ئەمساڵ یەك ملیۆن و 23 هەزار گەشتیار لە حاجی ئۆمەران هاتووچۆیان كردووە

ئەمساڵ یەك ملیۆن و 23 هەزار گەشتیار لە حاجی ئۆمەران هاتووچۆیان كردووە

زاری كرمانجی- حاجی ئۆمەران: موقەدەم زرار حوسێن، بەڕێوەبەری نشینگە و پاسپۆرت لە سنووری نێودەوڵەتی حاجی ئۆمەران لە دیمانەیەكی هەفتەنامەی زاری كرمانجیدا تیشك دەخاتە سەر زیادبوونی رێژەی هاتووچۆی گەشتیاری نێوان هەرێمی كوردستان و كۆماری ئیسلامی ئێران لە سنوورەكەیان و دەشڵێت: هەڵگرتنی ڤیزا بۆ هەڵگرانی پاسپۆرتی عێراقی، رێژەی چوونی گەشتیارانی بۆ ئێران زیاتر بەرزكردۆتەوە.
موقەدەم زرار حوسێن، بە زاری كرمانجی راگەیاند: لە رێكەوتی 24-10-2019 بڕیاردراوە ئەو گەشتیارانەی هەڵگری پاسپۆرتی عێراقین، ڤیزایان پێویست نییە بۆ گەشتەكەیان بۆ وڵاتی ئێران، تەنها بە پاسپۆرت دەتوانن هاتووچۆ بكەن، بە مەرجێك پاسپۆرتەكەیان شەش مانگی مابێت بەسەر بچێت. ئەم بڕیارە تا رۆژی 31-12-2019 كاری پێدەكرێت و دیار نییە ئاخۆ ئەم بڕیارە درێژ دەكرێتەوە یاخود نا.
گووتیشی: ئەمساڵ رێژەی گەشتیاری لە مەرزی حاجی ئۆمەران بەراورد بە ساڵی پار 40% زیادی كردووە، هۆكارەكەیشی بۆ دابەزینی بەهای تمەن و كەمكردنەوەی نرخی ڤیزا و هەڵگرتنی ڤیزا دەگەڕێتەوە، بەمەش گەشتیارێكی زۆر لەم مەرزە هاتووچۆیان كردووە.
بەپێی ئاماری ئەم بەڕێوەبەرایەتییە رۆژانە لە مەرزی نێودەوڵەتی حاجی ئۆمەران نزیكەی 3500 گەشتیار هاتووچۆ دەكەن، وەك بەرپرسی نشینگە و پاسپۆرتی حاجی ئۆمەران رایدەگەیەنێ لەماوەی 10 مانگی سەرەتای ئەمساڵ یەك ملیۆن و 23 هەزار گەشتیار لە مەرزی حاجی ئۆمەران هاتووچۆیان كردووە، ئەمەش بەراورد بە رێژەی پارساڵ 40% بەرزبوونەوەی بەخۆوە دیوە.
ئەمساڵ بەهۆی گەمارۆ ئابووریەكانی وڵاتە زلهێزەكان بۆ سەر وڵاتی ئێران، كاربەدەستانی ئەو وڵاتە بڕیاریاندا سەرەتا نرخی ڤیزا بۆ هەڵگرانی پاسپۆرتی عێراقی لە 38 هەزار دیناری عێراقی بۆ دوو هەزار كەمبكەنەوە و ئێستاش بە هەڵگرتنی ڤیزا بۆ هەڵگرانی پاسپۆرتی عێراقی بۆ ماوەیەكی دیاریكراو، دەیانەوێ كاریگەری قەیرانە ئابووریەكانی سەر وڵاتەكەیان كەمتر بكەنەوە. هەروەها دابەزینی بەهای دراوی تومەن لە بازاڕەكانی جیهان هۆكارێكی دیكە بوو بۆ ئەوە رێژەی گەشتیاری بۆ ئەو وڵاتە رووی لە بەرزبوونەوە بكات.
بەرپرسی پاسپۆرت و نشینگە لە سنووری نێودەوڵەتی حاجی ئۆمەران گووتی: هاوسەنگی هاتووچۆی گەشتیاران لەنێوان هەرێمی كوردستان و كۆماری ئیسلامی ئێران لە سنوورەكەماندا، هاتوو %50 و چوونیش %50 بووە، زیاتر ئەوانەیشی گەشتی ئێران دەكەن، بە مەبەستی گەشتیاری و چارەسەری نەخۆشی و بازرگانی بووە.
زرار حوسێن، سەبارەت بە كارئاسانی و ئامادەكاری بۆ وەرزی سەرما، گووتی: ئێمە لە بەشی هاتن و چوون لە سنوورەكەمان بە شەش كۆمپیوتەر كاری هاتووچۆی گەشتیاری رایی دەكەین و 24 كاتژمێریش ئەفسەر و كارمەندەكانمان كاری فەرمی خۆیان دەكەن، بڕیاریشمانداوە ژمارەی كۆمپیوتەرەكانمان بكەینە 12 كۆمپیوتەر، بۆ ئەوەی كارئاسانی زیاتر بۆ بواری گەشتیاری دروست بكەین و هەر كاتێكیش گەشتیار بیەوێت لەم مەرزە هاتووچۆ بكات، ئەگەر كاتژمێر سێی شەویش بێت دەتوانێت گەشتی خۆی ئەنجام بدات.

 

زۆرترین بینراو