ئەمساڵ لە سنوورەكەمان زیاتر لە 2 هەزار و 982 دۆنم زەووی پۆش و پاوان و دارستان و رەزو باخی هاووڵاتییان سووتاوە

ئەمساڵ لە سنوورەكەمان زیاتر لە 2 هەزار و 982 دۆنم زەووی پۆش و پاوان و دارستان و رەزو باخی هاووڵاتییان سووتاوە

دیدار-محەمەد هەسنانی
بەڕێوەبەری بەرگری شارستانی سۆران، ئاماری هەشت مانگی ئاگر كەوتنەوە لە پوش و پاوان و دارستانی سنوورەكە ئاشكرا دەكات و دەشڵێت، مین و تەقەمەنی و سەختی ناوچەكە بەربەست بۆ كارمەندانمان دروست دەكات لەكاتی كۆنتڕۆلكردنی ئاگرەكان.
عەمید عیماد كەنعان، بەڕێوەبەری بەرگری شارستانی سۆران، بەزاری كرمانجی راگەیاند " سنووری بەڕێوەبەرایەتییەكەمان هەرچوار قەزاكانی (سۆران، مێرگەسۆر، چۆمان، رواندز) لەخۆدەگرێت، كە لە سەنتەری ئەم قەزایانە و زۆربەی ناحیەكانیان بنكەی تایبەت بە بەرگری شارستانیی سۆران كراونەتەوە، لە پێناو ئەوەی لەكاتی بوونی هەر رووداوێك تیمەكانمان لە بەرگری شارستانی بە زووترین كات بگەنە شوێنەكە، بۆ كۆنتڕۆلكردنی ئاگرەكان و فریاكەوتنی رووداوەكانی دیكەی جۆراو جۆر، وەك "سوتان، خنكان، هەڵدێران، گیر خواردن" ..هتد".
بەڕێوەبەری بەرگری شارستانی سۆران، گووتیشی " زۆرترین رووداوەكانی ئەمساڵ واتە لە هەشت مانگی رابردوو تا ئێستا ئاگر كەوتنەوە بووە لە پوش و پاوان و دارستان و رەزو بەخی هاووڵاتییانی سنووری بەڕێوەبەرایەتییەكەمان، كە بەهۆیەوە رووبەرێكی یەكجار زۆر زەووی و پوش و پاوان و دارستان گڕیان گرتووەو سووتاوە، لە ئێستاشدا بەردەوام گوێبیستی رووداوەكانی ئاگر كەتنەوە دەبین و تیمەكانمان بەردەوام لە ئامادەباشی و ئەركدان".
عەمید عیماد كەنعان، ئاماژەشی بەوەدا " بەپێی ئامارەكانمان لە بەرگری شارستانی سۆران، لە مساڵدا واتە لە بەرواری 1-1-2020 تا كوو 7-9-2020 لە سنووری هەرچوار قەزاكانی بەڕێوەبەرایەتییەكەمان، نزیكەی 260 رووداوی ئاگر كەوتنەوە تۆماركراون و بەهۆیەوە زیاتر لە 2 هەزار و 982 دۆنم زەووی پۆش و پاوان و دارستان و رەزو باخی هاووڵاتیان سووتاوەو زیانی زۆری بە ژینگەی دەڤەرەكەمان گەیاندووە".
بەڕێوەبەری بەرگری شارستانی سۆران، ئەوەشی خستەروو " تیمەكانمان بە هاوكاری پۆلیسی ژینگەو دارستان، بەردەوام لە ئەركدابوونە بۆ كۆنتڕۆلكردنی ئەم ئاگرانە، لەگەڵ ئەوەشدا لە زۆربەی شوێنەكان پێشمەرگەو هێزە ئەمنییەكان و هاووڵاتیانی ئەم ناوچانەی، كە رووداوی ئاگریان لێكەوتۆتەوە هاوكار بوونە بۆ كۆنتڕۆلكردنیان، هەروەها هەندێ‌ جار فڕۆكەی فریاكەوتن لە شاری هەولێر بەهانای تیمەكانمانەوە هاتووە".
