بەڕێز نێچیرڤان بارزانی بەلێنی دابوو... بەڕێز مەسرور بارزانی وەرزش لە سۆران لە لوتكەیەو لە ژێر سفرە

جەلال سەعید

 

شاری سۆران وەك هەموو لایەك دەزانن، شارێكی شورشگێرو فیداكارە بۆ كوردستان و بۆ پارتی بەتایبەت، لە ئێستادا یانەی سۆران بۆتە پێناسە و چاوی ئەو شارە، سۆران بەكوردستانی بچووك دەچێت و تێكڕایی پێكهاتەكانی كوردستان بوونیان هەیە، بەخەبات و خوێن بەخشینی رۆڵەكانی لە پێناو پاراستنی خاك و نەتەوە و نیشتمان، پێشەنگە لە كوردستانە، ناز ناوی شاری شەهیدانی بەخۆیەوە بەخشیووە، كەچی هیچ پاڵپشتی و هاوكارییەكی نییەو بێ‌ یاریگایە.
بەرێز سەرۆكی هەرێم لەكاتی بانگەشەی هەڵبژاردنی پەرلەمانی كوردستان لە نێو ئاپۆڕای جەماوەرو لە بەردەمی كاندیدەكاندا بەڵێنی نۆژەنكردنەوەی یاریگای سۆرانت بەشێوەیەكی پێشكەوتوو بە جەماوەر راگەیاند.
دەخوازم ئەو بەڵێنە جوان و گرنگەی بەرێزتان بكەوێتە بواری جێبەجێكردن ئەگەرچی دوا كەوتووە، بۆ ئەوەی گەورەترین سوود بە وەرزش و وەرزشكارانی شاری شەهیدان ببەخشی و لە نەبوونی یاریگاش رزگاریان ببێت.
بەجێ گەیاندنی بەڵێنی نۆژەنكردەنەوەی یاریگای سۆران، جوانترین خزمەت بە گەنج و لاو و وەرزشكاران و كوڕ و براكانی شەهیدانی ئەو شارە دەكەیت.
بەڕێز مەسرور بارزانی سەرۆكی حكومەتی هەرێمی كوردستان، هیچ پڕۆژەو خزمەتكردنێكی شاری سۆران، شاری شەهیدانی پاراستنی خاك و نیشتمان بەقەد نۆژەنكردنەوەی یاریگاكانی سۆران سوود نابەخشی بەتێكڕای دانیشتووانی شار، سەرۆكی حكومەت هیچ خزمەتێك بەگەنج و لاو و وەرزشكارانی ئەو شارە نەكراوە، بەرپرسانی ئەم شارە هیچ بەرنامەو پڕۆژەیەكیان نە لە رابردوو نە لە ئێستا بۆ گەورەترین توێژی كۆمەڵگا نەبووەو نییە.
بەرپرسم لە قسەكردن و ووشاندنی هەموو ئەو توانج و رەخنانەی وشاندومەو دەیوەشێنم...
بەرپرسانی ئەم شارە پێویستە لێپێچینەوەو رووبەرووی دادگا بكرێنەوە لە بەرامبەر پشتگوێ خستن و گرنگی پێ نەدان بە وەرزش و لاو و گەنجەكانی.
بەرپرسانی شار زیاتر لە 15 ساڵە هیچ باكیان بە وەرزش و وەرشكاران و لاوەكانی شاری هەڵگری نازناوی شەهیدان نییە و نەبووە.
شارێك خاوەنی زۆرترین گەنج و لاو و وەرزشكارو بەهرەمەندی هەمە جۆری بوارەكان بێت، ئەمە دۆخەكەی بێت، بەڕاستی گوناهە.
بەرپرسانیشی لە لوتكەی كەمتر خەمی و گوێ پێ نەدانی بە داواكارییەكانیان بن، پێموایە جگە لە دادگایی كردنیان هیچ بیانو شتێكی تریان شایان نییە، شارێك خاوەنی زیاتر لە 200 هەزار كەس بێت و یاریگاو هۆڵێكی وەرزشی نەبێت.
لەكاتێكدا وەرزش و جوانی لەم شاردا بوونی هەیە، لە لوتكەی پێشكەوتنی مرۆییە، كەچی لەبێ یاریگاو هۆڵ و شوێنی ئەنجامدانی وەرزش لە ژێر سفرە.
نەبوونی یاریگا و هۆڵی داخراو بۆ بەڕێوەچوونی یارییەكانی فەرمی و ئەنجامدانی مەشق و راهێنان كۆسپێكی گەورەی یانەی سۆران و ورزشكارانی شارەكەیە، بۆ ئاوەدانكردنەوە و خزمەتێكی بچووك بە وەرزش و وەرزشكارانی شاری شەهیدان، تێكرای شارەكە چاوەڕێی بڕیارێكی ئێوەیە بۆ رزگاربوونی لە بێ‌ یاریگایی و هۆڵ و ئەنجامدانی یارییەكان.
سۆران مەیدانی یاری مێرو و فیلەكان، كاتێك ویژدان و دادەپەروەری نامێنێت و دادگاش لەخەودا بێت، ئەو كاتەیە لە سۆران ژیانی تێدا گوزەر دەكرێت، ئەو كاتەیە ویژدان و دادپەروەری لە رۆژگاری ئەمڕۆی سۆران بۆتە كرین و فرۆشتنی بەر دەستی هەندێ‌ كەسانی بێ‌ ویژدان و بێ باك لە بەرپرسیاری.
سۆران مەیدانی یاری نێوان فیل و مێرووڵەكانی لێهاتووە، بڕیار دەدرێت یارییەكی تۆپی پێ‌ لە نێوان فیل و مێروولەكان ئەنجام بدرێت، خاوەن براوەی یارییەكەش خەڵات بكرێت، لەكاتی بەڕێوەچوونی چەند خولەكێك لە یارییەكە، هەموو یاریزانانی فیل گۆڕەپانی یاری بەجێ‌ دێلن.
ناوبژیوانی یارییەكە بەرەو ڕوویان دەچێت بۆ ئەوەی بزانی گۆڕەپانی یاریگاو یارییەكەیان بۆ جێهێشت...
تێكڕای یاریزانە فیلەكان دەڵێن: ئێمە ناتوانین یاری تەواو بكەین چونكە مێروولەكان بە دژواری (لێدان، خشونە) یاری دەكەن‌ و ئێمەیان تووشی پێكان كرد.
ئەمە وەك ئەو پەندە وایە (تاكو خاوەن ماڵ دزی گرت، دز خاوەن ماڵ دەگرێت)دراوسێیەكانیش ڕاو دەنێت و ترس و دڵە ڕاوكێش بۆ هەموو لایەك و دەورووبەریش دروست دەكات.
ئەمەی ئێستا لە سۆران هەیەو لە رابردووش گوزەری كردووە بەتایبەت لەبواری وەرزش رێك وەك یاری فیل و مێرولەكانە، خۆیان فیل و خەڵكیش مێرولەیە، هەر كاتێكیش بەدڵیان نەبووی، تۆمەتباری خراپەكاریت پێ دەبەخشن.
دەبێ‌ ئەوانە بزانن گەورەی و جوانی و لوتكەی پارتی لە بوونی كەلتوور و فەرهەنگی نەتەوەی و نیشتمانی و ئاوەدانكردنەوەو خۆشگوزەرانی و خزمەتكردنە.

 

بابەتى پەیوەندیدار بیروڕا

زۆرترین بینراو