دیاردەی چاولێكەری ژیانی گەنجانی وێران كردووە

دیاردەی چاولێكەری ژیانی گەنجانی وێران كردووە

زاری كرمانجی ـ سۆران : بەشێكی زۆر لە گەنجان بوونی دیاردەی چاولێكەری وەك نەخۆشی سەیر دەكەن، كەچی نەیانتوانیووە خۆی لێی دوورە پەرێز بگرن و رۆژانە لاسایی ئەم و ئەو دەكەنەوە.
كرێكار عەبدوڵا ی تەمەن 22 ساڵ، لە یەكێك لە گەڕەكانی شار، ماركێتێكی داناوە، ئەو دەڵێ‌"ئەو كاتەی من ماركێتم لەو گەڕەكە دانا، هەر تەنها خۆم بووم، كەچی ئەمرۆ لەو گەڕەكە بچووكە 6 ماركێتی تر هەیە، گەنج لەبەر چاولێكەری ناگاتە هیچ، من كارێك دەكەم تۆ بۆچی كارەكەی من دووبارە دەكەیتەوە، بڕۆ بۆ خۆت كارێكی تر بدۆزەوە"، كرێكار نیگەرانە و دەیەوێت ماركێتەكەی دابخات و كارێكی تری نوێی بۆ خۆی بدۆزێتەوە، بەڵام ئەو ترسی لەوە هەیە كارە نوێیەكەشی بە دەردی كارە كۆنەكەی بچێ،
سیامەند معروف تەمەنی 26 ساڵ، ماوەی 3 ساڵە كاری تەكسی دەكات لە نێو بازاری شار، ئەو پێشتر دوكانی میوە فڕۆشتنی هەبووەو بە قسەی خۆی لەو كارەیدا داهاتێكی باشی دەهاتە دەست، بەڵام بە هۆی كردنەوەی چەند دوكانێكی تری هاوشێوەی ئەو، ناچاربووە دەستبەرداری كارەكەی ببێت و روو لەكاری شۆفێری بكات، دەڵێ‌"ئەگەرچی لە كاری پێشوومدا داهاتێكی باشم دەهاتە دەست، بەڵام لەبەر تەماحی و چاولێكەری خەڵكانێك، وازم لێهێناو و روومكردە كاری شۆفێری و جارێكی تریش ناگەڕێمەوە بۆ كارەكەی پێشوو"، سیامەند ئەوەش دەڵێ‌"كورد تەنها لەچاولێكەری پێشكەوتووە، ئێستا سەیر كە لە هەولێر هاوڵاتیان بە سەدان بازاری هەرزانفرۆشی 1000 و 2000 یانكردۆتەوە، تیم مارت رسقی دوكاندارەكانی تریشی بریووە لە هەر شارێك كۆمەڵێك لقیان هەیە"،
كارزان رەمەزان مامۆستاش دەڵێ‌"ئێمەی كورد عەقڵی كاردنمان لاوازە، بۆیە خەڵك بەناچاری پەنای بردۆتە بەر چاولێكەری، كەسێك كاتێ‌ ویستی كارێك بكات شار بەشار و گەڕەك بە گەڕەك دەگەرێت، تاكو شتێكی پێش چاو بكەوێت و بەیانییەكی هاوشێوەی ئەو شتەی چاویپێكەوتووە كاری لەسەر بكات"، مامۆستا كارزان لەلایەك ئەو دیاردەیە بەشتێكی ئاسایی دەبینێ‌ و لەلایەكی تریشەوە رەخنە لەحكومەتی كوردستان دەگرێت"دەبوایە حكومەت بیرۆكەی كاركردنی لەكوردستان پێشخستبایە و هاوڵاتیانی فێری كاری نوێ‌ ی دوور لەچاولێكەری و لاسایكردنەوە كردەبایە"،
كارزان ئەوەشی گووت"ماوەیەك وەك چاولێكەری هاوڵاتیان دەرەوەی وەڵاتیان كردبووە ئامانج و رۆژانە بەدەیان گەنج بەبیانووی نەبوونی كار و خراپی بژێووی ژیانییان روویان لەوەڵاتە ئەوروپییەكان دەكردو كوردستانیان جێدەهێشت، ئەمرۆ بە هەزاران گەنج بەهۆی چاولێكەرەیەوە ئاڵوودەی نێرگەڵەكیشان بوونە"،
سامان مستەفا ی تەمەن 23 ساڵ دەڵێ‌"باوكی برادەرێكم رەوشی ئابوورییان زۆر باشە، 4 كوڕی خاوەن كاری تایبەتی خۆیانن، ماوەیەكە بە ئۆتۆمبێلەكەی كە ئێستا بیفرۆشێ‌ 16 هەزار دۆلاری دەكات دەیبێنم كاری گواستنەوەی هاوڵاتیان دەكات لەناوخۆی سۆران "، سامان پێی وایە گەر ئەوە بەخێلی یان چاوچنۆكی نەبێت دەبێ‌ چی بێت"ئاخر كابرا تۆ چ پێویستیت بەو هەندە پارەیە دە لێگەڕی با خەڵكی هەژار كاری خۆیان بكەن".
گەنجێكیش كە حەزی نەكرد ناوی ئاشكرا بكرێ، هێما بۆ ئەوە دەكات هەر كاتێ ئاستی رۆشنبیری و هۆشیاری كۆمەڵگە لاواز بێ، ئەو جۆرە دیاردانە بوونیان دەبێ، ئەو پێی وایە هێشتا كۆمەڵگەی كوردی زۆری ماوە خۆی لەو جۆرە دیاردانە دوور بگرێ و دەڵێ‌"تا خاوەنی ئەو عەقڵیەتیە بین ناگەین بە هیچ، كورد لە هیچ شتێك پێشنەكەوتووە، تەنها لە چاولێكەری و حەسوودی زیاتر".

 

زۆرترین بینراو