دەمەوێت لە داهاتوو خەڵكی زیاتر بە هونەری شێوەكاری بناسێنم

دەمەوێت لە داهاتوو خەڵكی زیاتر بە هونەری شێوەكاری بناسێنم

د/هۆژین شەوكەت دری
ساڵی١٩٨٦ مەریەم بایرام عەلی شێرزاد چاوی بە دنیا هەڵهێناوە، دەرچووی پەیمانگای هونەرە، خەڵكی شاری تارانە، بوێری و ئازایەتی وای لێكرد بەدوای حەز و خەونەكانی منداڵی خۆی بكەوێت و ئەو بوارەی توانای تێدا هەیە دەستی بۆ ببات و بیكات بە پیشەی خۆی، ساڵی ٢٠١٣ دەستی كرد بە كاری شێوەكاری و هەوڵ و ئامانجەكانی كرد بە راستی و خەونەكەی بەدیهێنا.
مەریەم لە دیمانەیەكی تایبەت بە زاری كرمانجی گووتی" من ساڵی ٢٠١٣ دەستم كردووە بە كاری شێوەكاری، بەڵام زیاتر لە منداڵییەوە خولیام بۆ ئەم هونەرە هەبووە، هەمیشە بۆ حەزی خۆم وێنەم كێشاوە و كاری شێوەكاریم كردووە، ئێستا كردوومە بە پیشەی خۆم و زیاتر گرنگی پێدەدەم، شێوەكاری لەمندا خۆی دۆزیوەتەوە دەتوانم ئەم هونەرە بەرەوپێشەوە ببەم بۆیە ئەمە هەڵبژاردەی من بوو تا زیاتر هەوڵی بۆ بدەم و لەسەری بەردەوام بم، پاڵپشتیكردنم بۆ ئەم كارە لەلایەن ئەو كەسانەوە بووە كە كارەكانیان بینیوە ئەمەش دەورێكی زۆری هەبوو چونكە هەر كارێكم ئەنجام دابێت و كەسێك بینیبێتی پێی سەرسام بوونە كەسانێك تایبەت داوایان كردووە تابلۆیان بۆ بكێشم ئەمەش زیاتر هانیدام و زیاتر پاڵپشتم بوو تا باشتر كاربكەم و بیكەم بە پیشەیەك بۆ خۆم و بژێوی ژیانی پێ دابین بكەم".
سەبارەت بە شێوازی كاركردنی تایبەتی خۆی و هەڵبژاردنی شێوازەكانی كێشانی تابلوكانی بۆ زاری كرمانجی گووتی" زیاتر ئەم هونەرەی من دەكەوێتە نێو بازنەی هونەری ئەكریلیك، شێوازی كێشانی ئەم جۆرە هونەرە وەك ئەوە وایە سیمێك یاخود درەوشانەوەیەك لە وێنەكاندا دەربكەوێت، ئەمەش چەندین پێداویست تایبەت بە خۆی دەوێت و كاتێكی زۆرتری دەوێت تا بتوانم تابلۆیەكی بكێشم بەو شێوازە جوانەی دەمەوێت، كاری دەستی كاتی زۆری دەوێت منیش دەمەوێت شتێك بكەم جیاواز بێت، كێشە نیە چەند ماندوو بووم تەنها ئەوەی بەلای منەوە گرینگە پیشاندانی شێوازێكی جیاوازە لە تابلۆكانمدا، هەمیشە بە تێپەربوونی كات بیرۆكەی نوێ و كاری جوانترم ئەنجامداوە زۆرجاریش سوودم لە كاری كەسانی تر وەرگرتووە بێگوومان هەركەسێكیش حەز بە كارێك بكات و بیەوێت هەوڵی بۆ دەدات و دەتوانێت تێیدا پێشبكەوێت".
گووتیشی" زیاتر لە ٤٥ تابلۆم تا ئێستا كێشاوە، یەك پێشانگام كردۆتەوە لە شاری هەولێر بە هەماهەنگی سەندیكای هونەرمەندانی كوردستان لقی هەولێر بەناوی پێشانگای (سەمای رەنگەكان)، زیاتر حەز دەكەم تابلۆكانم گوزارشت لە شتێك بكات و باسێكی تێدابێت، هەوڵم داوە تابلۆكانم بە دڵی ئەو كەسانە بێت كە بۆیان دەكێشم، نرخەكەی بە پێی جیاوازی تابلۆ قەبارەكەیەوە دەگۆڕدرێت لە تابلۆیەكەوە بۆ یەكێكی تر جیاوازی هەیە، كاتەكان جیاوازن بۆ كێشانی تابلۆ سادەترین تابلۆ كە تا ئێستا كێشاومە ٤ كاتژمێرم بۆی تەرخانكردووە، تابلۆم بۆ زۆر كەس كێشاوە زۆرجاریش بە دیاری بەخشیوومە بە كەسە نزیكەكانم بەڵام ئەوەی خۆم بمەوێت بكێشم زیاتر دەربرینێكی تایبەتە هەربۆیەش هەستێك لە تابلۆكانمدا بەدی دەكەیت، من لە كوردستان گەورەبووم و ژیاوم شوێنێكە بۆ مانەوەی هەموو كەسێك و ئاین و نەتەوەیەك ئەمەش رەنگدانەوەیەكی زۆری لە تابلوكانمدا هەیە".
مەریەم باس لە داهاتوو دەكات بۆ شێوەكاری و دەیەوێت زیاتر خەڵك بەم هونەرە ئاشنا ببن و گووتی" حەزدەكەم لە داهاتوو خەڵكی زیاتر بە هونەری شێوەكاری بناسێنم لە رێی تابلۆكانمەوە بڵێم هونەری شێوەكاری جگە لە جوانی و ناسینی رەنگەكان لە نزیكەوە بەشێكە لە دەربرینی هەستی هونەرمەند، گرنگی نەدان بە هونەری شێوەكاری لە كوردستان گەورەترین ئاستەنگە بۆ من و هەموو هونەرمەندانی تر كە لەم بوارە و هونەرە جیاوازەكانی تردا كاردەكەن، خەونی گەورەی من ئەوەیە پەرە بە كارەكانم بدەم و كوردستان وەك وڵاتان لە پلەیەكی بەرز ببینم، سەربەرزم بەوەی كارەكانم لە كوردستان جێگای خۆیان كردۆتەوە، بەردەوام دەبم لە كارەكەم گەر كاتم هەبێت پرۆژەیەك تەرخاندەكەم بۆ فێركردنی ئەو كەسانەی خولیای ئەو كارەیان هەیە تا كوردستانیش لەم بوارەدا سەربكەوێت و بەرەو پێشەوە بچێت".

زۆرترین بینراو