" ناتوانین لە نێو شەقام و بازاڕی خەلیفان ئاژەڵ قەدەغە بكەین  ! "

" ناتوانین لە نێو شەقام و بازاڕی خەلیفان ئاژەڵ قەدەغە بكەین ! "

دیلمان فەرحان – خەلیفان: لە دیمانەیەكی هەفتە نامەی زاری كرمانجیدا، كاروان كەریمخان گوندەژۆری بەڕێوەبەری ناحیەی خەلیفان باس لە پڕۆژە خزمەت گوزارییەكانی سنوورەكە دەكات و ئاماژەی بەوەدا" لە داهاتوودا چەند پڕۆژەیەكی خزمەتگوزاری لە سەنتەری خەلیفان جێبەجێ دەكەین لەوانەش گەورەترین پڕۆژەی گەشتیاری جێبەجێ دەكرێت".
* ماوەی دەست بە كار بوونت چ پرۆژەیەك خەلیفان جێبەجێ كراوە؟
- لە سەرەتای دەست بە كار بوونم هەرێمی كوردستان دووچاری قەیرانێكی سەختی دارایی بووە و بەو هۆیەوەش پڕۆژەی نوێی خزمەتگوزاری جێبەجێ نەكران و ئەوانەی لە جێبەجێ كردنیشدان راگیران، بەڵام نەوەستاین لە هەموو بوارەكان هەوڵی تەواومانداوە خزمەتگوزارییە سەرەتاییەكان لە كەرتی پەروەردە و تەندروستی و لە بواری ئاو كارەبا . پڕۆژە گشتییەكانیش وێڕای ئەو قەیرانە سەختە توانیمان چەند پڕۆژەیەكی رێگاوبانیش بە ئەنجام بگەینین لەوانە رێگای گەلی عەلی بەگ – سرێشمە و چەند رێگایەكی تر قیڕتاو كراون .
* بۆچی پڕۆژەی خزمەتگوزاری لە خەلیفان لە ئاست ویستی خەڵك نییە؟
- پڕۆژەی خزمەتگوزاری نوێ‌ نەك تەنها لە خەلیفان بەڵكو لە هیچ شوێنێكیتر نییە، ئەوەی كە لە جێبەجێ كردنیشدان تەواو كردنی ئەو پڕۆژانەن كە لەكاتی قەیرانی دارایی وەستێندرابوون، وەك پڕۆژەی رێگاوبانی هەریر كە بەڵێندەر دەستی بە كارەكانی كردووە، وە لە سۆرانیش چەندین گەڕەك و كۆڵان قیڕتاوكراون وە ئەو بەڵێندەرانەش بەشێوەی قەرز پڕۆژەكانیان ئەنجامداوە، بەڵام لە خەلیفان زۆربەی پڕۆژەكان لەكاتی خۆیدا تەواو بوون، هەندێك پڕۆژەشمان هەیە بەڵێندەر ئامادە نییە ئەنجامیان بدات وەك رێگای بناری كۆڕەك .
* ڕێگای پیشەسازی خەلیفان زیاتر لە 10 ساڵە كێشە و گرفتی هەیە؟
- پڕۆژەی چاككردن و درووستكردنی رێگای پیشە سازی خەلیفان وەك زۆربەی پڕۆژەكانی تر بە هۆی قەیرانی دارایی راگیراوە، بەشێك لە پڕۆژەكە ئەنجام درابوو، لە ئیستاشدا خەریكە كۆتایی بە قەیرانی دارایی دێت و بارودۆخی دارایی حكومەت بەرەو باش بوون دەچێت، بۆیە داوامان لە بەڵێندەری پڕۆژەكە كردووە دەست بەكارەكانی بكاتەوە، هەر چەندە پڕۆژەكە خۆی كەموو كورتی هەیە .
