دانیشتوانانی خەلیفان زێراب و رووباریان كردۆتە بیری توالیتەكانیان

دانیشتوانانی خەلیفان زێراب و رووباریان كردۆتە بیری توالیتەكانیان

موڕشید برادۆستی – سۆران : بەشێكی دانیشتووانی شارەدێی خەلیفان سەر بە قەزای سۆران ئاوەڕۆی سەرەكییان كردۆتە بیری توالیت و بەڕێوەبەری ناحییەش دەڵێت " لیژنەیەكمان پێكهێناوە و سزای توندیییان دەدەین .
هاوكار سەمەد گەنجێكی دانیشتووی هەولێرە و بەمەبەستی گەشت كردن رووی لە ناوچە گەشتیاریەكانی گەلی عەلی بەگ لە سنووری خەلیفان كردووە بە زاری كرمانجی گووت " رووباری خەلیفان یەكێكە لە رووبار و ناوچە گەشتیاریە دڵڕفێنەكانی سەر ئاستی پارێزگەی هەولێر كە هەریەك لە گەلی عەلی بەگ دۆڵی ئاڵانە و چەند ناوچەیەكی تر دەكەونە سەر رووبارەكە، لە شاری هەولێر روومان لەو ناوچەیە كردووە و پێی سەر سامین، بەڵام بەداخەوە هاووڵاتییان و بەشێك لە دانیشتووانانی ئەو دەڤەرە ئاوی رووبارەكەییان پیس كردووە و زێرابی ماڵەكانییان دێخنە نێو رووبار .
لای خۆشیەوە، كاروان كەریم خان گوندەژۆری بەڕێوەبەری شارەدێی خەلیفان بە زاری كرمانجی راگەیاند" بەشێك لە دانیشتووانی گەڕەك و كۆڵانەكانی خەلیفان كەوتونەتە سەر ڕێڕەوی زێرابی خەلیفان ئا و ئاوەڕۆی ماڵەكانییان دەرژێتە نێو ئاوی زێراب و دواتر ئاوەكە دەچێتە نێو رووبار و بەشێك لە دانیشتوانانیش بیری توالیتیان نییە و زێرابەكانییان كردۆتە بیری ئاودەست و توالیتەكانییان، ئەمەش دیاردەیەكی زۆر نەشیاوە و دەبێتە هۆی پیسكردنی ڕووباری خەلیفان.
زیاتر گووتی " ئاوبەر و " زێرابەكان " بۆ ئاوی باران و ئاوی سرووشتی دانراوە نەك بۆ ئاوی حەمام و پیساتی توالیتی ماڵان، بۆیە ئەو هاووڵاتییانەی ئەو كارەیان ئەنجامداوە رووبەڕووی یاسا و سزای توندییان دەكەینەوە كە لە ئەنجامدا بەهۆی ئەوانەوە رووباری خەلیفان پیس دەبێت.
لەلایەیەكی تریش بە درێژای رووبار زیل و پاشماوەی ماڵان فڕیدەدرێتە سەر لێواری رووبارەكان ئەمەش وێڕای بەخشینی سیمایەكی ناشرین، هەروەها لە رووی تەندرووستییشەوە ئاوەكە پیس دەكات و ئەوانەی سوود لە ئاوی رووبار دەبینین رەنگە تووشی نەخۆشی ببنن . لەو بارەیەوە، كاروان كەریمخان دەڵێت " وەكو بەڕێوەبەرایەتی شارەدێی خەلیفان داواكاریەكمان پێشكەش بە " I O M "ی نێودەوڵەتی و داوامان لێ كردوون كەخاوێن كردنەوەی ئەركی رووباری خەلیفان و درووست كردنی قەفەزی كۆكردنەوەی زبڵ و خاشاك كە ئەویش كاریگەری زۆری دەبێت لەسەر پاراستنی خەلیفان لە پاشماوە و زبڵ و خاشاك .
گوندەژۆری ئاشكراشی دەكات " لە زۆربەی شوێنەكانی خەلیفان، تا دەگاتە گەلی عەلی بەگ هاوینە هەوار و سەیرانگا و ناوچەی گەشتیاری لێ ییە و پیس بوونی ئاوی رووبارەكە ناڕەزایی گەشتیارانیشی لێكەوتۆتەوە، ئەم دیاردەیەش تازە نییە و چەندین ساڵ پێش ئێستە كراوە، بۆیە لە ماوەیەكی نزیك لیژنەیەك پێكدەهێنین بە مەبەستی بە دوواداچوون و سزادانی ئەو هاووڵاتییانەی زێدەڕۆییان كردۆتە سەر زێرابەكان و بۆ بەرژەوەندی ماڵەكانییان بەكاریان دێنن .
ئەو كێشە بۆ چەندین ساڵ پێش ئێستە دەگەڕێتەوە كە بەشێك لە دانیشتوانانی خەلیفان زێرابەكانییان بۆ ماڵەكانییان سوودییان لێ بینییوە و كردووبیانەتە بیری تەوالیت، بەڵام تا ئێستە حكومەت و لایەنە پەیوەندی دارەكانی ناوچەكە نەیان توانیوە چارەسەری بكەن، بەڕێوەبەرایەتی ناحیەی خەلیفان لە رێگەی لیژنەیەكەوە سەرقاڵی لادانی ئەو زێدەڕۆییانە و سزادانی ئەو هاووڵاتییانەیە كە كارەكەییان ئەنجام داوە .
خەلیفان لە رووی كارگێڕییەوە سەر بە قەزای سۆرانە لە سنووری پارێزگەی هەولێر، لە 63 گوند پێكهاتووە . ژمارەی دانیشتوانی زیاتر لە 50 هەزار كەس دەبێت .

 

 

زۆرترین بینراو