زبڵ و خاشاك لۆفەكانی سیتكانی تەنیوە

زبڵ و خاشاك لۆفەكانی سیتكانی تەنیوە

بەرەڤان شاكر سلێمان لاچ- دیانا: لۆفەكانی سیتكان لە سنووری ناحیەی دیانا سەر بە قەزای سۆران، شوێنێكی دڵگیرە و سەرنجی گەشتیارانی راكێشاوە و رۆژانە گەشتیارێكی زۆر رووی تێ دەكەن، بەڵام ئەوەی بۆتە جێگەی نیگەرانی لای گەشتیاران و خەڵكی ناوچەكە زبلێكی زۆر لەو لۆفانە كۆبۆتەوە، ئەوەش نیگەرانی لای گەشتیاران و خەڵكی ناوچەكە پەیداكردووە و داواكارن لەلایەنە پەیوەندیدارەكان چارەسەرێك بۆ ئەو زبل و خاشاكە بدۆزنەوە.
دەڤەری سۆران هەڵكەوتەیەكی جوگرافیای گرنگ و تایبەتی هەیە، ئەمەش بۆتە هۆكارێك بۆ راكێشانی سەرنجی گەشتیار، دەڤەری سۆران هەر چوار قەزاكانی (سۆران، چۆمان، مێرگەسۆر، رواندوز) لەخۆ دەگرێت.
هاوولاتیێكی گوندی سیتكان، ئاماژەی بەوەكرد" رۆژانە بۆ كاسبی روو لە سۆران دەكەم بەڕاستی بوونی ئەو هەموو پاشماوەیە بێزاری كردووین، جگە لە بێزاریەكەشی بۆنێكی زۆر ناخۆشی هەیەو مرۆڤ دەبێت تا لەو شوێنە رەتبێت دەبێ جامی ئۆتۆمبێل بەرزكەیەوە لەبەر بۆن و زۆری مێش و مەگەز.
ئەو هاونیشتیمانیە ئەوەشی گووت" دەبوا ئێستا لەو لۆفانە پڕۆژەی گەشتیاری لێ دروستكرابا نەك ئەو هەموو زبڵ و خاشاكە، بۆیە داوادەكەین چیتر خەڵك پاشماوەكانی لێرە فڕێ نەدات و گرنگی بە ژینگە پارێزی بدەن.
حاجی ئیبراهیم پیاوێكی بەتەمەنی ناوچەكە بوو دەڵێت" هەموو ساڵێك لەجەژنی قوربان خەڵك پاشماوەی ئەو ئاژەڵانەی دەیكاتە قوربانی فڕێدەدنە لۆفەكان، داوادەكەم لەو موسلمانانەی كە ئەو خێرە دەكەن پاشماوەكان لێرە فڕێ نەدەن چونكە بەڕاستی بێزاربوینە.
ژینگە پارێزێكیش باس لەوە دەكات" هۆكاری پیسبوونی ژینگەو كەڵەكەبوونی پاشماوەكان لە شۆستەوە شەقامەكانی سنووری سۆران، بۆ نەبوونی كارگەی ریساكلبین دەگەڕێتەوە كە هۆكارەكە بۆ كۆبونەوەی ئەو پاشماوانە.
هەژار ماهیر، چاڵاكوان و ژینگە پارێز، ئەوەشی خستە روو" جێگای نیگەرانییە لۆفەكانی سیتكان ماوەی چەند ساڵ دەبێت بەو جۆرەن، ئێمە چەند جار لەگەڵ بەرپرسانی ناحیەی دیاناو شارەوانی سۆران، قسەمان كردووە بەڵام چەند جار خاوێن كرابێتەوە خەڵك دووبارە پاشماوەكانی لێ فڕێدەدات و گوێ بەوەنادات كە ئەو شوێنە تایبەت نیە بەفڕێدانی پاشماوەكانی زبَل و خاشاك.
دەشڵێت" زیانەكانی ئەو پاشماوانە ئەوندە زۆرن كاریگەری راستەوخۆیان دەبێت بۆ سەر تەندروستی مرۆڤ، بۆ چارەسەریش دەبێت كارگەی توانەوەی زبڵ و خاشاك بۆ سۆران دروستبكرێت و پێم وایە لەو گرفتە رزگارمان دەبێت.
مەغدید عەریف ئەحمەد، بەڕێوەبەری ناحیەی دیانا بە زاری كرمانجی راگەیاند: لۆفەكانی سیتكان دەكەوێتە دەرەوەی ماستەرپلانی ناحیەی دیانا، ئەگەر چی پێشتر چەندین جار هەوڵمانداوە كەوا رێگە نەدەین ئەو زبڵا و خاشاكە لەوێ فڕێبدرێت، بەڵام بۆمان نەكرا و هاووڵاتییانیش هاوكارمان نەبوون، ئەمە لە كاتێكدایە كۆمپانیای پاپا گرۆپ رۆژانە زبڵ و خاشاك كۆدەكاتەوە.
بەڕێوەبەری ناحیەی دیانا راشیگەیاند: هیچ پڕۆژەیەك بۆ ئەو شوێنە نییە، بەڵام ئێمە وەك ناحیەی دیانا لە بەرنامەماندایە كەوا لە وەرزی پایزی ئەم ساڵدا چەند دارێك لەوێ بچێنین، ئەمەش بۆ ئەوەیە كەوا هەم چیتر هاووڵاتییان زبڵا و خاشاك لەوێ فڕێنەدەن، لە لایێكی تریشەوە دیمەنێكی جوان و سەرەنج راكێش دەبێت و هاووڵاتییان دەتوانن بۆ كات بەسەر بردن سەردانی بكەن.

زۆرترین بینراو