داخستنی هۆڵەكانی لەشجوانی گرفت بۆ خەڵك درووست دەكات

داخستنی هۆڵەكانی لەشجوانی گرفت بۆ خەڵك درووست دەكات

 


زاری كرمانجی: پەتای كۆڕۆنا سەرتاپای جیهانی گرتەوەو نزیكەی 200 وڵات تووشی ئەم نەخۆشییە بوونەتەوەو رۆژانە زیاتر لە ملیار دۆلار زیانیان پێ دەكەوێت، بواری وەرزشیش بەدەر نییە لەم زیانانە، یانە زەبەلاحەكانی بە ناوبانگی جیهان كەوتوونەتە نێو گێژاوی زیان و قەیرانی دارایی، كوردستانیش وەك هەر وڵاتێكی دونیا تەواوی چالاكییە وەرزشییەكانی راگرت و هۆڵە وەرزشییەكانی داخست.
لە زۆربەی شارو شارۆچكەكانی كوردستان چەندین هۆڵی لەشجوانی و وەرزشكردن كراونەوەتەوەو رێگەیان پێدراوە بۆ وەرزشكردن، بەڵام لەم ماوەیەدا بە هۆكاری بڵاوبوونەوەی نەخۆشی كۆڕۆنا بڕیاردرا بە داخستنی هۆڵە وەرزشییەكان بۆ ئەوەی هاووڵاتییان تێكەڵاوبوون كەمتر بكەنەوەو خۆیان دوور بگرن لە گواستنەوەی ئەم پەتایە، ئەمە جگە لە تێكڕای چالاكییە وەرزشییەكانی تر.
لە ریپۆرتاژێكی زاری كرمانجیدا خاوەنی چەند هۆڵێكی وەرزشی رای خۆیان بەم جۆرە دەربڕی:
رێباز محمەمەد گووتی" ئیمە بۆ هەر بەشداربووێكی مەشقەكانی مانگانە 25 هەزار دینارمان وەردەگرت و رۆژانە لە هەردوو رەگەزی نیرو مێ سەردانیان دەكردین و مەشقەكانی خۆیان بە رێك و پێكی ئەنجام دەدا، بەڵام بەهۆی ئەم پەتایەوە پێمان راگەیندرا دەرگای هۆڵەكانمان دابخەین، ئەمەش بۆ ئێمە زیانێكی داراییە، چونكە كرێی هۆڵەكەمان زۆرەو مانگانە پارەیەكی زۆری كارەبای موەلیدەو میری دەدەین، ئەمە جگە لە پارەی گرێبەستی راهێنەرەكان".
گووتیشی" ئەگەر ئەم رەوشە ئارام بووەوەو نەخۆشیەكە بنبڕ كرا بەهۆی پابەندبوونمان بە گرێبەستەكان دەبێ لە بری ئەو پارەی لە بەشداربووەكان وەرمان گرتووە ئەو ماوەی ماویانە بۆیان قەرەبوو بكەینەوە، ئەمەش بە زیانی ئێمە تەواو دەبێ".
كارزان سەعید یەكێكی ترە لە خاوەن هۆڵە وەرزشییەكان گووتی" هۆڵەكەی ئێمە بۆ هەردوو رەگەزی نێرو مێ دوو بەشە بۆ یاریزانەكانی لەشجوانی و قوڕسایی لەگەڵ بەشێكی تر بۆ ئەو كەسانەی بە مەبەستی دابەزینی كێش سەردانمان دەكەن، مانگانە بۆ هەر كاتژمێرێك 35 هەزارمان لێ وەرگرتوون، بەڵام بۆ قوتابیان داشكاندنمان كردبوو بۆ 15 هەزار، ئێستا بەهۆی ئەوەی خەڵك لە هاتنە دەرەوە قەدەغە كراوەو هۆڵەكانمان بە بڕیاری حكومەت داخستووە زیانی زۆرمان بەركەوتووە، گوێبیستی هەواڵێكیش بووین كە چاوبخشێندرێتەوە بە كرێی خانووبەرەو شوێنە گشتیەكان، پێویستە حكومەت فشار بخاتە سەر خاوەن موڵكەكان بۆ دابەزاندنی كرێ".
كارزان گووتیشی" ئێمە دوو كەس خاوەنی ئەم هۆڵەین و ژیانی رۆژانەمان لەسەر ئەم هۆڵەیە، بەر لە دەستپێكردنی هەر مانگێك پارە لە بەشداربووەكان وەرگیراوەو بەشداربووی وا هەیە تەنها هەفتەیەك هاتوتە مەشقەكان و دەبێ ئێمەش ئەو ماوەی ماویەتی بۆی قەرەبوو بكەینەوە، خۆ دەبێ حكومەت و خاوەن موڵك چارەسەرێك بۆ ئێمە بدۆزنەوە".
بێژەن موراد بەشداربووێكی هۆڵە وەرزشییەكانەو گووتی" بەهۆی كێشی زۆری لەشمەوە چەند مانگێكە سەردانی هۆڵێكی لەشجوانی دەكەم و سوودی زۆرم بینیوە لە جۆری مەشقەكان و هەڵوێستی جوانی راهێنەرەكەم، رۆژانە مەشقەكانم بە رێك و پێكی ئەنجام دەداو لە ماوەی دوو مانگدا توانیوومە 15 كیلۆ دابەزێنم، ئەم ماوەیە كە نزیكەی 9 رۆژە بەهۆی جێبەجێكردنی رێنماییەكانی حكومەت لە دووركەوتنەوەو تێكەڵاوی خەڵك نەمتوانیوە مەشقەكان ئەنجام بدەم و هەست بە نامۆیی دەكەم، بە هۆی مانەوەو دانیشتنم لەماڵ هەست دەكەم كەمێك كێشم زیادی كردۆتەوە".

زۆرترین بینراو