*رێگای ئاڵانە و رێگای گەلی علی بەگ كەموكوڕییەكی زۆریان هەیە بۆچی چاكناكرێن؟
- چاكنەكردنی رێگا و بانەكان بە شێوەیەكی باش پەیوەندی بە لایەنی داراییەوە هەیە، بەڵام تایبەت بەو رێگایە دەرخستەمان كردووە بۆ تەواوی ناحیەی خەلیفان و رێگای دۆڵی ئاڵانەو دۆڵی مەلەكان و گوندەكانی دۆڵی خەلان بیاو تامەزرۆین بۆ چاككردنیان و هەوڵی تەواومانداوە و ئامادەین لە هەموو دەرگایەكیش بدەین، بەڵام ئەمە دەگەڕێتەوە سەر ئەو بڕە پارەیەی لە لایەن حكومەتەوە تەرخان دەكرێت، ئەوەندەی ئاگادارین بڕیارە بڕە پارەیەك تەرخانبكرێت بۆ رێگاو بان، بەڵام مەرج نییە تەنها بۆ خەلیفان بێت، بۆ رێگای گەلی علی بەگ داوامان بەرز كردۆتەوە بۆ سەرۆك وەزیرانی كابینەی هەشتەم خۆشبەختانە لە ماوەیەكی زوودا بەپیر داواكەمانەوە هاتن و بڕە پارەیەك تەرخانكرا بۆ پرۆژەكانی رێگای سرێشمە و دوو سایدی سۆران و پێچە ئاوهەڵدێرەكانی گەلی علی بەگ، پڕۆژەكە راستەوخۆ لەلایەن كەرتی ئەندازیارانی پارێزگای هەولێر و سنووری قەزای سۆران بەڕێوەچوو، دیارە كەموكورتیشی تێداییە ئێمە داوای بە دوواداچونمان كردووە، بەڵام هەڵكەوتەی شوێنەكە وایە ئاوی بە بەردەوام لەسەرە ( زەنەكە) بە بەردەوام لم دەچێتەوە سەر جادەكە تاكە چارەسەر درووست كردنی دیواری پاڵپشتە.
* بۆچی كێشەی كەم ئاوی و رێگاوبان لە گوندەكانی ناحیەی خەلیفان ساڵانێكە چارە نەكراون؟
- لە سنووری خەلیفان نزیكەی 66 گوند هەیە تەنها نزیكەی 10 گوند پڕۆژەی ئاوی خواردنەوەیان هەیە ئەوانی تر یان رێكخراوەكان دروستیان كردووە یان خەڵك، ئەویش بە دروستكردنی حەوز و ڕاكێشانی بۆڕی و سۆندەی ئاو.
ئێستا لە گوندەكانی كوردستان بەرنامەیەكی نادروست هەیە بە ناوی بەرنامەی وشكە ساڵی كە پڕۆژەیەكی زۆر دواكەوتووە و زیان بە ژێرخانی ئابووری دەگەینێت، ئەم بەرنامەیە بەردەوام دەبێ‌ گرێبەستەكەی نوێبكرێتەوە و پارەی بۆ تەرخانبكرێت. بەڵام كێشەكان بنبڕ ناكات، بەو پارەیەی لەو پڕۆژەیە تەرخان دەكرێت ئەگەر لە گوندێكی وەك جۆنەلە تەرخان بكرێت ئەوا كێشەی ئاوی بە شێوەیەكی یەكجاری بنبڕ دەكرێت، داواكارییەكانی گوندەكەمان گەیاندۆتە بەڕێوبەری ئاو رەزامەندی لەسەر كۆمەڵێك پڕۆژە دراوە یەكێك لەوانە پڕۆژەی گوندی جۆنەلەیە، چاوەڕێدەكرێت لە وەزارەتی دارایی پڕۆژەیان بۆ ئەنجام بدرێت.
