واباشترە خۆتان لەگەڵ پارتی رابێنن

ئیسماعیل ئیبراهیم

 

نەوەی نوێ نابێتەوە بە هێزەكەی بەر لەم رووداوانە، كۆمەڵ لەبەردەم لەت بوونێكی دیكەیە، بزووتنەوەی گۆڕان هەر خەڵكی لێ دەبێتەوە، یەكگرتووی ئیسلامی پاشەكشە دەكات، یەكێتی پارە و پۆست رایگرتووە، حزبەكانی دیكەش ئەوەندە بێ كاریگەر بوونە كە زۆر جار رێكخراو یا ناوەندێك زیاتر دەتوانێت شەقام بجولێنێت.
هەموویان بەدەست كێشە ناوخۆییەكانەوە گیریان خواردووە، گرفتەكانیشیان هیچ پەیوەندی بە جیاوازی ئایدۆڵۆژی نییە، بەڵكو پەیوەندی بە پلە، پۆست، پارەو بەرژەوەندی كەسی یا گرووپەوە هەیە، لەو لاشەوە بۆ شاردنەوەی خەوشەكانیان پەلاماری پارتی دەدەن، وەك ئەوەی پارتی هیچ ئیش و كارێكی نەبێت هەر خەریكی نانەوەی ئاژاوە بێت لە نێو حزبەكان.
كاكە شاسوار گرتەی ڤیدۆیی ساتە رەنگاڵەییەكانی هەڵسووڕاوانی خۆی وەك هەڕِەشە بەكار دەهێنێت و ئەندامانی خۆیان سكاڵا لە سەر یەكتر تۆمار دەكەن، پارتی چی بكات.
كۆمەڵی ئیسلامی بە هۆی تاك رەویی و دیكتاتۆرییەتی ئەمیرەكەیان و بنەماڵەكەی خەریكە لەت لەت دەبێ بۆ خەتای پارتییە.
یەكگرتووی ئیسلامی نەیتوانیوە جۆرێك سیاسەت بكات كە شەقامی ئیسلامی سیاسی لێ رازی بێت، و نیوەی دەنگدەرانی لە دەستداوە پارتی چی بڵێت.
یەكێتی لەبەر بەرژەوەندی كەسی و لە پێناو پارە و پۆست لە كۆبوونەوە ناگەنە هیچ ئەنجامێك و هەر ئەندامێكی مەكتەبی سیاسی و هەر باڵێك داوای پۆست بۆ كوڕ و خزمانی خۆیان دەكەن و خەڵكی دیكەیان لە بیر كردووە، پارتی چییان پێ بڵێت.
سەیرەكە لەوەدایە هەمووشیان بۆ ئەوەی فۆكسی شەقامیان نەكەوێتە سەر، یا بۆ ئەوەی وای نیشان بدەن لە ناوخۆیان هیچ كێشەیەكیان نییە، پەلاماری پارتی دەدەن.
كاوە مەحموود، پەرلەمانتاری گۆڕان لە جیاتی دوو قسەی خێر لە نێوان هەڵسووراوانی بزووتنەوەكەی بكات كە چیتر نهێنەكانی بزووتنەوەكە ئاشكرا نەكەن و زیاتر لەوەی هەیە رووی راستەقینەی كادیرە دڵسۆزەكان دەرنەخەن كە ئەوەندەی مەبەستیان بەرژەوەندی كەسی بووەو بەرژەوەندی گشتییان لەبەرچاو نەبووە و ئەوەی كردوویانە و گووتوویانە لە سەر شاشە و شەقام شتێكی دیكە بووە و لە نێو كۆبوونەوەكان شتێكی دیكە، كە چی دێت یەخەی پارتی دەگرێت.
ئارێز عەبدولڵا، دەزانێت لە ناو یەكێتی حیساب بۆ قسە و بۆچوونەكانی ناكرێت، بە تایبەتی لە دیاریكردنی كاندید بۆ هەر پۆستێك لە كابینەی نوێ، دێت پەلاماری پارتی دەدات.
عەلی باپیر خۆی ئامادە كردبوو وەڵامێكی گەرمی سڵاوێكی ساردوسڕی پارتی بداتەوە، بەڵام وەك مازیكەری كوون دەپاشۆری بێ دەستكەوت هاتە دەڕێ، ئێستا وردە وردە كادیرانی رادەسپێرێت پەلاماری پارتی بدەن.
یەكگرتوو لە كابینەی رابردوو، لە حكومەت هاوبەش و لە پەرلەمان ئۆپۆزسیۆن و لە راگەیاندن شەڕ فرۆش و لە كۆبوونەوەكان دەست لەسەر سنگ بوو، دەنگی كمی كرد، ئێستا لە كەناڵەكانی راگەیاندنی خۆیان پەلاماری هەمووشتێ دەدەن و رەش و سپی پێكەوە دەسووتێنن، تەنها بۆ ئەوەی لە هەڵبژاردنەكانی چەند ساڵی داهاتوو هەندێك كورسییان بۆ بگەرێتەوە.
ئیتر وای لێهاتبووە، رۆژگارێك بە هۆی ئەو ئیرهابە فیكرییەی بەخۆیان دەستیان پێكرد، ئەوەی پەلاماری پارتی بدابایە دەنگی زیاتری دەهێنا.
ئێستا دۆخەكە پێچەوانە بووە، پارتی هەر بەهێزتر دەبێت، ئەو لایەنەی لە پارتی نزیك ببێتەوە دەنگی زیاتر دەهێنێت.
بۆیە بۆ خوا پێتان دەڵێم، واز لە رەفتاری هەرزەكارانەی سیاسیی بهێنن، لەبەر ئەوەی پارتی خاوەن ستراتیژییەكی قوڵە، بە تایبەتی لە بواری نەتەوەیی، كە چەند ساڵی رابردوو ئەوە بە باشی سەلمێندرا، پارتی لاواز نابێت، لایەنی كەم تا 2032 واتە تا سێ هەڵبژاردنی دیكەی داهاتوو پارتی هەر براوەی یەكەم دەبێت، بۆیە وا باشترە خۆتانی لەگەڵ رابێنن.

 

زۆرترین بینراو