خاوەن ساڵۆنەكانیش زیانیان بەركەوتووە

خاوەن ساڵۆنەكانیش زیانیان بەركەوتووە

 


ئا: شەهلا رەشید


كۆرۆنا بەردەوامە لە راگرتنی ژیانی رۆژانەی خەڵك و كارە جیاوازەكان بۆ دابین كردنی بژێوی ژیان، جوانكارییەكان بەشێكی ترن لەو شوێنانەی داخراون و خاوەن و كارمەندەكانیان لە ئێستادا بێكار ماونەتەوە، ناتوانن دەربچن و شوێنەكانیان بكەنەوە بۆ كاركردن، ئەمە جگە لەوەی ئەو خاوەن جوانكارییانەی كرێچین زیانێكی زۆرتریان بەركەوتووە بە هۆی داخستنی شوێنەكانیان و كار نەكردنیان لەم ماوەیەدا، زۆرێك لەوانەی لە ئارایشگە و سەنتەرەكانی جوانكاری كار دەكەن بژێوی ژیانیان لەسەر ئەم كارەیە و لە ئێستادا هیچ بژێوێكی دیكەیان نییە بۆ قەڕەبووكردنەوەی ئەو رۆژانەی كاریان نەكردووە.
هەدیە خان خاوەنی ساڵۆنی جوانكاری (هانیا)یە، ئەزمۆنێكی زۆری هەیە لەم كارەدا و چەندین ساڵە ساڵۆنی هەیە و خانمێكی سەركەوتووە قسەی بۆ زاری كرمانجی كرد و گووتی" بە بڕیاری داخستنی ساڵۆنەكان زیانی ماددی بەر خاوەن ساڵۆنەكان گەیشتووە بەتایبەت ئەو كەسانەی كرێچین، زۆرترین مۆشتەرییەكان لە مانگی 2 تا مانگی 3 پێش جەژنی نەورۆز بوون و لەو كاتە سەردانی ساڵۆنەكان دەكەن بەهۆی ئاهەنگە جیاكان و گەشت كردن و سەفرەوە، بەڵام ئەمساڵ بەهۆی داخستنی شوێنەكانی جوانكاری هەموویان تووشی زیان بوونەوە، هەر چەندە وەك خانمێكی خاوەنی ساڵۆن ئەم بڕیارەم پێخۆشبوو، چونكە لەم بارودۆخە هەستیارەدا سەلامەتی خەڵك و ئازیزانمان گرنگترە لە كاری ئێمە، بۆ ئەو كەسانەش كە بۆنە و ئاهەنگیان هەیە دەرفەت زۆرە، بەڵام دەبێت لەم كاتە هەستیارەدا هەموومان هاوكار بین بۆ ئەوەی دووبارە بتوانین بە دڵێكی خۆش ئازیزانمان ببینینەوە و دووبارە بگەرێینەوە سەر ژیانی ئاسایی".
هەدیە، هەر چەندە باسی ئەوەی كرد كە زۆر زیان بەر گشت شوێنە جوانكارییەكان كەوتووە، بەڵام نەیتوانی بڕی زیانەكان دیاری بكات و گووتی" زیانەكان لە شوێنێكەوە بۆ شوێنێكی دیكە جیاوازی هەیە و ناتواندرێت بڕەكەی دیاری بكرێت، بەڵام بە گشتی جگە لە كرێی شوێنەكە ئەگەر كرێچی بێت، مووچەی كارێكارانی ئەوێ و هەندێك وردەكاری دیكە ئەگەر هەژمار بكرێت زیانەكان زۆرن".

زۆرترین بینراو