دوكاندارانی بازاری سۆران نیگەرانن لە گرانی نرخی كرێی دوكانەكان

دوكاندارانی بازاری سۆران نیگەرانن لە گرانی نرخی كرێی دوكانەكان

بەرەڤان شاكر سلێمان لاچ- سۆران:
بازاری سۆران بازارێكی گەورەیە، ئەمەش وایكردووە رۆژانە هاووڵاتییان بۆ دەبینكردنی پێداویستییەكانیان سەردانی بازاری سۆران بكەن، بەڵام ئەوەی بۆوەتە جێگای نیگەرانی دۆكاندار و كاسبكارانی ناو بازاری سۆران گرانی نرخی كرێی دۆكانەكانە، ئەمە جگە لەوەی پارەی كارەبا بۆ ئەوان خەمێكی ترە.
غازی شێروانی، دۆكاندارێكی ناو بازاری سۆرانە و دەڵێت: مانگانە دەبێت من دوو ملیۆن دینار كرێی دۆكان بدەم، ئەمە جگە لەوەی پارەی كارەبا بۆ ئێمە بە بازرگانی هەژمار دەكرێت بەمەش مانگانە بڕێكی زۆری پارەمان بۆ دێتەوە، ئەمە سەرەڕای پارەی پاسەوانی شەوانەو و كریێ شاگرد.
ئەم هاووڵاتییە گووتیشی: ئێمە ناچارین بۆ دابینكردنی ئەم هەموو خەرجیانە، كەلوپەلەكان گران بكەین، ڕەنگە زۆرجار زۆری نرخی كاڵاكان بۆ ئەم هۆكارانە بگەڕێتەوە.
سەدرەدین ڕۆستایی، كاسبكارێكی سۆرانە و دەڵێت: زۆربەی هاوڵاتییان پێیان وایە نرخی كەلوپەل لە سۆران گرانە، ئەمە راستە و حەقی خۆیانە، بەڵام دەبێت ئەوانیش بزانن كرێی دۆكانەكانی ناو بازاری سۆران لە هەموو بازارێكی تری كوردستان گرانترە، ئەمە جگە لەوەی حكومەت مانگانە بڕێكی زۆری پارەی كارەبامان لێوەردەگرێت، بەڕاستی حكومەت دەبێت هەوڵێك بدات بۆ دیاریكردنی نرخی كرێی دوكانەكان، لەلایەكی تریشەوە نرخی كارەبای نیشتیامنیمان با وەك ماڵەكان بێت نەوەك پێنج بەرامبەر بێت.
بەپێی ئەو بەدواداچوونەی زاری كرمانجی كردوویەتی لە بازاری سۆران، نرخی دوكانەكان لە چوارسەد هەزار دینارەوە دەست پێدەكات تا دەگاتە سێ ملیۆن دینار، ئەمە جگە لەوەی زۆرێك لە خاوەن دوكانەكان لەسەر گرێبەستی بەكرێدانەكە نرخێك دەنووسن، بەڵام لە راسیدا بڕێكی زیاتر وەردەگرن.
هاووڵاتییەكیش لە ناو بازاری سۆران بەوپەڕی تۆڕەبوونەوە بە زاری كرمانجی راگەیاند: لە سۆران نرخی كاڵاكان زۆر گرانە، بەڕاستی دەبێت چاودێریێك لەسەر بازار هەبێت، هەر كەسەو بە ئارەزووی خۆی نرخەكان دادەنێت، بەڕاستی دەبێت بیر لە هەژارانیش بكرێتەوە.
سەبارەت بە گرانی نرخی كارەبا زاری كرمانجی گلەیی ئەم دوكاندارانەی گەیاندە بەڕێوەبەری بەشی فرۆشتنی كارەبی سۆران، لای خۆشیەوە محەمەد باقی، بەرێوەبەری بەشی فرۆشتنی كارەبای سۆران بە زاری كرمانجی راگەیاند: بەر لەوەی حكومەت نرخی هەر وەحدەیەكی كارەبا زیاد بكات، بۆ هەر وەحدەیەكی كارەبای بازرگانی لە ٢٥ دینارەوە دەستی پێدەكرد تا ٩٠ دینار، ئەمەش بەپێی ئەو برەی بەكاردەهێنرا، واتا، ئەگەر تا ٤٥٠ وەحدە كارەبایان بەكارهێنابا ئەوا بە نرخەكەی دەبوە ٢٥ دینار، ئەگەر لەو بڕە زیاتر بەكارهێنرابا ئەوا دەچوو تا ٩٠ دینار، بەڵام ئێستا هەر برێك بەكاربهێنرێت ئەوا بە بڕی١٥٠ دینار بۆیان دادەنرێت.
محەمەد باقی گووتیشی: چەند جاریك داوامانكردووە بۆ ئەوەی نرخی كارەبای نیشتیمانی كەم بكرێتەوە، بەڵام لە ئێستادا وەزارەتی كارەبا هیچ بەرنامەیەكی نییە بۆ كەمكردنەوەی نرخی كارەبای بازرگانی.
محەمەد باقی ئاماژەشی بە ئەوەكرد: لیژنەكانمان بەردەوامن بۆ نەهێشتنی كارەبای زیادەڕەویەكان، بۆیە داوا لە هەموو كاسبكاران دەكەم خۆیان بەدوور بگرن لەوەی كارەبا بدزن، چونكە سزایەكی تۆند دەدرێن.
لای خۆشیەوە كرمانج عزەت، قایمقامی سۆران بە زاری كرمانجی راگەیان: پێشتر هەوڵماندا كەوا بڕی لە سەدا سی لە كریێ دوكانەكان كەم بكەینەوە، بەڵام كارەكە سەری نەگرت ئەویش بەهۆی ئەوەی هیچ یاسایەك لەو بارەیەوە بەردەست نییە، بۆیە لە ئێستادا دیاریكردنی نرخی كرێ پەیوەندی بە بازارەوە هەیە، بەڵام ئەگەر پەرڵەمان یا وەزارەتی داد بڕیار و یاسایەك بۆ ئەمە دەربكات ئەوا دەكرێت جاودێری بخرێتە سەر كرێی دوكانەكان.
سەبارەت بەوەی خاوەن دوكانەكان لەسەر گرێبەستی خۆیان بڕێكی كەمتری كرێیەكیان دەنووسن، ئەمەش بۆ ئەوەیە خۆیان لە باجی ساڵانە بەدزنەوە، كرمانج عزەت گووتی: ئەمە شتێكی نایاساییە و پێویستە كاری لەسەر بكرێت، بەڵام لێرەدا هەم خاوەن دوكان و هەم كرێچییەكە تۆمەتبارن، چونكە هەردووكیان هەوڵیانداوە دزی لە حكومەت بكەن، ئەگەر حالەتی وا بگاتە دادگا ئەوا هەردووكیان سزا دەدرێن، بۆیە داوا لە كاسبكاران دەكەین خۆیان لەو جۆرە فێڵان بەدوور بگرن.

زۆرترین بینراو