راپەرین لە نێوان دەستكەوت و ناڕەزایەتی شەقام

راپەرین لە نێوان دەستكەوت و ناڕەزایەتی شەقام

محەمەد ئامۆكەیی- زاری كرمانجی: 29 ساڵ تێپەر دەبێت بەسەر راپەرینە مەزنەكەی باشووری كوردستان، لەو بارەوە چین و توێژەكانی كۆمەڵگەی كوردی لەسەر دەر ئەنجام و بەرهەمەكانی ئەو راپەرینە قسە دەكەن و رووی گلەیش لە حكوومەت دەكەن كە وەك پێویست ئاوریان لە دۆخی خەڵك نەداوۆتەوە، زاری كرمانجی راپۆرتێكی مەیدانی لە سۆران سازكردووە و هاووڵاتیان بەسەر دووبەرە دابەش بوونە و هەر یەكە و بەجۆرێك بۆچوونی خۆی دەخاتە روو.
حاجی عیسا پیاوێكی بەتەمەن بوو لە پاركی بولبولی ناو سەنتەری شاری سۆران، لەگەڵ پۆلێك لە هاوتەمەنەكانی سەربوردەكانی ژیانی خۆیان باس لێوە دەكەن، ئەو دەربارەی راپەرینی بەهاری ساڵی 1991 بۆ زاری كرمانجی گووتی" ئێمە راپەرینمان كرد بۆ ئەوەی لە ژێر دەستەی رزگارمان بێت و چیتر رژێمی بەعس زولم و ستەمان لێ نەكات، بەڵام ئەوەی دەبینرێت لەو 29 ساڵە شتێكی وا بۆ نەكرایە كە خەڵكی كوردستان دڵخۆش بێت، بۆیە رووی دەمم ئاراستەی بەرپرسان دەكەم كە خزمەتی زیاتری هاونیشتیمانیان بكەن، لەبەر ئەوەی منێك چەندین ساڵ خزمەتم هەیە بە پارەیەكی كەم خانەنشین كراوم ئەویش بەشی هیچ ناكات بەرپرسانیش بە پارەی خەیالی خانەنشین بكرێن، بۆیە لەوان دەپرسم ئەمانە دەستكەوت و بەرهەمی راپەرینە.
ئەحمەد مستەفا، هاووڵاتیەكی تربوو ئەوەیش وەك حاجی عیسا، گلەی زۆری هەیە و دەڵێت" هەموو كوردێك پێی خۆشە ئەوانەی حكوومی لەسەر دەكەن لە نەتەوە كەی خۆی بێت وەك خۆم دەستخۆشیم هەیە بۆ ئەوانەی لەشاخبوون و دژی رژێم چەندین ساڵ خەباتیان كردوو و شەهیدی زۆرماندا، بەڵام گەر سەیری بكەین دەبینین ئەوانەی ئەوكات چاویان لەو میللەتە خێر لەخۆ نەدیووە سوور دەكردەووە و لەگەڵ رژێم بوون و رۆژانە ئیهانەی ژن و خوشكی ئێمەیان دەكرد، ئێستا ئەوان لەوانەی خەبات و قوربانیان دا رێزیان زیاترە و بگرە پارەیان بۆ دیوەخانەكان سەرف دەكرێت، ئەوانە هەمووی جێگای سەرنجە بەڵام دەردە دڵی خۆمان لای كێ باس بكەین كەسنییە لەو وڵاتە گوێت لێبگرێت، ئەو گوێ نەگرتنەش وادەكات خەڵك چیتر بێ دەنگ نەبێت لەهەمبەر ئەو هەموو نا عەدالەتیەی لە هەرێم هەیە.
میران محەمەد، دەڵێت بە درێژای مێژوو هەرێمی كوردستان لەلایەن نەیارەكانیەوە هێرشی كرایتە سەر ئێستاش ئەوان بەدوای هەڵێك دەگەرێن بۆ ئەوەی ئەو ئەزمونەی هەیە لەنێوی بەرن، راستە بەشێكی بەرچاوی خەڵكی هەرێم گازندەی هەیە لەو سیستەمەی ئێستا هەیە، بۆیە من داوادەكەم ئەو ئەزمونەی هەمانە لەدەست نەچێت كاتی یەكگرتن و یەكخستنەوەی نێو ماڵی كوردییە، وەك گەنجێك داواكاریم زۆرە بەڵام وەك گووتم" جاری بێ دەنگ بوومە لەو داواكاری و مافەكانمان گلەی زۆرشم هەیە كە گەنج فەرامۆش كراوە و هیچ سەپۆرت ناكرێت.
جێگای باسە لە كۆنەوە لە نێو زۆرێك لە میللەتانی جیهان راپەرین دژی دەستەڵاتی دیكتاتۆر و ستەمكاركراوە ئەو راپەرینەی باشوری كوردستانیش وەرچەرخانێكی مێژووی بوو دژ بەرژێمی بەعسی ستەمكاری عێراق، كە دەر ئەنجامەكەی بریتبوو لە وەرگرتنی مافی ئۆتۆنۆمی بۆ كورد و رزگاربوونی پارچەیەكی دابراو لە كوردستانی گەورە كە ئێستا خاوەن پێگەیەكی بەهێزی ئابووری و سیاسییە لەسەر ئاستی ناوچەكە و وڵاتانی جیهان.

زۆرترین بینراو