خاوەنی ئارایشگایەك لە سۆران هەلی كار بۆ ئافرەتان دەڕەخسێنێت

خاوەنی ئارایشگایەك لە سۆران هەلی كار بۆ ئافرەتان دەڕەخسێنێت

راهێنەر و خاوەن ئارایشگایەك لە شاری سۆران، لە رێگەی كردنەوەی خولی جۆراوجۆر ئافرەتان فێری كاری ئارایشگا دەكات و دەشڵێت: "بەهیوام لە جیاتی ئەوەی خەڵكی وڵاتانی دیكە لێرە كاری ئارایشگا بكەن، ئافرەتان و گەنجانی ئێمە فێری ئەو كارو پیشانە بن و هەلی كاریان بۆ بڕەخسێت".
درەخشان مستەفا، راهێنەر و شارەزا لەبواری ئارایشگا، بەزاری كرمانجی راگەیاند: "هەر كەسەو خواست و ئارەزووی كار و پیشەیەكی هەیە، منیش هەستم كرد ئەو بەهرەو توانایەم هەیە، كاری ئارایشگا بكەم بەمەش زیاتر لە سێ‌ ساڵە ئارایشگام داناوەو لەسەری بەردەوامم، جگەلەوەش هەوڵمداوە لەرێگەی كردنەوەی خولی جۆراوجۆر، ئەو پیشەیە فێری ئافرەتان بكەم، بۆ ئەوەی ببێتە هاندەرێك تا بتوانن بۆ خۆیان هەلی كار بڕەخسێنن و هاوشێوەی ئێمە دوكان و شوێنی ئارایشگا بكەنەوە، بەتایبەتیش بایەخی زۆر بەو ئافرەتانە دەدەم، كە هەژارو كەمدەرامەتن یا هیچ بڕوانامەیەكیان نییە تا كاری خۆیان بدۆزنەوە و بتوانن داهاتێك بۆ خۆیان و خێزانەكانیان دابین بكەن".
 ئەم ئافرەتە دەستڕەنگینە گووتیشی: " زیاتر لە رێگەی تەكنەلۆجیا فێری كاری ئارایشگا بوومە، بە سەیر كردنی ئەو ڤیدیۆ و وێنانەی تایبەت بە كاری جوانكاری و رازاندنەوەی ئافرەتان، بەمەش چەندین خولم بۆ ئافرەتان كردوونەتەوەو لەسەریشی بەردەوام دەبم، بەهیوام زیاتر هەلی كار بۆ ئافرەت و گەنجانی ناوخۆیمان بڕەخسێت و چیتر خەڵكی وڵاتانی بیانی نەهێندرێنە كوردستان و دەڤەرەكەمان بۆ ئەنجامدانی ئەم جۆرە كارانە، چونكە زۆرجار گەنجان و ئافرەتان گلەیی ئەوە دەكەن، گوایە بەهۆی نەبوونی كار ناچارن وڵات بەجێ‌ بهێڵن، پێموانییە ئەوە چارەسەر بێت، بەڵكو پێویستە باوەڕی تەواومان بەخۆمان بێت و لێرەوە بەدوای ئیش و كار بگەڕێن و بە دەستڕەنگینی و كارە جوانەكانمان بتوانین شوێنی خۆمان بكەینەوەو هەلی كارمان بۆ بڕەخسێت".
درەخشان مستەفا رواندزی، ئەوەش دەخاتەڕوو: " ئێستا لەسەر بەڕێوەبەردنی خولی ئارایشگا بەردەوامین بە هاوكاری خاتوو خەڵات بەڕێوەبەری وەرزش و لاوانی سۆران و رێكخراوێكی نێودەوڵەتی چەند خولێكمان كردۆتەوە، دوای تەواوبوونی ئەم خولانەش بەبێ‌ ئەم رێكخراوە نێودەوڵەتییە چەند خولێكی دیكەی ئارایشگا بۆ ئافرەتانی سنوورەكەمان دەكەینەوە، هەروەها لە بیرۆكەشماندایە خولی ئارایشگە بۆ كوڕانیش بكەینەوە، هەروەك لە هەولێر و سلێمانی و چەند شارێكی دیكەی كوردستان پیاوان شان بەشانی ئافرەتان لە ئارایشگاكان كاردەكەن، لەگەڵ كردنەوەی هەر خولێكیش راهێنەر و كەسانی شارەزا داوەتی ناوخولەكان دەكەین بۆ ئەوەی سمیناریان پێشكەش بكەن".
ئاماژەی بەوەشكرد: "هەرچەندە لەم چەند ساڵەی رابردوو بەهۆی قەیرانی دارایی و بڵاوبوونەوەی ڤایرۆسی كۆرۆنا، كەمتر ئافرەتان روویان لە ئارایشگەكان دەكرد، بەڵام خۆشبەختانە لە ئێستادا بارودۆخەكە روو لە باشبوونە، بەمەش مووشتەریمان زیاتر بووەو بەردەوامیش ئافرەتان ئارایشگا دەكەنەوە، ئەمەش هەلی كاری بۆ چەندین كچ و ئافرەت رەخساندووە لە ئارایشگەكان كاردەكەن".
 ئافرەتان گلەیی لە گرانی نرخی ئاراشگاكان دەكەن، درەخشان مستەفا رواندزی بۆ ئەم بابەتە دەڵێت :" نرخ لە ئارایشگایەك بۆ یەكێكی تر جیاوازی هەیە، لەگەڵ ئەوەشدا بەپێی ئەو پێكهاتەو مكیاج و ئامێرانەی جوانكاری گۆڕانكاری بەسەر نرخەكان دادێت، چونكە هەندێ‌ك لەو پێداویستیانە نرخەكانیان گرانە، بەمەش نرخەكانیان گرانترەو پارەی زیاتر لە موشتەرییەكان وەردەگرن، بەڵام ئەوەی لەهەمووی گرنگتر دەگەڕێتەوە سەر ویژدانی خاوەن ئارایشگاكان، خۆم ئەو شتانەم لەبەرچاو گرتووە، بۆیە موشتەری بەردەوامم هەیە".
سەبارەت بە تاتۆكردن و بەكارهێنانی مەترسییەكانی دەرزی لە كەسێك بۆ كەسێكی دیكە، ئەم خاوەن ئارایشگایە دەڵێت: "بەشێوەیەكی گشتی تاتۆكردن بە باش نازانم لەوانەیە مەترسیداریش بێت لەسەر كەسەكان، بەڵام سرووشتی هەندێك كەس وایە دەستكاری دەم و چاو و جەستەی خۆی دەكات، بۆ نموونە ئافرەت هەیە چاو و برۆیی جوانی هەیە داوا دەكات برۆكانی لابەرن و ئەوەی دیكە بە جوانكاری بۆی دابنێن، یان دەرزی بۆ روخساری بەكار دەهێنێت، یان جوانكاری دیكەیە...هتد".   

زۆرترین بینراو