تۆڕە كۆمەڵایەتییەكان یان تۆڕەكانی جنێودان

دلاوەر محەمەد

ئەوەی دەبینم هاووڵاتیان لە تۆڕەكۆمەڵایەتییەكان سووكایەتی و تەشهیر بە سەركردەكان و یەكتر شكاندن دەكەن شتێكی زۆر هەڵەیە .
چونكە ووڵات ئەوها پێش ناكەوێت، دڵنیابە تا خۆت فێرە ئینتیما و خۆشەویستی وڵات نەكەی هەنگاو بۆ پێكەوتنی نیشتمان ناهاوێژی، سەیری وڵاتان بكەن بزانن ئەم بەزم و رەزمەی هەندێك لە هاووڵاتییانی كوردستان لە تۆڕەكۆمەڵایەتییەكان دەكەن كێ وادەكات یاخود كی وای كردووە.
نابێ ئێمە ئەم نەوەیەی ئێستا پێ رادەگات و بەرپرسیارییەتی دوارۆژی كۆمەڵگەیان لە ئەستۆ دایە فێرە جنێو دان بكەین، پێویستە هەر یەك لە ئێمە لەماڵی خۆی بیر لە پەروەردەیەكی جوانی منداڵەكانمان بكەینەوە.
هیچ شتێك بە جنێودان چارەسەر نابێ هەندێك كەس وای لەم خەڵكە كردووە ئەگەر حكومەت هەمووشتیان بۆ دابین بكات هەر رازی نین، چونكە وافێر كراون واش لێ راهاتوون.
هیچ وڵاتێك و نەتەوەیەك بە سووكایەتی پێ كردن و تەشهیر و ناوزراندنی یەكتر و نەهێشتنی پیرۆزییەكانی گشتی سەركەوتوو نەبووە و پێشنەكەوتووە، دەشێ رەخنەمان هەبێ، تێبینیمان هەبێ، لە شێوازی بەڕێوەبردن سەرنجمان هەبێ، هەمووشمان ئازادین لە رەخنە كردن و خستنەرووی چارەسەری و بۆچوونەكانمان، كەسیش لەسەر ئەم بابەتە نەگیراوە نەسەركوونە كراوە، دەشێ رقت لە حزبێك، گرووپێك و كەسێك ببێتەوە بەلام هیچ گونجاو نییە دەستبەرداری نیشتمان و پیرۆزییەكانی نیشتمان بیت، واتە یەكتر سووك كردن و شكاندنی ئەوی دیكەی جیاواز هیچ سوودی نییە، تەنها نانەوەی توێ دووبەرەكییە.
پێویستە هەموومان بە شێوازێكی مەدەنیانەو دڵسۆزانە كەم كورتییەكانمان لە هەموو بوارەكانەوە بدەینە لایەنی پەیوەندیدار بۆ چارەسەری نەك بۆ روخاندن و پەلكێش كردنی دوژمنان، ناشێ رێگبدەین بە قسەی هەندێك خەڵك دژی ئەم دۆخە بوەستین كە هیچ سوودێكی نەتەوایەتی و نیشتمانی نیە، تەنها سوودی كاتی بۆ ئاژاوە گێرەكان تێدایە.
دڵنیام ئەوەی رۆژێك لەپێناو ئەم وڵاتە ماندوو بوونی بینی بێت، قەت دژی وڵاتی خۆی نابیت، ئەوەی هیچیشی نە كردبێ هاتۆتە سەر حازری، ئەگەر ئەم دەستكەوت و قەوارە سیاسییەش تێك بچێ كە بەرهەمی ماندوو بوونی دەیان ساڵ لە خەبات و قوربانی دانە نەتەوەی كوردە بەلایەوە گرنگ نییە، چونكە پێوە ماندوو نەبووە،
بۆیە ئیتر كاتی ئەوە هاتووە لە جیاتی یەكتر شكاندن یەكتر قبولكردن، لە جیاتی جنێودان رێز، لە جیاتی سووكایەتی خۆشەویستی، لە جیاتی هەڕەشە پێكەوە ژیان بكەینە بنەمای پێكەوە ژیان لە نیشتمانێك كە هی هەموومانە.

زۆرترین بینراو