بەڵێن تۆفیق: خولیای نووسینی لە بواری ژانرە ئەدەبییەكاندا هەیە

بەڵێن تۆفیق: خولیای نووسینی لە بواری ژانرە ئەدەبییەكاندا هەیە

دیمانە: پشتیوان كەریم – هەولێر
لەپاڵ كاری مامۆستایەتی بەڵێن تۆفیق خولیا و حەزی زۆری لە شیعر نووسین و رۆمان نووسینە, لەپاڵ ئەم كارە پیرۆزانە حەزی زۆری لە شاخەوانییە .
بەڵێن تۆفیق لەدایك بووی ساڵی 1971 لە گوندی كانی كوردەی سەر بە قەزای كۆیە, خێزاندارە خاوەنی كچێك و دوو كوڕە مامۆستای بنەڕەتییە لەهەولێرو لەوێش نیشتەجێییە.
*شیعر لای تۆ چی دەگەیێنێت ؟
- شیعر لای من پەیامێكی ویژدانی و رۆحییە, لە ناخمدا سەرهەڵدەدات دەمەوێت بیگەیێنم بەسەرجەم چین و تووێژەكانی كۆمەڵگە, لەرێگای ئەم پەیامەوە دەمەوێت بە هەمووان بڵێم ئەگەر جوانییەكانی ژیان نەشارنەوە دەكرێ دونیاش بەهەشت بێت.
*لەكەیەوە ئاشنای شعر نوسین بوویت, ناوەڕۆكی شیعرەكانت دەلالەت لەچی دەكەن؟
- هەرلە قۆناغی خوێندی سەرەتاییەوە لەسەرەتا و ناوەڕاستی هەشتاكانەوە ئارەزووی شیعرم تێدا دەركەوت لە سەرەتای نەوەدەكانەوە توانیم شیعری خۆم پەسەند بكەم و ئازادیان بكەم، من خۆناسینم دەگەرێتەوە بۆ سەردەمی چەوسانەوەی نەتەوەیی و داگیركاری نیشتیمانی و هەر بە هەستی نەتەوەیی و نیشتیمانی هاتمە نێو دونیای ئەدەبی, خۆشەویستیش وەك هەوێنی هەموو ژانێكی ئەدەبی نەیهێشت بكەوم .
*لەشیعرەكانتدا تۆ تەنها خەیاڵ دەنووسیییەوە یان راستی ژیانی خۆت ؟
- بۆهەر شاعێرێك خەیاڵ و راستی دوو كەسەری بەرجەستەن كە كاریان لەسەر دەكات, هەندێكجار راستی دەخەینە روو بۆ ئەوەی بگۆڕێین یاخود بۆ ئەوەی بەردەوام بین, هەندێك جاریش خەیاڵ دەنووسینەوە, بێگومان لەم ناوەدا ژیانی منیش بەردەوام لە راستی و خەیاڵیدایە.
*تا ئێستا خاوەنی چەند كتێبی؟ بابەتی كتێبەكانت چین؟
-من خاوەنی حەفت كتێبم لەوانە دوو دیوانی شیعرە و دوو رۆمان و سێ كتێبیش گەشەپێدانی مرۆین, كۆتا بەرهەمم لە ئێستادا بەناوی نۆ وانەیە كە هەرئەمساڵ چاپكراوە.
*لەدوای شیعر چی وای كردووە رۆمانیش بنوسی؟
-ژانی رۆمان و گەشە پێدانی مرۆیی بەشێكن لە خولیاو تێڕوانینە ئەدەبی و پەروەردەییەكانی من لەدوای شیعر, رەنگە پەیوەندی بەوەوە هەبێت كە بەتەنیا ژانێكی ئەدەبی وەك شیعر یاخود وەك رۆمان یان بوارەكانی پەروەردەین, بەتەنیا ئارەزووەكانی منیان تێر نەكردبێت, هەمیشە هەوڵمداوە لە پانتاییەكی فراوانتر بجوڵێمەوە تاكو بتوانم تەواوی تواناكانم نیشان بدەم.
*كێ بەرهەمەكانی تۆ لە ئەستۆ دەگرێت؟
-گەرمەبەستت چاپكردن بێت ئەوا دیارە بەسوپاسەوە عبدولواحید حسێن برادۆستی وەك هاوڕێیەكی خۆشەویست و وەك سپۆنسەر چاپكردنی بەرهەمەكانی منی لە ئەستۆ گرتووە.
*كێ پاڵپشتی كارەكانتە لە ماڵەوە؟
-كاڵێی كچم و كۆڕەكی كورم نووسینەكانم تایپ دەكەن و هاوسەرەكەشم هەرچەندە خوێنەر نییە, بەڵام هەر ئەوەی كەزۆر سەرقاڵم كێشەم بۆ دروست ناكات, خۆی لە خۆی دا هاوكارییەكی گرنگە.
رۆمانی گیانی من هاتیەوە دەنگدانەوەیەكی باشی هەبوو, تائەو جێگاییەی زانیومە لەكۆلێژی پەروەردەی كۆیە وەك سەرچاوەی توێژینەوەی دەرچوون بەحس تەخەرووج پەسەند كراوە لەساڵی خوێندنی 2016
*پێت وایە هۆكارەكەی بۆچی دەگەڕێتەوە ؟
-ئەو رۆمانە رۆمانێكی كلتوری بووە, ئاوێنەی ژیانی كۆمەڵگەی ئێمە بوو, رووی راستەقینەی ژیانی پڕ لە چەوسانەوە و نەهامەتی زۆرێك لە گەلی ئێمەی دەرخستووە, خوێنەران خۆیان لەنێودا دەدۆزیەوە و پێی سەرسام بوون, هۆكارێكی تر ئەوەبوو كە ئێمە ئێستاش سەرگەرمی ئەو كلتورە دواكەوتوو و پڕ لە راپەرین و نادادی كۆمەڵایەتین و بەجێمان نەهێشتووە.
*جگە لە كاری نوسین گرینگی بە شاخەوانی دەدەن , ئەمە چۆن روویدا لە ژیانت؟
-بەپێی ئەوەی من لە لادێ چاوم بە دونیا هەڵناوە شارەزایم لە ژینگەو كاروبارەكانی لادێ نشینە, ئەوە وایكردووە ئارەزوویەكی زیاترم بۆ ژینگە دۆستی و شاخەوانی هەبێت, شاخەوانی جگە لەوەی كە بۆ من ئارەزوویەكی سروشت دۆستانەیە, وەرزشێكە جەستەو دەروونم سوودی لێ دەبینن.
* لە ژیانی خۆت رازیت گەر رازی نیت هۆكار چییە ؟
-نا نەخێر, پێم وایە زۆر دەرفەتی ژیان و پێشكەوتنم لە دەست چووە ئەوەش هەمیشە ئازارم دەدات, چونكە هیچ دەرفەتێك كە دەڕوات وەك خۆی بۆت ناگەڕێتەوە كاتیش لەسەرت ناوەستێت.


 

زۆرترین بینراو