ئێمەی ئافرەتان هیچ شوێنێكمان نەبوو سەردانی بكەین

ئێمەی ئافرەتان هیچ شوێنێكمان نەبوو سەردانی بكەین

ئا: هۆژین شەوكەت دری
بوونی شوێنێكی تایبەت بە ئافرەتان بۆ بەسەربردنی كاتێكی خۆش و حەسانەوەیان لە كۆمەڵگەیەكی وەك كوردستان زۆر بە كەمی دەبینرێت، كەم ئافرەت هەن توانای ئەوەیان هەبێت شوێنێكی تایبەت بە خۆیان دابنێن یا كار بكەن بەبێ ئەوەی رێگری لە بەردەمیان هەبێت و تووشی كێشە نەبنەوە.
دابین كچە بوێرەكەی شاری كۆیە لەگەڵ دوو هاورێكەی هەستاون بە دانانی كافێیەكی تایبەت بە خانمان، هەرچی لە نێو ئەم كافێیەدایە تایبەتە بە ئافرەتان و خزمەت كردنیان، دابین لە دیمانەیەكی تایبەت بە زاری كرمانجی گووت" كافێكەمان بچوكە لەناو هۆڵێكی لەشجوانی كە تایبەتە بە ئافرەتان دامانناوە، ئەم كافێیەمان هەم بە شێوازی كۆن هەمیش بە مۆدێرن دیزاین كراوە، مەبەست لەم جۆرە دیزاینەش بەخشینی چێژە بە سەردانكەرانمان و دوور خستنەوەیان لە جەنجالی شەقامەكان، بڕیاردان بۆ كردنەوەی ئەم كافێیە لە كاتێكدا هات ئێمەی ئافرەتان هیچ شوێنێكمان نەبوو لە كۆیە سەردانی بكەین و لەگەڵ هاورێكانمان پشوو بدەین جەوێكی لێ بگۆڕین، هەربۆیەش بڕیارمان دا بە كردنەوەی ئەم كافێ بچوكە تا خانمانیش سوودی لێ ببینن".
گووتیشی" من و دوو هاوڕێكەم زۆر پاڵپشتی یەكتر بووین، هیچ كەسێك هاوكاری نەكردووین هەر خۆمان هەوڵی خۆمان داوە، پێشوازییەكی باشمان لێكرا بەڵام بێ رەخنەش نەبوو كەسانێك رەخنەیان دەگرت و كەسانێكیش پاڵپشتمان بوون، رەخنەكان وایان لێكردین كاری باشتر بكەین زیاتر خەڵك لە خۆمان رازی بكەین، تەنها یەك ئافرەت لەم كافێیە كاردەكات ئێمەش لەگەڵ هاورێكانمان هاوكاری دەكەین، لە كاتژمێر ٣ی عەسر بۆ ٩ی شەو كراوەیە خانمان دەتوانن لەم كاتانەدا سەردانمان بكەن و پشوو وەربگرن لەگەڵ هاورێكانیان، كتێبخانەیەكی بچووكیشی تێدایە كۆمەڵێك كتێبی تەندروستی و رۆمان چەندین جۆری جیاوازی تر لەخۆ دەگرێت، گرنگیەكی زۆرمان بە لایەنی تەندروستی داوە بۆیە ناومان لێناوە فیتنێس سەرجەم خواردن و خواردنەوەكان گونجاون بۆ هەموو كەسێك بەبێ بوونی هیچ كێشەیەك".

زۆرترین بینراو