* لە سنووری خەلیفان بە شێكی زۆری هاووڵاتییان پابەند نین بە پێدانی پارەی ئاو و كارەبا بۆچی ؟
- ئەوە دەگەڕێتەوە سەر ئەو ئەرك و مافەی لەسەر خەڵك و حوكمەت هەیە، هۆكاری گەڕانەوەی زۆری ئەو بڕە پارەیەی بۆ خەڵكی دەگەرێتەوە بۆ كەڵەكە بوون و نەدانی پارەكە لە كاتی خۆی، كە گلەیی زۆری لەسەرە بە هۆكاری خراپی پێوەرەكانی دادەنێن كە شتێكی تایبەت نییە بە گوندێك یا شارێك بەڵكو لەلایەن وەزارەتی شارەوانی و لایەنە پەیوەندی دارەكان داندراوە.
*بە بەردەوام ئاژەڵ لەناو شەقامەكان و بازاڕی خەلیفان دەبیندرێت بۆ نەهێشتنی ئەم دیاردەیە چیتان كردووە؟
- ئەم دیاردەیە ساڵانێكی زۆرە لە خەلیفان هەیە‌و بنبڕناكرێت، هۆكارەكەشی قەبوڵنەكردنی بەرپرسیارییەتی شارە لەلایەن هاووڵاتییانەوە، ساڵی رابردوو چەند جارێك هەڵمەتی دەستگیركردنی ئاژەڵی سەر شەقامەكانمان كردووە، خاوەنەكانمان بە پێژماردن سزا داوە و سزاكانیشمان لەمەو دووا توندتر دەكەین، ماوەی چەند مانگێك بوو دیاردەكە بنبڕ ببوو، بەڵام خەریكە وردە وردە سەرهەڵدەداتەوە، ئێمەش ناچارین بەرەنگاری بكەین بە هاوكاری لەگەڵ كۆمپانیای پاپا گروپ و شارەوانی خەلیفان، دەستگیركردنی ئاژەڵە بەڕەڵاكان بەردەوام دەبێت و سزای توندیش بەسەر خاوەنەكانیان دەسەپێندرێت.
* لە خەلیفان حكومەت هیچ زەویەكی تایبەت بە خۆی هەیە بۆ جێبەجێ كردنی پڕۆژە ؟
بەو پێییەی كە سنووری ناحیەی خەلیفان زەویەكان تاپۆ نین و دابەشكردنیان بۆ نەكراوە، حكومەت بیەوێ‌ هەر پڕۆژەیەك بكات لە خەلیفان كێشە دروست نابێت، زۆر جار زیدەرۆی كراوە لەسەر زەویەكان بەتایبەت زەوی شارەوانی بۆ ئەمەش رێكاری یاسای توندمان گرتوەتە بەر چونكە زەوی و زارەكان بەشێوەیەكی گشتی بە میلی هەژمار دەكرێن.
*نەخۆشخانەی خەلیفان لە روی بینایەوە لە بنكەیەكی تەندروستی دەچێت بۆ لایەنی كەرتی تەندروستی چیتان كردووە؟
نەخۆشخانەی خەلیفان لە ڕوویبینایە شتێك نییە شایەنی خەلكی خەلیفان بێت بەڵام لە ڕووی ناوەڕۆكە بەپێی ئەو كەموكوڕیانەی كە هەیە تەواو جیاواز مامەلەی لەگەل كراوە چ لەڕووی میلاكەوە بێت یان دەرمان یان مافی كارمەندی تەندرووستی كە هەمیشە و بە بەردەوام لە ئاستێكی باش خزمەتگوزاریە تەندرووستیەكان پێشكەش بە هاووڵاتییان كراوە، لەگەڵ بەڕێوەبرایەتی گشتی تەندروستی و بەڕێوبەرایەتی تەندروستی سۆرانیش لەسەر هێڵ بووین كەموكوریەكان تا ڕادەیەكی باش چارەسەر كراون جگە لە دابینكردنی میلاك و هەندێك كێشەی تەكنیكی ئامێرەكان، لە كاتی ئاڕاستەكردنی داواكاری بۆ سەرووی خۆمان هەمیشە روبەڕووی یەك وەڵام دەبینەوە ئەویش نەبونی بوددجە و پارەیە، لەلایەكی تریش ڕوبەڕووی گلەی و گازندەی خەلك دەبینەوە وە بەپێی توانا وەڵامی داواكاریەكانیان دەدەینەوە.
