ئەو قوتابییانەی دەیانەوێت لە ماستەر و دكتۆرا بخوێنن چی دیكە پێویست ناكات بچنە دەرەوە

ئەو قوتابییانەی دەیانەوێت لە ماستەر و دكتۆرا بخوێنن چی دیكە پێویست ناكات بچنە دەرەوە

دیدار- ڕائیب شێروانی: عەبدولسەلام دۆلەمەری، سەرۆكی لیژنەی پەروەردە و خوێندنی باڵا لە پەرلەمانی كوردستان لە دیدارێكدا لەگەڵ هەفتەنامەی زاری كرمانجی دیاركرد:" ئەو قوتابیانەی كە دەیانەوێت لە ماستەر و دكتۆرا بخوێنن، چی دیكە پێویست ناكات بچنە دەرەوە و بە نمرەی 50 و بە كەمكردنەوەی كرێی خوێندن بۆ 45% دەتوانن لە زانكۆییەكانی كوردستان بخوێنن. دەشڵێ:" بۆ پڕۆژەی چاكسازی حكوومەت پڕۆژەیەكی ئامادەكردووە و بەزووترین كات ئەو پڕۆژەیە رەوانەی پەرلەمان دەكات و پەسەند دەكەین و دەبێتە یاسا، بەوەش پارەیەكی زۆر بۆ حكوومەت دەگەڕێتەوە.
سەرۆكی لیژنەی پەروەردە و خوێندنی باڵا لە پەرلەمانی كوردستان رایگەیاند:" بۆ قوتابیانی مەرحەلە یەك لە زانكۆیە تایبەتەكان 25% كرێی خوێندنمان كەم كردۆتەوە، هەروەها لە زانكۆی نۆلیج پێنج بەش كراون بە خۆڕایی و قوتابیان هیچ بڕە پارەیەك نادەن، هەروەها 5 بەشی دیكەش 50% كرێی خوێندنیان كەم كراوەتەوە، هەروەها ئەو قوتابیانەی كە بە پارالێل لە زانكۆییە حكوومییەكان وەرگیراون 45% كرێی خوێندنیان كەم كراوەتەوە، بۆ قوتابیانی ماستەر و دكتۆراش بە هەمان شێوە، چەند پرۆژە و بەرنامەیەكی دیكەشمان لەبەر دەستە و ئەم هەفتەیە رادەگەینین، هەروەها هەندێك رێنمایی بۆ ئەو قوتابیانەی كە لە دكتۆرا و ماستەر دەخوێنن ئامادەكراون، لە ماوەیەكی نزیكدا لەسەر دادەنیشین و ئەو رێنمایانە دەبنە بڕیار، بۆ نموونە پێشتر ئەگەر نمرەی قوتابیەك لە بەكالۆریۆس لە 60 كەمتر بوایە لە ماستەر وەرنەدەگیرا، ئەوەش قوتابی ناچار دەكرد كە بچێتە دەرەوە و پارەیەكی زۆر سەرف بكات تا ماستەر بە دەست دەهێنێت، بەڵام ئێستا ئەگەر نمرەكەی 50 بێت، بەس دەبێت ساڵێك لە دیبلۆمی باڵا بخوێنێت، ئەو كات دیبلۆمی باڵا ئەو نمرەیە بۆ 60 بەرز دەكاتەوە و دەتوانێت لە ماستەر بخوێنێت.
دۆلەمەری، ئەوەشی گوت:" بۆ گەڕاندنەوەی دەرماڵەی قوتابیان دووجار نووسراومان بەرز كردۆتەوە، سەرۆكوەزیران رایگەیاندووە كە دیراسەیەكی تەواو بكرێت كە چەند قوتابی لە بەشە ناوخۆییەكان دەمێنەوە و ئەو بڕە پارەیە چەند لەسەر حكوومەت دەكەوێت، كە ئایا بودجەی 2020 تەحەمولی ئەو بڕە پارەیە دەكات، ئەو كات بڕیار لەسەر دەدرێت، ئێستاش لەگەڵ وەزارەتی خوێندنی باڵا لەسەر خەتین بۆ ئەوەی دەرماڵەی قوتابیان بگەڕێنینەوە.
سەرۆكی لیژنەی پەروەردە و خوێندنی باڵا لە پەرلەمانی كوردستان ئاشكراشی كرد:" پرۆژەی چاكسازی، ئێستا لای حكوومەتە، ئێمەش وەكو فراكسیۆن پێشنیازە یاسایەكمان ئامادە كردبوو بۆ چاكسازی، بەڵام هەر پرۆژە یاسایەك لایەنی دارایی هەبێت، دەبێت بە هەماهەنگی لەگەڵ حكوومەت بێت، پرۆژەكە لایەنی دارایی هەیە، حكوومەت پرۆژەیەكی ئامادەكردووە و بەزووترین كات ئەو پرۆژەیە رەوانەی پەرلەمان دەكات و لەسەر كۆدەبینەوە پەسەند دەكەین و دەبێتە یاسا، گرنگی ئەو پرۆژەیە لەوە دایە كە مووچەی پلە باڵاكان، هەروەها ئەو دەرماڵەی كە دەدرێتە فەرمانبەران، كەم دەكرێتەوە و دەبێتە داهات بۆ حكوومەت، هەروەها خوێندنەوەی دووەم بۆ پرۆژە یاسای زەویە زێدەڕۆییەكان كرا، وەكو پەرلەمان نرخمان بۆ ئەو زەویانە داناوە، ئەوەش هەر پێشنیازی فراكسیۆنی پارتی بووە، بەپێی یاسا هەر زەویەكی دوو سەد مەتری لە سەنتەری پارێزگاكان 15 بۆ 30 هەزار دینار بۆ هەر مەترێك دانراوە، لە سەنتەری قەزاكان بۆ هەر مەترێك 10 بۆ 20 هەزار دینار دانراوە، لە ناحیە و كۆمەڵگەكان 5 بۆ 10 هەزار دانراوە.
عەبدولسەلام دۆلەمەری، سەرۆكی لیژنەی پەروەردە و خوێندنی باڵا لە پەرلەمانی كوردستان ئاشكراشی كرد:" هەر كەسێك كە سەردانی ئێمەی كردبێت یان داواكاری خۆی گەیاند بێتە ئێمە بەدواداچوونمان بۆ كردووە و كێشەی ئەومان چارەسەر كردووە، بۆ نموونە كە سەرۆكایەتی لیژنەی پەروەردە و خوێندنی باڵا دەكەم، بەدواداچوونمان كرد بۆ پرسیارەكانی پۆلی 12 كە زیاتر لە 47 پرسیار هەلە بوون، ئەو مشریفانەی كە هەلەیان كردبوو لابران، قەرەبووی قوتابیانیش كرایەوە، ئەوەی دیكەش چ وەكو فراكسیۆنی پارتی، چ وەكو لیژنەی پەروەردە و خوێندنی باڵا بەدواداچوون بۆ كێشەكانی خەڵك دەكەین و بەپێی پێویست ئەو كێشانە چارەسەر دەكەین".

 

زۆرترین بینراو