جولەكانی داعش زیاتر بووە و چاوەرێی زیاتریش دەكرێت

جولەكانی داعش زیاتر بووە و چاوەرێی زیاتریش دەكرێت

ماڵپەڕی بەشی كوردی دەنگی ئەمریكا
تادێت داعش هێرشەكانی بۆ سەر هێزە عێراقییەكان چڕتر دەكاتەوە، بەتایبەت شەوی ڕابردوو، لە چەندین ناوچە، هێرشی فراوانیان ئەنجامداوە، هێزە عێراقیەكان پێشبینی هێرشی زیاتر دەكەن و خراونەتە حاڵەتی ئامادەباشیەوە.
شەوی ڕابردوو، داعش لە پارێزگاكانی دیالە، ئەنبار، سنوری كەركوك و سەڵاحەدین، هێرشی یەك لەدوای یەكیان كردۆتە سەر هێزە عێراقیەكان، بەهۆی هێرشەكانیانەوە ژمارەیەك سەرباز كوژراون و برینداربوون.
هێزە عێراقیەكان لەتەواوی ناوچە كێشە لەسەرەكان، خۆیان بۆ بەرەنگاربوونەوەی هێرشی زیاتری داعش ئامادەكردووە، كە پێشبینی دەكرێت لە ڕۆژانی داهاتوودا هێرشەكانیان چڕتر بكەنەوە.
ئیسماعیل حەدیدی كەسایەتی عەرەبی سونە لەكەركوك، هۆكاری هێرشەكانی داعش بۆ كشانەوەی هێزەكانی هاوپەیمانان و نەمانی چاودێری فڕۆكە لەسەریان دەگێڕێتەوە، دەڵێت "ئێستا مانگی ڕەمەزانە، داعش ئەم مانگە بە مانگی جیهاد ناو دەبات، ئینجا دۆخی عێراق ئاڵۆزە و لەبارە بۆ هێرشەكانیان."
زۆرترین هێرشەكانی شەوی ڕابردووی داعش، پارێزگای دیالەیان گرتەوە، پەلاماری ناوچەكانی نەفتخانە و نەدای نزیك ناحیەی مەندەلی، سنوری ناحیەكانی جەلەولاو قەرەتەپە ، هەروەها ناوچەی عوزێمیشیان داوە و چەندین سەربازیان كوشتووە و برینداركردووە.
هەروەها لە ناوچەی جورف سەخر، لەگەڵ پارێزگای سەلاحەدینیش هێرشیان ئەنجامداوە، لەسنوری كەركوكیش جوڵەیان هەبووە و هێزە عێراقیەكان لە ئامادەباشیدا بوون.
سەرچاوەیەكی ئەمنی كە لەنێو تیمی هێزە عێراقیەكاندایە بۆ چاودێری كردنی جم و جۆڵی داعش، بەدەنگی ئەمەریكای وت"چڕكردنەوەی هێرشەكانی داعش لە پاریزگای دیالە پلانە، ڕەنگە داعش بیەوێ چاوی هێزە ئەمنیەكان بباتە سەر ئەو پارێزگایە و لەناوچەی ترەوە هێرش بكات."

سەرچاوەكەی دەنگی ئەمەریكا، ڕوونیكردەوە داعش لەمانگی ڕەمەزان دا، " غەزوەتول مەوت " ی ڕاگەیاندووە، دەیەوێ زۆرترین هێرش ئەنجام بدات، وتی"ژمارەیەك خۆكوژیان ئامادە كردووە، خۆكوژەكان لەسەربازگەی عائیشە لەپارێزگای دیالەوە ڕەوانەی ناوچە جیاجیاكان كراون."
سەرچاوەكە، وتیشی"پلانیان داڕشتووە لەچەند شەوی داهاتوودا، هێرش بكەنە سەر چەند قەزاو ناحیەیەكی پارێزگای سەلاحەدین، هێزە ئەمنیەكان چاودێریان دەكەن."

ناوچەی پەڵكانە و شاخی غەڕەی نزیك قەزای خورماتووی پارێزگای سەڵاحەدین، یەكێكی ترە لە پێگەكانی داعش، كە ڕۆژی یەكشەمە، مەفرەزەیەك چەداریان لەو ناوچەیەوە ڕۆیشتوونەتە سەر شەقامی نێوان كفری/ خورماتوو، شۆفڵێكیان لەنێو كارگەیەكی چەو و لم دا بردووە، داوای 80 هەزار دۆلاریشیان لەخاوەنی كارگەكە كردووە.

بەپێی ئەو زانیاریانەی دەست هێزە ئەمنیەكان كەوتوون، داعش خۆی ڕێكخستووەتەوە، بەشێوەیەك بۆ هەر ناوچەیەك هێزی تایبەتی داناوە، لەنێو هێزەكەدا خەڵكی ناوچەكە و شارەزای جوگرافیای ناوچەكەی تێدایە.

زانیاری دەزگا ئەمنیەكان ئاماژەبەوەدەكەن، داعش كەسێكی داناوە بەسەرپەرشتیاری گشتی پارێزگاكانی كەركوك، دیالە، سەڵاحەدین و باكوری بەغدا،ناوی عەبدوڵا مەكی ( تەمەن 29ساڵ) ناسراو بە ئەبوخەدیجە، لەبنەڕەتدا خەڵكی گوندی رەفیعات ی ناوچەی بەلەدە.

هەروەها كەسێك بە ناوی ( عومەر مەحمود عەزاوی) ناسراو بە ئەبو نوح، تازە بە والی پارێزگای دیالە دانراوە، كەسێكی تر بەناوی ( فراس هادی حمود زەیج) ناسراو بە ئەبو غەزرا، وەكو سەرپەرشتیاری بەشێك لە هێزەكانی كەركوك دەست بەكاربووە.

محەمەد عومەر بەرپرسی كۆمیتەی ناوچەی قەرەتەپەی پارێزگای دیالە، بەدەنگی ئەمەریكای وت"پێشبینی دەكرێت داعش هێرشی زیاتر ئەنجام بدات، چونكە خەڵكی ناوچەكە دەڵێن: ژمارەیان زۆر زیادیكردووە."

بەڕای چاودێران، بەشێكی گرنگی هۆكاری زیندوو بوونەوەی داعش پەیوەندی بەدۆخی ئاڵۆزی سیاسی عێراقەوە هەیە، بەتایبەت گەر حكومەت پێكنەهێنرێت و ناكۆكیەكان بەردەوام بن، پێشبینی ئاڵۆزی زیاتر دەكەن.

زۆرترین بینراو