بونیادەم لەنێوان قەستەسەر و ئاوازە چێژبەخشەكانی ژیان لەكوێدا ئادەمیەكی خۆشبەختم !؟

لوقمان مەغدید

هەمیشە توانا لۆژیكیەكانمان، وەكوو هەورە بروسكەیەك و بەرقێكی شەبەقدار، شەبەق ئەخۆن و لەهەر ساتێ داوای هێنانەدی خەونەكانمان لێ دەكەن، كەچی زۆر جاریش زەمین ئاسایانە كاڵ ئەبنەوە، بەڵام لەكۆتاییدا ئەبێ هەمیشە بڕوامان وابێ وكار بەم وتە فەلسەفیە بكەین كە (ئەبێ بزانین ئاسان ناگەین بە خەونەكانمان).
هەڵبەتە هەموو مرۆڤێك خەونێك یان ئامانجێكی باڵای هەیە لەژیانیدا، ئەمەش مافێكە كە بەدیهێنەر بە هەموو ئادەمیەكی بەدیهێنراوی داوە، بەڵام سەیر لەوەدایە، كە ئێمە هەمیشە بڕوامان وابێت تانەگەین بەو خەونە یان ئامانجە (ئەو نوقتەیەیە كە هەموو مرۆڤێك لەژیانی خۆیدا دایناوە)، ئیتر ناتوانین چێژ لەژیان وەربگرین، یان بەختەوەر بژین بەمانا ڕاستەقینەكەی، بەڵام لەڕاستیدا بەهەلە داچووین، چونكە ڕاستە دەبێت ئادەمیەكان خاوەنی خەون و خولیاو ئامانجی خۆیان بن لەژیان وزندگی دا، بەڵام نابێت هەرگیز بڕوایان وابێت كە ناگەن بەكامەرانی وخۆشگوزەرانی، تاوەكوو نەگەن بەخودی ئامانجەكانیان، چونكە لەڕاستیدا خۆشبەختی مرۆڤ لەو خۆشی وناخۆشیانەدایە یان لەوبەرزی ونزمیانەدایە كە لەڕێگای سەختی ئامانجەكەدا دێتە پێشیان، نەوەك خودی ئامانجەكانیان.
گابرێل گارسیا ماركیز دەڵێت : (هەموو خەڵكی دەیانویست بگەنە لوتكەی چیاكان، بەلام بێ ئاگا بوون لەوەی، كە ڕازی خۆشبەختی لەگەیشتن بەلوتكەی چیاكان نیە، بەڵكو لەو هەورازو نشێوانەدایە كە پیایا گوزەر ئەكەن)، بێگومان ئەمەش دەگەڕێتەوە بۆ چۆنیەتی تێگەیشتن لەفەلسەفەی ژیان وپەروەردەكردنی ڕۆح و دەرونمان، چونكە ئێمە هێندەی قەرزاری ڕۆحین لەهەمبەر ئەو متمانەی كە پێمان دەبەخشێت، نیو هێند قەرزاری ئەوكەرەسەو مادە فیزیكیانە نین كە لەڕێگای سەختی ژیان بەدەستمان هێناوە، یان بەدەستی دەهێنین، چارلس دیكێنز لەم بارەیەوە جوانی فەرمووە: (هەموومان ئارەزوی شاراوەمان لەژێر سینەدا هەیە، تەنیا پێویستمان بە بارودۆخێكی گونجاو هەیە بۆ دەرخستنیان )، بۆیە گەر گومانیش بكەین لەتواناكانمان، ئەوە مانای ئەوەیە لەژێر زەویەكی لەرزۆك وەستاوین، ڕۆژێك هەر دێت ڕۆدەچین، بەڵام بەم جۆرەی باسم كرد لەكۆتیایدا لەڕێگای ڕاست تێدەگەین و هەر بەم ڕێگایەش دەگەینە چێژ وەرگرتن لە هەورازو نشێوەكان، بەرلەگەیشتن بەلوتكەی چیاكان.

 

بابەتى پەیوەندیدار بیروڕا

زۆرترین بینراو