تینا بە نێو سەدان ئازار و رەخنەی كۆمەڵگە تێپەریوە

تینا بە نێو سەدان ئازار و رەخنەی كۆمەڵگە تێپەریوە

محەمەد ئامۆكەیی- دەربەندیخان: شێوەكار ئەوین حەیدەر ناسراو بە تینا قەلەندەری تەمەن ٢٣ ساڵ و، دانیشتووی دەربەندیخانە، وەك ئافرەتێكی بزۆز لە چالاكییەكانی ناوچەكە بەشداری بەرچاوی هەیە، لە دیدارێكی زاری كرمانجی دا باس لە كاری شێوەكاری خۆی دەكات"وێنە كێشان یەكێكە لەو فاكتەرە بەهێزانەی كەتەنها شێوەكار ٪‏١٠٠ ئەو جوانییە بەدی دەكات، كاتێك بەشەقامێك بە پاركێك یاخود خوێندنگەیەك تێدەپەڕین دەبینین ئەو جێگایە بە تابلۆیەك رازاوەتەوە دڵمان بۆخۆی رادەكێشێت، شێوەكار مەبەستی لەو تابلۆیە كە لەو جێگا گشتیانەدا دروست دەكات دوو شتە یەكەمیان دڵخۆشكردنی گەشتیاران و بینەران و دووەم گەیاندنی پەیامێكی دیاریكراوی خۆیەتی كە تەعبیر لە هزر و ناخی ئەو دەكات و لە رێگەی هونەری وینەكێشانەوە ئەوجوانیانەی دەبینێت لە پەرەیەكی بچوكدا دەنەخشینێ، ئێمەی شێوەكار هەوڵ ئەدەین فۆتۆكۆپی كەمبكەینەوە و بەشێوەی سادەو شێوەكاری وێنەی مرۆڤەكان و سروشت بنەخشێنین."
تینای شێوەكار خەونەكانی زۆرن هەروەكو باسی دەكات"یەكێك لەخەونەكانم گەیشتن بوو بە پەیمانگەی هونەرە جوانەكان، بەداخەوە نەمتوانی بەدەستی بهێنم"، ئەوەش دەڵێ‌"لە منداڵیەوە حەزم لە كاری هونەری شێوەكاری بووەو هاورێیانم سەرقاڵی یاریكردن بوون، كەچی من لە شەقام و ماڵی خۆمان سەرقالی وێنەكێشان و خوێندن بووم، بە كتێبخانەیەكدا تێدەپەریم یاخود رەنگەكانم دەبینی زۆر دڵخۆش دەبووم، ئاواتم بوو تاكو ئێستاش كە ماڵێك پراوپر بكەم لە كتێب و لە تابلۆكانم، خۆش بەختانە برەوم بە خەونەكانم دابوو بە سەدان ئازار و رەخنەو قسەی كۆمەڵگە تێپەریوم تاكوو گەیشتوم بەم رۆژە، راستە پەیمانگام نەخویندوە بەڵام خودی خۆم بەهرەیكی خودایم هەیە بەو بۆنەوە سەركەوتوو بوومە لە كارەكەمدا".
خانمە شێوەكار تینا قەلەندەری گلەیی هەیە كە وەك پێویست لە كوردستان بایەخ بە هونەر بە گشتی نەدراوە و گووتی" بەشێوەیەكی پێویست گرنگی بەهونەری شێوەكاری نەدراوە، راستە شێوەكاری لێزانی دەوێت، بەڵام دەبێت جێگایەكی وا بڕەخسێت بۆ شێوەكاران كە بتوانن رۆژانە كارەكانیان تیدا ئەنجام بەن، ئێستا لە وڵاتانی دیكە یەكێك لەو شتانەی گرنگی پێ ئەدەن شێوەكارییە كە دەبینین سەدان سەنتەر و شوێنی تایبەت و چەندین كەل و پەلی باش هەن، لە كوردستان نە جێگەیەك هەیە نە پاڵپشتییەك بەدی دەكرێت، لە وڵاتان كە شێوەكارێك پێشانگایەك دەكاتەوە سەدان دەستخۆشی و پاڵپشتی هەیە و لای خۆمان وەك ئەوەی پاڵپشت و دەست خۆشیمان نیە، رەخنە و قسەی كۆمەڵگەشمان دێتە سەر".
لە دوا قسەكانیشی دا تینا قەلەندەری باس لە پرۆژیەكی ژینگەی دەكات كە لە رێگەی هونەرەكەیەوە ئەنجامی داوە و رایگەیاند"یەكێك لە كارەكانم ئەوەبوو كە پرۆژەیەكی ژینگە دۆستی و خزمەت بە شار دروست بكەم، خۆشبەختانە بیرۆكەی خۆم بووە لەگەڵ چەند هاورێ و هاوپیشەم ستافێكمان پێكهێناوە لەرابردو لە ئێستاش هەوڵمانداوە دیمەنی شار و چەندین جێگا بە هونەری شێوەكاری برازێنینەوە، لە بەرنامەم دایە لەداهاتودا لەگەڵ ئەو ستافە و كەسانی مرۆڤ دۆست و ژینگە دۆستی ماندونەناس بهێنمە كایەوە پێكەوە هەوڵ بەین كاری ژینگەی وەكاری خێر خوازی و چەندین كاری دیكە بكەین بۆ خزمەت بەناوخۆی شاری دەربەندیخان بە جۆرێك كاتیك گەشتیار روو لەم شارە بكات كە دەرواتە پاركێك یاخود جێگایەكی گشتی بەتابلۆكانمان بە خاوێنی شارەكەمان سەرسام بێت ئێمە دەبێ دەست لەنێو دەست هەولی جوانی و باشی شارمان بەین."

 

 

 

زۆرترین بینراو