عەمید عیماد كەنعان، دەشڵێت " بەهۆی هەڵكەوتەی ناوچەكەمان و سەختی هەندێ‌ لە شاخەكانی سنوورەكەمان كە رێگای ئۆتۆمبێلیان پێناگات بۆ پیادەش بەسەركەوتنیان سەختە، هەروەها هەندێ‌ شوێن پێشتر رەبایە و مۆڵگەی بەعس بوونەو پاشماوەی مین و تەقەمەنی جەنگیان لێماوە، بەربەست لەبەردەم كارمەندانمان دروست دەكات و كاتی زیاتری پێدەچێت بۆ كۆنتڕۆلكردنی ئاگرەكەكان".
بەڕێوەبەری بەرگری شارستانی سۆران، سۆران داواكاریش بوو لە هاووڵاتییان لەكاتی چوونیان بۆ گەشت و كارو كاسبی و بۆ ناوچەشاخاوییەكان خۆیان بەدووربگرن لە هەڵكردنی ئاگر، ئەگەر پێویستیشیان بە ئاگر كردنەو بوو، لەشوێنێكی گونجاو هەڵی بكەن و لەدوای خۆشیان كۆنتڕۆلی بكەن، هەروەها جگەرە فڕێنەدەنە ناو پوش و پاوان و دارستان، چونكە ئەمانە هەموویان دەبنە هۆی كەوتنەوەی رووداوی ئاگر، لەگەڵ ئەوەشدا زۆرجار فڕێدانی ماددەی شوشە بۆ ناو پوش و پاوان بەهۆی كاریگەری تیشكی خۆر دەبێتە هۆی كوەتنەوەی ئاگر، پێویستە خەڵكی ئامانە بە هەند وەرگرن ئەگەرنا زیانی زۆر بەدوای خۆیەوە دەهێنێت و ژینگەی ناوچەكەش وێران دەكات".
عەمید عیماد كەنعان، بەڕێوەبەری بەرگری شارستانی سۆران، ئاماژەشی بەوەدا " پێویستە ئەو كەسانەی بە شێوەی ئەنقەست دەبنە هۆكاری كەتنەوەی ئاگرەكان، لێپێچنەوەی توندی یاسایان لەگەڵ بكرێت، چونكە ئەوانە جگەلەوەی زیان بەژینگە دەگێنن و جۆرەها درەخت و پەلەوەرو ئاژەڵی كێوی لەناو دەبەن و دەیان سووتێنن، لە هەمانكاتیشدا زۆرجار دەبێتە هۆی رووداوی سووتان و گیان لەدەستدانی هاووڵاتییان، هەروەها خەرج و ماندووبوونی زۆری دەوێت تا ئەو كاتەی ئاگرێك كۆنتڕۆل دەكرێت، دووكەڵەكەشی زیانی زۆر بەژینگەو تەندروستی دەگەێنێت".
بەڕێوەبەری بەرگری شارستانی سۆران، گووتیشی " وەك ناڕەزایەك دژبە سووتاندن و وێرانكردنی ژینگە، لەم هەفتەی رابردوودا رێكخراوی وار بۆ پاراستنی ژینگە، لە بەردەم هۆڵی بەڕێوەبەرایەتییەكەمان گردبوونەوەیەكیان سازكرد، وێڕایی بەرزكردنەوەی دروشمەكان یاداشتنامەیەكیان خوێندەوەو داواكاریان ئاراستەی حكوومەت و وەزارەت و لایەنە پەیوەندیدارەكان كرد، بۆ ئەوەی یاسایەكی توند هەبێت بۆ ئەو كەسانەی كە بە ئەنقەست ئاگر لە پوش و دارستان بەردەدەن، هەروەها هاوكاری زیاتر بەڕێوەبەرایەتی بەرگری شارستانیی و پۆلیسی ژینگەی سنوورەكەمان بكرێت لە رووی دابین كردنی پێداویستی بۆ ئەوەی بتوانن زووتر بە كۆتڕۆلكردنی ئاگرەكان رابگەن، لەگەڵ ئەوەشدا پەلە بكرێت لە دابەشكردنی بەشە نەوتی هاووڵاتیان بۆ ئەوەی خەڵك روو لە برینی دارو درەختەكان نەكات، لەگەڵ چەند خاڵێكی دیكەی تایبەت بە پاراستنی ژینگە، دواتر یاداشتنامەكەیان دایە ئێمە بۆ ئەوەی بیگەێنینە سەرووی خۆمان.

زۆرترین بینراو