بەردەوامین لە دابین كردنی كرێی وانەبێژی مامۆستایان

بەردەوامین لە دابین كردنی كرێی وانەبێژی مامۆستایان

دیدار- محەمەد هەسنانی: بەڕێوەبەری پەروەردەی سۆران، لە دیدارێكی زاری كرمانجی ئاشكرای دەكات " دوای رەزامەندی حكومەتی هەرێم، مامەڵەی بەهەمیشەیی كردنی مامۆستایانی گرێبەست دەستی پێكردووەو بۆ دابینكردنی كرێی مامۆستایانی وانەبێژیش هەوڵەكانمان بەردەوامە.
لەبەردەوامی قسەكانیدا م. عەزیز سەعید، بەڕێوەبەری پەروەردەی سۆران، بە زاری كرمانجی راگەیاند " سنوری بەڕێوەبەرایەتیەكەمان سەنتەری قەزای سۆران و ناحیەو گوندەكانی سنوری شاری سۆران لەخۆدەگرێت و زیاتر لە 260 قوتابخانەو باخچەی منداڵان لەسنورەكەمان هەن، لەگەڵ نزیكەی 2400 مامۆستای هەمیشەیی و 374 مامۆستای گرێبەست و 951 مامۆستای وانەبێژ، لەم قوتابخانانە وانەكان دەڵێنەوەو خۆشبەختانە سەرەڕایی ئەوەی شوێنەكەمان بەرفراوانەو هەندێ‌ قوتابخانەمان لەگوندەكانی سنوری ناحیەی سیدەكان نزیكن لەسنورو شوێنەكە سەختە، هەروەها بەشێوەیەكی گشتی لەوەرزی زستان بەفری زۆری لێدەبارێت و ئاستەنگ لەبەردەم هاتووچۆ دروست دەبێت، كەچی خۆشبەختانە پرۆسەی خوێندن لەسنورەكەمان سەركەوتوو بووەو ساڵانە ئاستی زانستی قوتابیانمان باش بووە".
بەڕێوەبەری پەروەردەی سۆران، گووتیشی " بەتایبەت لەمساڵدا بەهۆی بڵاوبوونەوەی ڤایرۆسی كۆرۆنا، لە سنورەكەمان كوردستانیش بەگشتی خوێندن سەخەت بوو، بەڵام سەرەڕایی ئەوەش خۆشبەختانە توانیومانە پابەندی رێنمایەكانی حكومەت و وەزارەتی پەروەردە وەزارەتی تەندروستی بین و مامۆستاو كارمەندان و قوتابیانمان پابەندی رێنمایەكان بكەین، بۆ ئەوەی ئەم كاتانەی قوتابیان بۆ تاقیكردنەوەكان كارەكانیان روو لە قوتابخانەكان دەكەن، دەمامك و دەستەوانەو كەستەكانی خۆپارێزی بەكاربهێنن، هەروەها دەستخۆشی لە تیمەكانی سەربە بەڕێوەبەرایەتی بەرگری شارستانی سۆران دەكەین، كە بەرلە ئەنجامدانی تاقیكردنەوەكانی پۆلی 12 هۆڵی قوتابخانەكانیان بە دەرمانی دژە ڤایرۆس رشاندوەو بەردەوامیش دەبین لەسەر ئەم رێكارانی خۆپارێزی لەپێناو پاراستنی تەندروستی قوتابیان و مامۆستاو كارمەندانمان".
م. عەزیز سەعید، بەڕێوەبەری پەروەردەی سۆران، ئەوەشی خستەروو " بۆ پڕكردنەوەی كەم و كۆڕیەكانی قوتابخانەو خوێندگاكانی سنووری پەروەردەكەمان، لە ساڵی 2013 لەلایەن حكومەت و وەزارەتی پەروەردە 374 مامۆستای گرێبەستمان بۆ دامەزرا، دوای حەوت ساڵ خزمەتكردنیان خۆشبەختانە لەمساڵدا لەلایەن حكومەتی هەرێم رەزامەندی بە هەمیشەیی كردنیان بۆ دەرچوو، وەزارەتی پەروەردەو وەزارەتی دارایی رێكارەكانیان تایبەت بە هەمیشە كردنیان دەست پێكرد، ئێمەش لای خۆمان دەستمان كردووە، بە مامەڵەی بە هەمیشەیی كردنی مامۆستایانی گرێبەست لە سنورەكەمان، ئەوەش هەنگاوێكی باشە بۆ زیاتر بەرەو پێشبردنی ئاستی زانست و زانیاری قوتابیان".
بەڕێوەبەری پەروەردەی سۆران، ئەوەشی ئاشكرا كرد " لەم ساڵانەی دوایدا لە سنوری پەروەردەكەمان زیاتر لە 950 مامۆستامان بەشێوەی مامۆستای وانەبێژ لە قوتابخانەكانی سنورەكەمان داناون و بەپێی تایبەت مەندییەكان دوای پڕكردنەوەی فۆڕم دەست بەكاربوونەو مانگانە بەپێی گووتنەوەی وانەی رۆژانەیان پارەكەیان بۆ هەژمار دەكرێت، هەروەها مامۆستایانی وانەبێژی سنوری پەروەردەی سۆران، پارەی وانەبێژی مانگی دوویان پێدراوەو هەروەها لیستی مانگی 3ی وانەبێژی مامۆستایانیشمان لە گەنجینەی سۆرانەو داوای دابین كردنی پارەی پێویست دەكەین بۆیان، بۆ ئەوەی بەسەر مامۆستایانی وانەبێژ دابەشی بكەین و لەمانگەكانی دیكەش بەردەوامی دەبێت.

زۆرترین بینراو