رێزگرتنی ئاڵای كوردستان و سرودی نیشتمانی لە قوتابخانەكان

بكر كریم حسن

بەرێوەبەری گشتی چاڵاكی وەرزش و هونەرماستەر لە كارگێری پەروەردەیی

نوسەری روسی هارڤی ماكای دەڵێ" بیرێك هەڵكەنە پێش ئەوەی تینووت بێت".بێگومان ریزبوون و وەستانی قوتابیانی خۆشەویست لە سەرەتای رۆژی هەفتە لە قوتابخانەكاندا، جگە لەوەی جێ بەجێ كردنی رێنماییەكانە لە هەمان كاتیشدا ئەركێكی پەروەردەیی و ویژدانییە، كەوا هەموو هەفتەیەك لە یەكەم رۆژی دەستپێكردنی دەوام پێویستە سەرجەم قوتابییە خۆشەویستەكان بەریز بوەستن بۆ ئامادەبوون بەبێ دەنگی لە كاتی بەرزكردنەوەی ئاڵای كوردستان و گوتنەوەی سرودی نیشتمانی (ئەی رەقیب)، ئەو وەستان و ریزبوونە بەرێوەبەر ودەستەی كارگێڕی و مامۆستایان و فەرمانبەران و سەرجەم قوتابییان دەبێ پاپەندی بن و ئامادەبن لە گۆڕەپان، نابێـت هیچ مامۆستا و قوتابییەك لە رێوڕەسمی بەرزكردنەوەی ئاڵای كوردستان و گوتنەوەی سرودی نیشتمانی ئامادە نەبن، چونكە جگە لەوەی كەمتەرخەمی وپابەند نەبوونە بە رێنماییەكان لە هەمان كاتیشدا سوكایەتی كردنە بەرامبەر بە ئاڵا و نیشتمان و پڕەنسیپە نەگۆڕەكان، هەروەها نموونەیەكی نەشیاوە لە پێش قوتابییەكانمان كەوا ببینن مامۆستایەك یان چەند مامۆستایەك لە كاتی بەرزكردنەوەی ئاڵای كوردستان و سرودی نیشتمانی ئامادە نابن و لە ژوورەكانیان خۆیان حەشاردەدەن. بێگومان لە وڵاتی میسر گەر مامۆستایەك ئامادەی بەرزكردنەوەی ئاڵای ووڵات و سرودی نیشتمانی نەبێت، ئەوا بە پێی یاسای ئەو ووڵاتە بە ژمارە (41لە ساڵی 2014)بەند دەكرێ كە لە ساڵێك زیاتر نەبێت و بە بژاردنی بڕی (30) هەزار جونیە، یانیش بە یەكێك لەو دوو سزایە، سزا دەدرێت.
بەرزكردنەوەی ئاڵای كوردستان و گوتنەوەی سرودی نیشتمانی لە قوتابخانەكاندا لە بابەتە هەرە پێویستەكانە بە تایبەتی لە قۆناخی بنەڕەتی بۆ راهاتنی قوتابییە خۆشەویستەكانمان لە سەر خۆشەویستیان بۆ ئاڵا و وڵات بەجۆش و خرۆشەوە وشەكان لەگەڵ سرود دەڵێنەوە و پەرۆشیان زیاتر دەبێت و گوێ ڕایەڵی و پەیڕەوكردنیان مكوم تر دەبێت و خۆبەندی و چوونەپاڵیان بۆ نیشتمان زیاتر دەبێت، هەروەها فێری بنەماكانی پابەندبوون بە سیستەم و رێنماییەكان دەبن و گوێ ڕایەڵ و خۆشەویستیان بۆ خاك و نیشتمان زیاتر دەبێت، چونكە رێزگرتنی ئاڵا وسرودی نیشتمانی كۆمەڵێ مانای گرنگی هەیە لە چاندن و رواندنی بنەمای خۆبەندی كە لە داهاتوودا دەبێتە پاڵنەرێكی بەهێز بۆ خزمەت كردنی نیشتمان و پتەوكردن و چەسپاندنی زیاتری ناسنامەی نیشتمانی، چونكە هەموو خۆبەندیەكی ئەرێنی و باش بۆ نیشتمان پەرە بە گەشەكردنی خودی كەسەكان دەدات وای لێ دەكات كەسێكی سەنگین و سالار و هاوسەنگ و بەهێزی لێ دروست ببێت لە گەڵ خودی خۆی و لەگەڵ دەوروبەری لە دەرئەنجام بە سوود و قازانجی باش بۆ نیشتمان دەگەرێتەوە ئەوەش لە ئەنجامی گوێ گرتن لە سرودی نیشتمانی و رێزگرتنی ئاڵای كوردستان. ئەو چەمك و تێگەیشتنە قایمتر و مكوم تر دەكەن. جودا لەوەش قوتابی كە هەر لە سەرەتاوە فێری خۆبەندی ببێت ئەوا یارمەتیدەرێكی باش دەبێت بۆ هەست كردن بە ئارامی و ئاسودەیی و جێگیربوون دەكات كە ئەوەش بنەمایە نابێت دوا بخرێ.
بۆیە پێویستە لە هەموو قوتابخانەكان پابەندبن بە رێزگرتن لە ئاڵای كوردستان و سرودی نیشتمانی و قوتابیان فێر بكەن و لە پەروەردە و یەكەی سەرپەرشتیاریش بەدواداچوونبۆ ئەو بابەتە بكرێ، كە ئێستا لە بەرێوەبەرایەتی گشتی چالاكیەكانی دێدەوانی و وەرزشی و هونەری بە پێی بەرنامەیەك كۆبونەوەی تیوری و پراكتیكی بە سەرجەم مامۆستایانی وەرزش دەكرێ لە سەرجەم قەزاكان لە سەر چۆنیەتی رێزگرتن و بەرزكردنەوەی ئاڵای كوردستان و سرودی نیشتمانی كە ئەركێكی نیشتمانی و پەروەردەیی و ویژدانییە.

بابەتى پەیوەندیدار بیروڕا

بیروڕا

زۆرترین بینراو