بەرپرسی بنكەی نشینگەی سۆران: مامەڵەی نشینگە بەسیستەمی ئەلكترۆنی دەكرێت

بەرپرسی بنكەی نشینگەی سۆران: مامەڵەی نشینگە بەسیستەمی ئەلكترۆنی دەكرێت

دیدار-محەمەد هەسنانی:
 بەڕێوەبەری بنكەی نشینگەی سۆران، لە دیدارێكی زاری كرمانجی، دەڵێت" لەگەڵ كردنەوەی ئیدارەی سەربەخۆی سۆران، ئاسانكاری بۆ ئەم هاووڵاتییانە دەكرێت كە بۆ مامەڵەی نشینگە سەردانی شاری هەولێر دەكەن، لەمەودوا سۆران كارتیان پێبدرێت، ئەمەش خەرجی زۆریان بۆ دەگەڕێنێتەوە.
 عەقید عومەر سەدیق، بەڕێوەبەری بنكەی نشینگەی سۆران، بەزاری كرمانجی راگەیاند: "سنووری بنكەكەمان ئیدارەی سەربەخۆی سۆران، واتە هەرچوار قەزاكانی (سۆران، رواندز، مێرگەسۆر، چۆمان) لەخۆدەگرێت، نشینگە دەدرێتە ئەو هاووڵاتییانەی بیانی كە بەمەبەستی مانەوە روو لە هەرێمی كوردستان دەكەن یان پێشتر هاتوونەتە دەڤەرەكەمان، ئەمەش بە كۆمەڵێك یاساو رێكاری نشینگەدا تێپەڕدەبێت و چەند جۆرێكی هەیە لەوانە: نشینگەی كار، بۆ ئەو بیانیانەیە سەردانی هەرێم دەكەن، بۆ مەبەستی كاركردن دەمێنەوە ئەمەش پێویستی بە هەندێك رێكاری یاسایی هەیە".
 لەوانە: رەزامەندی دەزگای ئەمنی، دەبێت ئاسایش لاری نەبوونی خۆی لەسەری بدات و پشتگیری شوێنی دانیشتنی هەبێت و ئاسایش دڵنیای لەسەر هەبێت، هەروەها رەزامەندی وەزارەتی تەندروستی، بە نووسراو ئاراستەی بەڕێوەبەرایەتی تەندروستی دەكەین، لە رووی هەبوونی نەخۆشیە ڤایرۆسی و گوێزراوەكان بۆ ئەوەی لە تەندروستی كەسەكە دڵنیاببینەوە، لە بوونی هەر نەخۆشیەكی گوازراوەی رێگەی نشینگەی پێداربێت، هەروەك چەند كەس بەم هۆیە رەوانە كراونەتەوە، لە هەمانكاتیشدا دەبێت ئەو كەسە رەزامەندی وەزارەتی كاری هەبێت، بۆ ئەمەش پێویستی بە گرێبەستی كار هەیە، كە لەلایەن بەشی دەستەبەری كۆمەڵایەتی سوران بیمە دەكرێت، هاووڵاتی بیانی پێویستی بە مۆڵەتی كاركردن هەیە، لەلایەن هاووڵاتی عێراقی، یان خۆی خاوەنی مۆڵەتی كاركردن بێت، بۆ ئەمەش پێویستی بە پڕكردنەوەی فۆڕمێكە كە لەلایەن وەزارەتەوە دانراوە".
 گووتیشی:"ئەم بەڵگە نامانە هەموویان رێكدەخرێن و بە فایلێك دەنردرێنە بەڕێوەبەرایەتی نشینگەی هەولێر، لەوێ‌ رسوماتی نشینگەی لێوەردەگیرێت و كارتی مانەوەی پێدەدرێت بۆ ماوەی یەك ساڵ، بەڵام وەك ئاسانكاریەك بۆ ئەم هاووڵاتییانەی دێنە هەرێمی كوردستان و بەتایبەت سنوورەكەمان، لەگەڵ كردنەوەی ئیدارەی سەربەخۆی سۆران، بڕیارە ئەم مامەڵانە بكرێن بە سیستەمی ئەلكتڕۆنی و لەشاری سۆران، كارەكانیان بۆ رایی بكرێت، بەمەش ئاسانكاری بۆ ئەم جۆرە كەسانە دروست دەبێت، لە بری ئەوەی سەردانی سەنتەری پارێزگای هەولێر بكەن لەسۆران كارتیان پێبدرێت، ئەمەش خەرجی زۆریان بۆ دەگەڕێنێتەوە".
 ئەوەش دەخاتەروو: "ئەو كەسانەی بیانی كە بەزۆری روومان تێدەكەن زیاتر هاووڵاتی ئێران و توركیان، لەگەڵ هەندێ‌ هاووڵاتی دیكە كە لە زانكۆ و پەیمانگەو قوتابخانەو رێكخراوەكانن".
بەڕێوەبەری بنكەی نشینگەی سۆران، ئاماژەی بەوەشكرد:"خاڵێكی دیكەی گرنگی نشینگەكەمان پرۆسەی هاوسەر گیرییە، بۆ دەرهێنانی نشینگە بۆ نموونە ئەگەر كەسی بیانی هاوسەرگیری لەگەڵ لایەنێكی هەڵگری ناسنامەی عێراقی بكات، چ پیاو بێت یان ئافرەت بێت، لەسەرەتاوە پێویستە لە دادگا گرێبەستی هاوسەرگیری بكرێت، بەمەش پێداویستیانەی دەوێت (گرێبەستی هاوسەرگیری، لاری نەبوونی ئاسایش، دەستەبەری كەسی، پشتگیری دانیشتن، كە لەلایەن بەڕێوەبەرایەتی ئاسایش بۆی كرابێت) ئەم بەڵگە نامانە لەگەڵ نووسراوی ئێمە هاوپێچ دەكرێت و رەوانەی بەڕێوەبەرایەتی نشینگەی هەولێر دەكرێت، دوای رەزامەند بوون لەوێ‌ نشینگەی پێدەدرێت".
 عەقید عومەر سەدیق، بەڕێوەبەری بنكەی نشینگەی سۆران، ئاشكراشی دەكات:"بۆ ئەم جۆرە هاوسەر گیریە تێچوەكەی كەمترە لە كەسانی دیكە بۆ نموونە تەنها ساڵانە 25 هەزار دیناریان لێوەردەگیرێت، بۆ سێ ساڵیش بۆیان نوێ‌ دەكرێتەوە، بەپێی ئامارەكانمان نزیكەی دوو هەزار هاوسەر گیری لەم شێوەیە لە سنوورەكەمان هەیە واتە هاوسەرەكانیان خەڵكی وڵاتێكی دیكەیە".
لەدوا قسەكانیدا بەڕێوەبەری بنكەی نشینگەی سۆران، رایگەیاند: "وەك ئاسانكاریەك بۆ هاووڵاتییان بنكەی نشینگەكەمان لە سەنتەری قەزای سۆران، رۆژانە بۆ رای كردنی ئیش و كارەكانیان هاووڵاتییانی بیانی، هەروەها ئەو كەسانەی هاوسەرگیریان لەگەڵ كەسانی بیانی پێكهێناوە سەردانمان دەكەن، وەك دیاریشە دوای بڵاوبوونەوەی ڤایرۆسی كۆرۆنا هاتنی كرێكاران و هاووڵاتییانی بیانی بۆ دەڤەرەكەمان رووی لەكەمبوونەوە كردووە.

زۆرترین بینراو