ئەمڕۆ سۆران میوانداری پێشمەگەی سلێمانی دەكات

ئەمڕۆ سۆران میوانداری پێشمەگەی سلێمانی دەكات

زاری كرمانجی- سۆران: دوای ئەوەی هەفتەی رابردوو لە ركابەرییەكانی خولی پلە نایابی كوردستان یانەی وەرزشی سۆران گەورەترین سەركەوتنی بەسەر یانەی دهۆك دەستەبەر كردو بە گۆڵێكی بێ وەڵام سێ خاڵی گرنگی بەدەستهێنا, لە دووەم گەڕی ركابەرییەكان سۆران یانە تازەكەی پلە نایاب بە لێهاتووی رەفیق سەعیدی راهێنەرو یاریزانەكان توانیان ترسێك بخەنە دڵی تیپەكانی تر, ئەوەبوو لەیەكەم تاقیكردنەوە لەنێو یاریگەی خۆی توانی لەگەڵ نەورۆزی دووەمی وەرزی رابردوو یەكسان بێت و دووەم یاری لە دهۆك بباتەوە, ئەمەو یانەی سۆران بە كۆكردنەوەی 4 خاڵ لە پلەی سێیەم دێت و ئەمڕۆش لە یاریگەی گەردەگەردی رواندز میوانداری یانەی پێشمەرگەی سلێمانی دەكات, یانەی میوان لە گەڕی رابردوو لە نێو یاریگەی خۆی بە ئەنجامی 0-1 دۆڕایە یانەی دەربەندیخان, لە دوو یاری رابردووی یەكسان و دۆڕانكی هەیە لە پلەی دەیەم دێت و تەنها خاڵێكی هەیە.
لەمبارەیەوە رەفیق سەعید راهێنەری یانەی وەرزشی سۆران لە لێدوانێكدا بۆ زاری كرمانجی گووتی" لە یاری هەفتەی رابردوو پێش یارییەكە بە تەواوی یاریزانەكانم راگەیاند كە ئێمە بۆ بردنەوە هاتووین, لە تایمی یەكەم تیپی خاوەن ماڵ فشاری زۆریان خستە سەرمان بەڵام هێڵی بەرگریمان بوێرانە گۆڵەكەیان پاراست, لە كاتی پشووی نێوان تایمەكان بە یاریزانەكانم ووت ئەگەر بمانەوێ سەركەوتن بەدەست بێنین دەبێ زیاتر تۆپ لای خۆمان بهێڵینەوەو فشار درووست بكەین, بۆیە باڵادەستیمان نواندو سیاكۆ بە تۆماركردنی تاكە گۆڵی یارییەكە توانی متمانەی زیاتر بداتە تیپەكەمان و پارێزگاریمان لە ئەنجامەكە كرد".
سەبارەت بە یاری ئەمڕۆ راهێنەری یانەی سۆران گووتی" یانەی پێشمەرگەی سلێمانی تیپێكی تۆكمە و خاوەن هێزێكی جەستەییە, ئێمەش بەباشی خۆمان ئامادە كردووەو دەبێ ژیرانە لەگەڵ یارییەكە مامەڵە بكەین و دەستەبەركردنی 3 خاڵی یارییەكە ئارامی زۆرمان پێ دەبەخشێت بۆ بەردەوامیدان بە سەركەوتنەكانمان لە گەڕەكانی داهاتووی خولەكە".

زۆرترین بینراو