قەراغی شەقامێك بە هەندێك دارو نایلۆن خانوێك دروست ئەكات بۆ چەواشەكردنی خەڵكی و وا خۆیان نیان ئەدەن كە بێ‌ ماڵ‌و جێگان، دوای ئەوەی هەندێك پارە كۆ ئەكەنەوە خانوەكە تێك ئەدەن و وون ئەبن بەمەش هەم سیمای شاریان ناشرین كردووەو هەمیش بونەتەتە ماییەی نیگەرانی و بێزاری خەڵكی، وەك هاووڵاتیان باسی لێوە دەكەن، رۆژی واهەیە نزیكەی دە سواڵكەر لەدەرگای دوكانەكەیان دێنە ژورەو داوای یارمەتی دەكەن، هاووڵاتیان لە رێگای زاری كرمانجیەوە داو لەلایەنی پەیوەندی دار دەكەن رێگری لە زیاتر بوونی ئەم دیاریدەیە دەكەن و داواكارن رێگا لە سواڵكردن بگرن و سواڵكەران دەستگیربكەن و لێكۆڵینەوەیان لەگەڵ بكەن.
راپۆرت-محەمەدباڵەك-سۆران:
محەمەد سەعید دووكان دارێكە لەناو بازاری سۆران بۆزاری كرمانجی گووتی" لەگەڵ هاتنی مانگی رەمەزان كۆمەڵێك سواڵكەر بەدەر دەكەون كە بەشی زۆریان خەڵكی سوریان و ئاوارەی شاری سۆران بوونە، رۆژانەو شەوانە لە دوكانەكان دەگەرێن و سواڵ دەكەن، جاری وا هەیە لە سەرووی 10 سواڵكەر لە رۆژێكدا خۆی دەكێشێت بە دوكانەكەت داوای پارە دەكەن، هەریكەی بە جۆرێك دەست دەكات بەنوزانەوەو پارانەوە، محەمەد لە درێژەی قسەكانی دەڵێت" بەشی هەرەزۆریان خاوەن بیرۆكەێكی سەیرن لە سواڵكردن ئەویش ئەوەیە لەوكاتە خۆیان ئەكەن بە دوكانەكەت دا كاتێ‌ قەرباڵغە بۆ ئەوەی ناچار بیت پارەییان پێ‌ بدەی، بۆیە داواكارین لە برایانی پۆلیسی ناو شار ڕێگا لەم جۆرە سواڵكردنە بگرن".
هۆسەنگ حەسەن دووكاندارێكی ترەو لە ناوبازای سۆران پێداویستی منداڵان دەفرۆشێت بۆ زاری كرمانجی دەڵێت" بەهۆی زۆری سواڵكەرەكان مرۆڤـ سەری لێشێواوە نازانێ‌ كێ‌ شایەنی ئەوەیە خێری پێبكەیت، چونكە ئەوەندە سواڵكەری نا شایەن هەن ، سواڵكەری واهەیە لەیەك خێزان سێ‌ كەسیان بەیەكەوە دێنە ناو بازاڕو هەموو دووكانەكان بەسەر ئەكەنەوە، بەڵگەشم ئەوەیە رۆژێكیان سی سواڵكەر هاتنە دووكانەكەم، لەكاتی نوێژی ئێوارەهەرسَكیانم بەیەكەوە لە مزگەوتێك بینین هەریەكەو لە شوێنێك دانیشتبوو، بۆیە كەوتمە چاودێری كردنیان و لە شوێنێك یەكیان گرتەوە و سواری ئوتۆمبێلێك بوون‌و رۆیشتن، جا داواكارم لە هاووڵاتیان هەڵنەخەڵتێن بەگریان و هاوەرەكانیان چونكە ئەوانە هەژار نین و تەنها ئەیانەوێ‌ لەسەرگیرفانی خەڵكی بژین".
