ئەو كەسانەی قەرزاری حكوومەتن گەشتكردنیان لێ قەدەغەدەكرێت

ئەو كەسانەی قەرزاری حكوومەتن گەشتكردنیان لێ قەدەغەدەكرێت

 

بەپێی نووسراوێكی بەڕێوەبەرایەتیی گشتیی باجەكان و خانووبەرەی میری هەرێمی كوردستان، ئەو كەسانەی قەرزاری حكوومەتن گەشتكردنیان بۆ دەرەوەی وڵات لێ قەدەخەدەكرێت.

بەڕێوەبەرایەتیی گشتیی باجەكان و خانووبەرەی میری هەرێمی كوردستان نووسراوێكی ئاراستەی سەرجەم بەڕێوەبەرایەتییەكانی باجی دەرامەت و باجی كۆمپانیاكان و گەورە باجدەران كردووە كە ئەوانەی قەرزاری حكوومەتن رێگەیان پێنادرێت گەشتی دەرەوەی هەرێمی كوردستان بكەن.
لە نووسراوەكەدا كە واژووی د.كەمال تەیب قادر، بەڕێوەبەری گشتیی باجەكان و خانووبەرەی میری لە وەزارەتی دارایی لەسەرە هاتووە: ''هاوپێچ لەگەڵ نووسراوماندا دەقی فەرمانی وەزاری ژمارە 9751 لە 28-5-2019، كە لە وەزارەتی ناوخۆ دەرچووە بۆتان دەنێرین كە تایبەتە بە قەدەخەكردنی گەشت لە باجدەری قەرزار، بۆ زانین و گرتنەبەری رێكاریی یاسایی بۆ ئەو كەسانەی قەرزاری باجن".
لە هەرێمی كوردستاندا 39 فەرمانگەی تایبەت بە باج هەن، هەر موڵكە و سەر بە فەرمانگەیەكی تایبەت بە خۆیەتی، دوای كۆكردنەوەی باجەكانیش، داهاتی سەرجەم فەرمانگەكان كۆدەكرێتەوە و دەبرێتە خەزێنەی حكوومەت.
هەركەسێك باجی حكومەت قەرزاربێت، بە سێ قۆناخ ئاگادار دەكرێتەوە، هەر قۆناخێك 21 رۆژ مۆڵەتی لەپێشە، ئەگەر باجەكانی نەدا دواتر حكومەت موڵكەكانی دەفرۆشێت، گەشتكردنیشی بۆ دەرەوەی هەرێمی كوردستان لێ قەدەخە دەكات تاوەكو باجەكانی دەداتەوە.
رۆژی 15-2-2017 سەرۆكایەتیی هەرێمی كوردستان هەنگاوەكانی چاكسازی ئاشكراكرد، كە لە نۆ تەوەر پێكهاتبوو، خاڵی دووەمی تەوەری یەكەم تایبەتكرابوو بە پرسی باج، تێیدا هاتووە، پرۆسەیەكی لێپرسینەوە دەستیپێكردووە، چەند لیژنەیەكی لێكۆڵینەوە پێكهێنراون و، چەند كەسێكیش رەوانەی دادگا كراون، هەروەها گۆڕانكاری كارگێڕی زۆریش كراون. بەهۆی ئەم رێوشوێنانەوە، بە سەتان ملیۆن دینار بۆ خەزێنەی حكومەت گەڕاوەتەوە".

زۆرترین بینراو