ئێران هێزێكی زۆری كۆ كردۆتەوە و هێزەكانی پێشمەرگەش لە ئامادە باشیدان

ئێران هێزێكی زۆری كۆ كردۆتەوە و هێزەكانی پێشمەرگەش لە ئامادە باشیدان


زاری كرمانجی- حاجی ئۆمەران: بە پێی دواین زانیارییەكانی دەست زاری كرمانجی كەوتوون، ئێران هێزێكی زۆری سەربازی لە نزیك سنوورەكانی هەرێمی كوردستان كۆكردۆتەوە، سەرچاوەیەكی ئاگادار لەمبارەوە بە زاری كرمانجی گووت" هەندێك لەو هێزانە لە پارێزگاكانی تەورێز و ئورمیە هێنراونەتە نزیك سنوور".
لیوا بەهرام عەریف، فەرماندەی فەرماندەیی هەڵگورد، لەمبارەوە بە زاری كرمانجی گووت" ئاگادارین ماوەیەك بەر لە ئێستا ئێران هێزێكی زۆری كۆكردبووە، هەتا تۆپخانە و دەبابەشیان لەَگەڵ بووە، لەگەڵ ژمارەیەك لە هێزەكانی حەشدی شەعبی، دواتر هێزەكانی حشدی شەعبی گەڕاونەتەوە، بەڵام هێزەكانی دیكە ماوون، ئیتر بۆ چی هاتوون و مەبەستیان چییە نازانین".
زیاتر گووتی" ئێمە وەك هێزی پێشمەرگە خەریكی ئامادەكاری و ئامادەباشین بۆ هەر ئەگەرێك، نەك لەبەر هێنانی هێزی ئێرانی بۆ سەر سنوور".
ماوەیەكە ئێران بە بیانووی بوونی هێزەكانی ئۆپۆزسیۆن لەسەر سنوور قوڵایی خاكی هەرێمی كوردستان تۆپباران دەكات و زیانی گیانی و ماددی بەر خەڵكی سڤیل گەیاندووە.
سەرچاوە هەواڵییەكان ئاماژە بەوە دەكات " سێ هۆكار لە پشت كۆ كردنەوەی ئەو هێزانە هەن، یەكەمیان ئێران ترسی ئەوەی هەیە، بە هۆی دۆخی خەراپی ئابووری و سیاسی خەڵك راپەرین ئەنجام بدات و هێنانی ئەو هێزانە بۆ چاو ترساندنی خەڵكە، هۆكاری دووهەمیش بۆ ئەوەیە ئەگەر بۆی بلوێت ئۆپەراسیۆنێكی سەربازی لە دژی نەیارەكانی ئەنجام بدات، هۆكاری سێهەمیش ئەوەیە رەنگە لەگەڵ وڵاتی توركیا رێككەوتنێك كرابێت كە پێكەوە لە دژی پەكەكە لە قەندیل و چەند شوێنی دیكە ئۆپەراسیۆنی هاوبەش ئەنجام بدەن".

 

زۆرترین بینراو