كارزان ئەنوەر هاووڵاتیێكی تری سۆرانەوە بۆزاری كرمانجی گووتی" فێڵبازی بەشێك لەو سواڵكەران لەوە دیارە، كاتێك مانگی رەمەزان دێت، خانوێكی بەنایلۆن لە تەنیشت شەقام یان لەناو هەیكەلی خانووەكان دروست ئەكەن بۆ ئەوەی خەڵكی خێریان پێبكات، بەمەش هەقی كەسێكی موستەهەق ئەخۆن كە زەكاتی پێ ئەشێت، ئەمانە هەژار نین، بەڵكو بۆ گەوجاندن و فێڵكردن لەخەڵكی دێنە ئەو شوێنانە تا خێریان پێ‌ بكرێت، پێویستە لەسەر شارەوانی سۆران ئەم خانووانە برۆخێنێ‌ و ئەوانەشی لەناویانن دەستگیریان بكەن‌و لێكۆڵینەوەیان لەگەڵ بكەن، چونكە ئەمە بەروونی دیارە بۆچی تا مانگی رەمەزان نێت ئەم دیاردە نابینرێ‌".
فریاد جەلال هاووڵاتیكی دانیشتوی گەرەكی زانیاری یە و بۆ زاری كرمانجی گووتی" بەشی هەرەزۆری ئەو كەسانەی سواڵ دەكەن، درۆ دەكەن‌و تەنها خەڵكی هەڵئەخەڵەتێنن، بەشێكی زۆریان بارو گوزەرانیان زۆرباشە، ئەو زیاتر دەڵێت" رۆژێكیان سواڵكەرێك بەجلێكی دڕاوو شۆرەوە زۆر لەبەردەمم نوزایەوەو پاڕایەوە منیش بڕێك پارەم پێ‌ بەخشی، بەڵام سەرو بەری بانگە مەغریب بوو ئەچومەوە بۆماڵەوە ئۆتۆمبێلەكەم لە گەڕەكی ناو گەڵاڵیان پاركینگ كردبوو، بینیم جلەكانی لەسەر خۆی هەڵگرت و جل‌و بەرگێكی رێك‌و پێكی لە ژێرەوە لەبەربوو بەمشتێكی پارە گەرایەوە ماڵەوە، منیش نەمتوانی كۆنترۆڵی خۆم بكەم و خێرا لێی چومە پێشەوە بەڵام ئەو ترساو بە ڕاكردن رای كرد و هەڵات، بۆیە داوا لە ئاسایشی ناو شار ئەكەم ئەو سوریە سواڵكەرانە دەستگیر بكەن و لە ناو شاری سۆران دووریان بخەنەوە".
جگە لەمانە ڕێژەیەكی زۆری مناڵیش ئەبینرێ‌ سواڵیان پێ‌ ئەكرێت لە كاتی شەواندا ئەویش بەهۆی ئەوەی شەوانی رەمەزان هەندێ‌ دوكان و خواردنگەو ساردەمەنی ئەكرێنەوە.
سیروان ئیبراهیم لەشەقامی حەریق گەنمی شامی و پەتاتەی سورەكراو ئەفرۆشێت بۆ زاری كرماجی گووتی" لە دوای بانگی عیشا كۆمەڵێك منداڵ دێنە ئێرەو هەموو دووكان و عارەبانەو تەنانەت ئەو هاووڵاتییانەی لەسەر شەقام وەستاون سواڵیان لێ‌ دەكەن، ئەم منداڵانەش وا راهێنراون وازت لێناهێنن و بێزارت ئەكەن تا بڕێك پارەییان پێ‌ نەدەی نارۆن، بۆیە داخوازین ئەم منداڵانە دەستگیر بكرێن و لێپێچینەوە لەگەڵ كەس‌و كاریان بكرێت، چونكە ئەم منداڵانە زیاتر كچن سواڵیان پێ‌ دەكرێت رەنگە ئەم منداڵە كچانە دووچاری دەست درێژی و رفاندن ببنەوە"

زۆرترین بینراو