دەڤەری سۆران مێژوویەكی قوڵ و بێ مۆزەخانە

دەڤەری سۆران مێژوویەكی قوڵ و بێ مۆزەخانە

ئا - بەرەڤان شاكر سلێمان لاچ: مێژوو و شارستانییەت بە بەشێكی سەرەكی مانەوەی نەتەوەكان دادەنرێت، هەڵبەت مۆزەخانەش وەك نا‌وەندێك دادەندرێت بۆ كۆكردنەوە و پاراستنی كەرەستە كەلەپوورییەكان.
دەڤەری سۆران سەڕەڕای فراوانی سنوورەكەی، هەڵبەت ژمارەیەكی زۆری ئایین و ئایینزا لێیە، ئەمە جگە لەوەی كۆبونەوەی ژمارەیەكی زۆری خەڵكی ناوچە جیاوازەكانی كوردستان بووەتە هۆكاری دەوڵەمەندی سۆران لە بواری كەلەپووریدا.
بەڵام تا ئێستا سۆران بێ مۆزەخانە ماوەتەوە، نەبوونی مۆزەخانەش بووەتە هۆكاری لەناوچوونی كەرەستە كەلەپوورییەكانی دەڤەری سۆران.
هیمداد مستەفا دانیشتووییەكی شاری سۆران و ماوەیەكە خەریكی كۆكردنەوەی كەرەستە كەلەپوورییەكانە، هیمداد دەڵێت " كۆكردنەوەی كەرەستە كەلەپوورییەكان لای من ئارەزوویەكە، ئەو كەرەستانەی كۆی دەكەمەوە زیاتر لە رێگای هاوڕێ و كەسە ناسراوەكانمە، بەشێكی زۆری ئەو كەرەستانەشم‌ كریووە".
ئەو زیاتر گووتی " تا ئێستا نزیكەی 200 هەزار دۆلارم خەرجكردووە بۆ كرینی كەرەستە كەلەپوورییەكان. دوو جاریش پێشنیاری كردنەوەی مۆزەخانەیەكم كردووە و ئامادەشم كەرەستەكانم ببەخشمە مۆزەخانەیەك ئەگەر بێتو لە سۆران بكرێتەوە".
مامۆستایانی زانكۆ پێیانوایە نەبوونی مۆزەخانە لە دەڤەرێكی بەرفراوانە وەك سۆران كە خاوەن قولایەكی مێژووییە خەلەلێكی گەورەیە، لە لای خۆشیەوە د. ئامانج دلزار مامۆستا لە زانكۆی سۆران، گووتی" هەبوونی مۆزەخانە بۆ هەر شار و دەڤەرێك گرنگییەكی زۆری هەیە، دەبێتە ناوەندێك بۆ كۆكردنەوەی كەرەستە كولتوورییەكان، جگە لەوەی گەشتیاران دەتوانن سەردانی بكەن و ئاشنای كولتووری دەڤەرەكە ببن، هەروەها دەتواندرێت بۆ مەبەستی توێژینە و زانستی سوودی لێوەربگیرێت".
عەبدلوەهاب سلێمان، بەڕێوەبەری شوێنەوارناسی سۆران بە زاری كرمانجی راگەیاند" چەند ساڵێكە گردی ئیچ‌ قەڵامان دەستنیشانكردووە بە مەبەستی دامەزراندنی مۆزەخانەیەك، بەڵام بەهۆی شەڕی داعش و قەیڕانی دارایی پڕوژەكە وەستاوە".
بەڕێوەبەری شوێنەوارناسی گووتیشی " هەبوونی مۆزەخانە بۆ سۆران زۆر پێویستە، چونكە سۆران گەشتیارێكی زۆری هەیە و ئەو وەڤدە بیانیانەی سەردانی سۆران دەكەن زۆربەی جار داوای سەردانیكردنی مۆزەخانە دەكەن، ئەمە جگە لەوەی ئەو پارچە شوێنەواریانەی كە لەم دەڤەرە دەدوزرێنەوە ئەگەر بێتو مۆزەخانەیەك هەبێت دەتوانین وەك مێژووی ئەم دەڤەرە پیشان بدەین، بەڵام بەهۆی نەبوونی مۆزەخانەوە ئێمە ئەو پارچە شوێنەوارییانە لای خۆمان هەڵگرتووە و كەس سوودی لێوەرناگرێت‌، هەر كاتێكیش مۆزەخانەیەك بكرێتەوە تەواوی پارچە ئاسەوار پێشكەشی مۆزەخانەكە دەكەین".
بەڕێوەبەری شوێنەوارناسی سۆران راشیگەیاند" لە بەرنامەماندایە هەفتەی داهاتوودا لەگەڵ بەڕێوەبەرایەتی گشتی كۆببینەوە و داوای ئەوەش دەكەین خۆمان مۆزەخانەیەك دروست بكەین و نەهێڵین پارچە ئاسەوارییەكانی ئەم دەڤەرە لەناو بچن".

زۆرترین بینراو