ئیدارەی مووسڵ هیچ گرنگی بە شێخان نادات

ئیدارەی مووسڵ هیچ گرنگی بە شێخان نادات

رەمەزان هەرنی – شێخان : قەزای شێخان یەكێكە لە قەزاكانی سنووری ماددەی 140 و دەكەوێتە رۆژهەڵاتی پارێزگای دهۆك لە رووی ئیدارییەوە سەر بە پارێزگای مووسڵە، موسلمانان، ئێزدی، مەسیحی و عەرەب پێكەوە لێ دەژین, بە شاری برایەتی ناسراوە، بەڵام هەرێمی كوردستان زیاتر لە ئیدارەی مووسڵ یارمەتی قەزاكە دەدات و پرۆژە لێ ئەنجامدەدات.
مەحموود ئێزدی, بەرپرسی لقی 20 شێخانی پارتی دیموكراتی كوردستان بە زاری كرمانجی گوت:" قەزای شێخان لە رووی ئیدارییەوە سەر بە پارێزگای مووسڵە, بەڵام هیچ هاوكاری قەزاكە ناكەن، ئەو یارمەتیانەی بۆ شێخان دێن بە فشاری پەرلەمانتارانی پارتی دیموكراتی كوردستانە لە بەغدا لەگەڵ سەرۆكی ئەنجوومەنی پارێزگای مووسڵ و جێگری پارێزگار, بە گشتی ئەو پرۆژانەی لە مووسڵ دێن بۆ شارەكە بە فشاری بەرپرسە كوردەكانە، سەرەڕای ئەوەی كە هەموو دەسەڵاتێكیان نیە، بەڵام درێغیان نەكردووە و ئەوەی پێیان كراوە بۆ شارەكە كراوە، ئەگەرنا ئیدارەی مووسڵ هیچ گرنگی بە شێخان نادات.
بەرپرسی لقی 20 شێخانی پارتی ئەوەشی گوت:" حكوومەتی هەرێمی كوردستان لە كابینەكانی رابردوو تا ئێستا بەردەوام پرۆژەی لە شارەكە ئەنجامداوە، سەرەڕای ئەوەی شێخان سەر بە پارێزگای مووسڵە, زۆربەی دانیشتوانی شێخان ئەوانەن كە دەكەونە سنووری ماددەی 140، بەڵام چەند ناحیەكی قەزاكە دەكەونە سنووری ئیدارەی هەرێمی كوردستان, شێخان لە چاو پازدە ساڵی رابردوو زۆر گۆرانكاری بە خۆیەوە بینیوە، ئەو پێشكەوتنە لەسەر دەستی حكوومەتی هەرێمی كوردستان بووە.
مەحموود ئێزدی, ئەوەشی خستەڕوو:" شێخان بە شاری برایەتی ناسراوە، بەهۆی ئەوەی پەیوەندیەكی زۆر بەهێز لە نێوان پێكهاتەكاندا هەیە و لە خۆشی و ناخۆشییەكاندا لەگەڵ یەكدی بەشدارن لە بۆنە تایبەت و ئایینیەكانی یەكتر بەشداری دەكەن و وەكو برا پێكەوە دەژین و دوور لە هەموو كێشەیەك، لەگەڵ ئەوەی عەرەبیش لە سنووری شێخان هەن، كە چەند گوندێكن بەڵام هیچ كێشەیەك نیە و شارەكە زۆر ئارامە و هەموو وەكو برا پێكەوە دەژین.
مەحموود ئێزدی, بەرپرسی لقی 20 شێخانی پارتی روونیكردەوە:" لە سنووری شێخان ژمارەیەكی زۆر ئاوارەی سنووری شنگال هەن، بە پێی توانا یارمەتیان دەدەین, ئیدارە، وەكو پارتی بەردەوامین لە یارمەتی دانی ئەو ئاوارانەی لە كەمپەكانی سنووری شێخان نیشتەجێن".

زۆرترین بینراو