ئەنجامە بەراییەكانی دەنگدانی تایبەت لە سنووری ئیدارەی سۆران

ئەنجامە بەراییەكانی دەنگدانی تایبەت لە سنووری ئیدارەی سۆران

 

تایبەت بە زاری كرمانجی:

دوێنی 8-10-2021، هاوشانی عێراق لە هەرێمی كوردستانیش پڕۆسەی دەنگدانی تایبەت بەڕێوەچوو، بە پێی زانیارییەكان بەربژێرەكانی پارتی سنووری پارێزگای هەولێر زۆرترین دەنگیان بردووە، هەر چی پەیوەندی بە سنووری ئیدارەی سەربەخۆی سۆرانیشەوەیە، كە بازنەی یەكی بۆ دانراوە، كاندیدانی پارتی دیموكراتی كوردستان زۆرترین دەنگەكانیان مسۆگەر كردووە.
بەپێ زانیارییە نافەرمییە سەرەتاییەكان رێژەی دەنگەكان لە بازنەی (1)ی سەربە پاریزگای هەولێر بەم شێوەیە بووە:
-    كاندیدی ژمارە 26 نەهرۆ مەحموود قادر ، 7127 دەنگ
-    د. محەمەد سدیق خوشناو كاندید ژمارە27،  5231 دەنگ
-    سیپان عەزیز شێروانی 25،  3106 دەنگ
-    جوان عەبدولڵا مهاجیر 23،  1246 دەنگ
-    فەیسەل كەریم خان، 24، 1128 دەنگ
ئەم ئامارە گۆڕانكاری تەواوی بەسەر دادێ لەبەر ئەوەی بەپێی زانیارییەكان ژمارەیەك لە دەنگەكانی تایبەت نەكراونەتەوەو لەگەڵ دەنگدانی گشتی ئاشكرا دەكرێن.
هەرچی كاندیدەكانی دیكەیە بە هەموویانەوە نەیانتوانیوە 500 دەنگ مسۆگەر بكەن.
هەر چەندە شەوی رابردوو دوای تەواوبوونی پرۆسەی دەنگدان لە سۆشیال میدیای نافەرمی و تۆڕەكۆمەڵایەتییەكانەوە ژمارەی جیاجیا بڵاو كرایەوە و هەندێكی تووشی شۆك كردن، بۆ نموونە وابڵاو كرایەوە كە یەكێك لە كاندیدەكانی بازنەی (1) لە سنووری ئیدارەی سەربەخۆیی سۆران زیاتر لە (11) هەزار دەنگی بەدەستهێناوە، بەڵام دواتر دەرچوو هەزار و 100 دەنگی هێناوە، ئەمەش ئەو كاندیدەی تووشی فۆبیا كردووە و راستەوخۆ پەیوەندی بە سەرەوەی خۆی كردووەو مزگێنی داونەتێ، بەڵام دواتر بۆیان دەركەوتووە كە ئەو كاندیدە كەوتۆتە ژێر كاریگەری توڕەكۆمەڵایەتییەكانەوە".
هەرچی كاندیدانی رەگەزی مێینەشن لەم بازنەیە، جوان عەبدولڵا چوونی بۆ بەغداد مسۆگەر كردووە، لەبەر ئەوەی بەپێی سیستەمی كۆتا، ئەگەر چەند هەزار دەنگێكیش بەدەست بێنێ كێشەی نابێت، چونكە بەپێی رێژەی دەنگەكان ركابەرێكی لاوازی هەیە.
لە بارەی كاندیدانی پیاویشەوە ئەگەر رێژەی دەنگەكانی تایبەت بكرێنە پێوەر، نەهرۆ مەحمود و د. محەمەد سدیق، چانسی سەركەوتنیان زیاترە و كێبەڕكێ لە نێوان د. سیپان عەزیز و فەیسەل كەریم دەبێت، بەپێی ئەو دابەشكارییانەی پارتی دیموكراتی كوردستان بۆ سەرخستنی كاندیدانی كردوویەتی و بەرچاوروونی هەیە، چانسی فەیسەل كەریم زۆر لاوازە، لەبەر ئەوەی پێویستی بە زیاتر لە 30 هەزار دەنگی دیكە هەیە ئەمەش ئەستەمە، لەبەرامبەردا پارتی بەم دابەشكراییەی كە كردوویەتی هیچ یەك لە كاندیدانی كەمتر لە 34 هەزار دەنگ ناهێنن.
بۆیە پارتییەكان پێیانوایە هەرچوار كورسییەكەی بازنەی یەك مسۆگەر دەكەن، هەرچی یەكێتیشە لە هەوڵی ئەوەدایە تاكە كاندیدی خۆی سەربخات، بۆیە كێبڕكێ باقی لایەنەكانی دیكە بێ ئەنجام دەبێت.

زۆرترین بینراو