ساڵی رابردوو لە سۆران 33 شوێن داخراون و 11 خاوەن كاریش دراونەتە دادگا

ساڵی رابردوو لە سۆران 33 شوێن داخراون و 11 خاوەن كاریش دراونەتە دادگا

رائیب شێروانی – سۆران: رێبوار مەحموود، بەرپرسی لیژنەی ئابووری سۆران لە دیدارێكدا لەگەڵ هەفتەنامەی زاری كرمانجی دەڵێت:" لە ساڵی 2019 توانیومانە دەست بەسەر زیاتر لە یەك تۆن كەلوپەلی تەندروستی، تۆنێك و نیو كەلوپەلی جوانكاری، لەگەڵ پێنج تۆن كەلوپەلی خواردن و خواردنەوە بگرین و لەناو ببەین، لەگەڵ ئەوەی 33 شوێن داخراون، بە هۆی پابەندنەبوون بە مەرج و رێنماییەكانی لیژنە، 11 خاوەن كاریش دراونەتە دادگا و بەبڕی 20 ملیۆن دینار سزا دراون و پارەكەش بۆ خەزێنەی حكوومەت گەڕێندراوەتەوە. دەشڵێ:" هەر كەسێك بەردەوام بێت لەسەر فرۆشتنی كەلوپەلی ماوەبەسەر چوو شوێنەكەی دادەخرێت و بۆی نیە جارێكی دیكە ئەو كارە بكاتەوە.
بەرپرسی لیژنەی ئابووری سۆران گووتی:" وەكو لیژنەكانی قایمقامیەت هەفتانە بێجگە لەو دوو رۆژەی كە دیاری كراوە، كە رۆژانی دوو شەممە و چوارشەممەیە، هەندێك رۆژ سەردانەكانی خۆمان دەگۆڕین بۆ ئەوەی خەڵك، یان دوكاندارەكان نەزانن ئێمە لە كام رۆژدا سەردانی ئەوان دەكەین، لەگەڵ ئەوەی لە دیوانی قایمقامیەت هۆبەی لیژنەی ئابووری هەیە لەوێ بانگهێشتی ئەوانە دەكەین كە سەرپێچیان كردووە، یان ئەوانەی كە پێویستە مۆڵەت دەربهێنن، بەو شێوازە كارەكانی خۆمان رادەپەڕێنین، سەردانی هەموو شوێنەكان دەكەین و رۆژانە بەدواداچوونی ئەو سكالایانە دەكەین كە ئاراستەی لیژنەكانی قایمقامیەت دەكرێن.
رێبوار مەحموود، گووتیشی:" تەنیا سەردانی بازاڕ ناكەین، بەڵكو سەردانی هەموو دوكان و كۆگاكانی كۆڵانەكان دەكەین، بەتیبەتی ئەو شوێنانەی فرۆشیاریان زۆر نیە، لەوانەیە زیاتر كەلوپەلی ماوەبەسەرچوو لەوێ هەبێت، بۆیە زیاتر گرنگی بە گەڕەك و كوڵانەكان دەدەین، لە ناحیەكانیش لیژنەی ئابووری هەیە، ئەوان بەردەوام سەردانی دوكان و سۆپەرماركێتی ناو ناحیە و گوندەكان دەكەن.
رێبوار مەحموود، بەرپرسی لیژنەی ئابووری سۆران جەختی لەوەشكردەوە:" هەر كەسێك كەلوپەلی ماوە بەسەرچوو بفرۆشێت، بەپێی ئەو كەلوپەلانەی كە دەستی بەسەردا دەگیرێن 20% نرخەكەی ئیجرائاتی لەگەڵ دەكەین، هەروەها ئەوانەی مۆڵەتیان بەسەرچووە سزا دەدرێن، ئێدی ئەوانە هەموو غەرامەی لەسەرە، هەر كەسێك لەسەر كارەكەی بەردەوام بێت شوێنەكەی دادەخرێت و مۆلەتەكەی لێ وەردەگیرێتەوە و بۆی نیە جارێكی دیكە ئەو كارە بكاتەوە.
رێبوار مەحموود، بەرپرسی لیژنەی ئابووری سۆران ئاشكراشی كرد:" هەتا ئێستا ئامارێكی وا نیە كە كەلوپەلی ماوە بەسەرچوو ببێتە هەڕەشە لەسەر ژیانی خەڵكی سۆران، لەگەڵ ئەوەی خەڵك هۆشیار دەكەینەوە و رێنماییان پێ دەدەین، خەڵكێكی زۆر پابەندی ئەوەیە و رێنماییەكان جێبەجێ دەكات، دوكاندارەكان كەلوپەلی خۆیان ئەوانەی كە ماوەیان بەسەر چووە لەناو دەبەن، بەپێی ئەو ئامارەی كە لەبەر دەستی ئێمەدایە لە ساڵی 2019 توانیومانە دەست بەسەر زیاتر لە یەك تۆن كەلوپەلی تەندروستی، تۆنێك و نیو كەلوپەلی جوانكاری، لەگەڵ پێنج تۆن كەلوپەلی خواردن و خواردنەوە بگرین و لەناو ببەین، لەگەڵ ئەوەی 33 شوێن داخراون، بە هۆی پابەندنەبوون بە مەرج و رێنماییەكانی لیژنە، 11 خاوەن كاریش دراونەتە دادگا، بە بڕی 20 ملیۆن دیناریش غەرامە كراون و ئەو پارەیەش بۆ خەزێنەی حكوومەت گەڕێندراوەتەوە.
بەرپرسی لیژنەی ئابووری سۆران جەختی لەوەشكردەوە:" ئەو كەلوپەلانەی دەستی بەسەردا دەگرین جۆراوجۆرن، لەوانە كەلوپەلی خواردن، خواردنەوەیە، كەلوپەلی جوانكارییە، بەگشتیی خواردن و خواردنەوەی تێدایە، ئەو ماددانەی ماوەیان بەسەر چوو بێت دەست بەسەردا دەگرین و لەناو دەبەین.
بەرپرسی لیژنەی ئابووری سۆران دەشڵێ:" بڕیارێكی گشتی نیە كە رێگری بكەین لەو كەسانەی كە لە سەر شەقام شت دەفرۆشن و چێشتخانەی گەڕۆكیان لەسەر شەقام داناوە و خواردن دەفرۆشن، تەنیا دەتوانین كارتی تەندروستیان پێ دەربهێنین و پابەندی بڕیارەكانی تەندروستیان بكەین.
رێبوار مەحموود، بەرپرسی لیژنەی ئابووری سۆران دیاركرد:" هەتا ئێستا خەڵك زۆر لەگەڵ ئێمە هاوكارە، خەڵك ئاگادارمان دەكاتەوە لە كەلوپەلی ماوە بەسەرچوو، بۆیە هۆشیاری خەڵك زۆر باشە، لەگەڵ ئەوەشدا رێنمایی بە خەڵك دەدەین و گرنگی بە خاوەن كارەكان دەدەین و هانیان دەدەین بۆ كاری باشتر، ئاسانكاریان بۆ دەكەین بۆ ئەوەی بە ئاسانی مۆڵەت دەربهێنن و پابەندی بڕیارەكانی تەندروستی بن".

زۆرترین بینراو