*خەلیفان ناوچەیەكی فێنك و گەشتیارییە، بەڵام لە كەرتی گەشتیاری هیچ خزمەتگوزارییەكی بۆ نەكراوە بۆچی؟
- خەلیفان ناوچەیەكی تەواو گەشتیارییە ئەگەر خزمەت بكرێت پاڵپشتییەكی تەواوی بكرێت ڕەنگە لە تەواوی عێراق و هەرێمی كوردستان ببێتە جەمسەری گەشتیاری، چونكە خەلیفان كەوتۆتە سەر ڕێگای سەرەكی ناوچە گەشتیارییەكان، ئاو هەوای لەباری هەیە، بەتایبەت مانگە گەرمەكانی ساڵ، بۆیە هەوڵمانداوە و بەردەوامیشین بۆ هاندانی كەرتی گەشتیاری، هەموو هەوڵێك دەدەین لە ماوەیەكی نزیكدا یەكێك لە پڕۆژە گەورەكانی گەشتیاری لە خەلیفانە دروست بكرێت . بەڵام كێشەی هەرە گەورەمان بریتییە ڕۆتینی زۆری حكومەت، بۆ نموونە بمانەوێ ڕەگەزی زەوییەكی شارەوانی بگۆرین بۆ پڕۆژەیەكی گەشتیاری ڕۆتینەكە ماوەیەكی زۆر دەخایەنێت و بەمەش رەنگە كارەكانمان دوا بكەوێت، لە كاتێكدا بە دروستكردنی ئەو پڕۆژەیە دەبێتە سەرچاوەیەكی زۆری داهات بۆ حكومەت و باشتركردنی گوزەرانی شارەكە و بەخشینی سیمایەكی جوانیش بە ناوچەكە.
* خێرخوازان دەیانەوێ پرۆژە بۆ گەنجانی خەلیفان ئەنجام بدەن بەڵام ئێوە رێگرن بۆچی ؟
- ئەوە تەنها حاڵەتێك بوو، ئەویش هاووڵاتییەك بە نوێنەرایەتی كەسیكی تر هاتووە كە گوایە پڕِۆژەیەك بۆ گەنجان دەكەن، بەدوواداچونمان بۆ ئەم بابەتە كرد، ناكرێ هەر كەسێك بە نوێنەرایەتی كەسێكی تر دێت چەند پارچە زەویەكی بدەینە بەردەست، داوامانكردووە كەسەكە خۆی بێت ئەو كاتە بەو پەڕی خۆشحاڵییەوە پاڵپشتی دەكەین و یارمەتیشی دەدەین.
* ئاوی زێراب و ئاوەڕۆكانی خەلیفان دەڕژێنە ناو سەرچاوەی ئاوی شەلالی گەلی علی بەگ چیتان كردووە بۆ چارەسەر كردنی ئەو گرفتە ؟
- تەواوی ئەو دیاردانەی لە خەلیفان باس دەكرێت دەگەڕێتەوە بۆ سەردەمێكی كۆن كۆنتڕۆڵكردنی كەمێك سەختە، بەشێك لە هاووڵاتییان كەوتوونەتە سەر ڕێڕەوی زێرابی خەلیفان و بیری تەوالێت بەكار ناهێنن كە دیاردەیەكی زۆر نەشیاوە و دەبێتە هۆی پیسكردنی رووباری خەلیفان، لێژنەیەكیشمان پێكهێناوە زۆر بە تووندی بەدوواداچوون بۆ ئەم بابەتە دەكرێت و مامەڵەكردن لەگەڵ ئەو كەسانە لە ڕێگای یاساوە دەبێت.

 

زۆرترین بینراو