سۆران عومەر بە قسەی كێ داوای هەڵوەشاندنەوەی قەوارەی هەرێم دەكات؟

سۆران عومەر بە قسەی كێ داوای هەڵوەشاندنەوەی قەوارەی هەرێم دەكات؟

موڕشید برادۆستی – سۆران: لە ماوەی رابردوو، پەرلەمانی كوردستان بە زۆرینەی دەنگی ئەندامانی بڕیاریدا بە هەڵگرتنی پارێزبەندی پەرلەمانتارێكی فڕاكسیۆنی كۆمەڵی ئیسلامی كوردستان، دووای هەڵگرتنی پارێزبەندییەكە، ئەو ئەندامەی پەرلەمانە بەردەوام سوكایەتی بە سەروەری و پیرۆزیەكانی كوردستان دەكات و هانی خەلك دەدات دژی حكومەت و دەسەڵات بوەستنەوە.
سۆران عومەر لە پەیجی تایبەتی خۆی لە تۆڕی كۆمەڵایەتی فەیسبووك وەك پیشەی بەردەوامی نووسیوویەتی" دوای 29ساڵ حوكمڕانی ئەم هەرێمە شكستی هێناوە، پێویستە قەوارەكە هەڵوەشێتەوە و لەگەڵ ئەم سیما دیارە قێزەونانەی هەرێم ".
ئەو ئەندامەی فڕاكسیۆنی كۆمەڵی ئیسلامی سوكایەتی زۆر بە سەروەری و پیرۆزیەكانی كوردستان كردووە دیار ترینیان هەڵوەشاندنەوەی قەواەری هەرێم كە بە رەنج و خەبات و خوێنی هەزاران خەلك درووست بووە و قوربانیەكانی زۆر بۆ ئەم ئازادیە دراوە و ئەویش داوای هەڵوەشاندنەوەی دەكات، ئەمەش چین و توێژەكانی كوردستانی نیگەران كردووە و پێییان وایە سۆران عومەر بە قسەی ناحەزان و دوژمانانی گەلی كوردستان هەڵسووكەوت دەكات و پۆستەكەی بۆ دژایەتی حكومەت و قەوارەی هەرێمی كوردستان بەكاردێنێت".
زاری كرمانجی لە راپۆرتێكیدا بۆچوونی چین و توێژەكان لە بارەی هەڵوەشاندنەوەی قەوارەی هەرێم كە لەلایەن سۆران عومەرەوە داواكراوە دەخاتەڕوو.. ئەمیر حاجی كەمال بەرپرسی مەكۆی گۆڕان لە سۆران بە زاری كرمانجی گووت" قەوارەی هەرێمی كوردستان قەوارەی حزبەكانی پارتی، یەكێتی، گۆڕان یا كۆمەڵی ئیسلامی و هیچ حزبێك نییە بە تاقی تەنها و ناشتوانن بڕیار لە بارەی هەڵوەشاندنەوەی بدەن، بەدیهاتنی قەوارەی هەرێم كە قەوارەیەكی یاسایی و دەستوورییە، خەون و خولیای نەتەوەیەك بوو كە لە چەندین دەیەی رابردوودا خەلكی كوردستان خەون و ئاواتیان پێوەبینیووە و خەباتی بۆ كردووە و خوێنیان بۆ ڕێشتووە، لەگەڵ ئەوەشدا تێبینی زۆرمان لەسەر دەسەڵات و هەبوونی گەندەڵی هەیە".
زیاتر گووتی" پێویستە دەسەڵات پێچداچوونەوە بەخۆی بكات و گۆڕانكاری بكات و بەرژەوەندی گشتی پێش بەرژەوەندی حزبی بخرێت كار نەگاتە ئەو رادەی هاووڵاتییان و هەتا ئەندامانی پەرلەمانیش داوای هەڵوەشاندنەوەی قەوارەی هەرێم بكەن و خواستی نەمانیان هەبێ، بەڵام نەهێشتنی قەوارەی هەرێم تەنها لە بەرژەوەندی دوژمنان و ناحەزانی كورد و كوردستانە و بەشێك لە وڵاتان ئاوات بەم رۆژە دەخوازن".
ئەو بەرپرسەی گۆڕان ئاشكراشی كرد" هەرێمی كوردستان پێشكەوتووە و جاران بەغدامان بە هەرێم دەشكاندەوە و داوامان دەكرد ئەزموونی كودستان بۆ پێشكەوتن بگوازنەوە عێراق، بەڵام دەبینین لە ئێستەدا خەریكە قەیران لە دوو قەیران روومان تێدەكات و دۆخەكە ئاڵۆز دەبێ، خەریكە كەسانی وەك سۆران عومەر بێ ئومێد دەبن بۆیە ئەم جۆرە قسانە دەكەن، لەلای خۆمەوە ئەم جۆرە قسانەی باس لە هەڵوەشاندنەوەی قەوارەی هەرێم دەكرێت رەتدەكەمەوە و قەوارەی هەرێمی كوردستان مولكی هەموو خەلكە، نەمانی قەوارەی هەرێم لە ناو بردنی خەباتی 100 ساڵەی ملەتی كوردە، هیوادارم هیچ كوردێك پیلانی ناحەزان جێبەجێ نەكات و ئەو خەونەی دوژمنان لە گۆڕ بنێن".
شەوكەت برادۆستی چاودێری سیاسی بە زاری كرمانجی گووت" ئەم قسانەی سۆران عمر بۆ من چاوەڕوانكراو بوون چونكە ئەمە حەقیقەتی ئایدەلۆژیای خۆیەتی كەپێ وایە هەموو قەوارە و حوكمێك بەتاڵە جگە لە قەوارەی ( شەرع و ئیسلام ) رەنگبێ جوانترین پێناسە و ناساندنی كەسێتی ئەو كابرایە لای مەلا كرێكاری كۆنە هاوڕێ بێت كە دەلێ. سۆران عمر (سامری نێو كوردە) هەرگیز باوەری پێ مەكەن و خۆفرۆش و دوو ڕووە. ئیتر ئەوانەی دەزانن سامری چیە و كێیە تێدەكەن كە سۆران عومەر چ ڤایرۆسیێكە".
زیاتر دەڵێ" قەوارەی هەرێم دەستووریە لە چوار چێوەی عێراقێكی فدڕاڵ چەسپێنراوە بۆ كوردە و بۆ هیچ حزب و كەسێك نییە ئەمەش بەرهەمی خەبات و تێكۆشان و قوربانیدانی سەدان ساڵەی میلەتەكەمانە واتە منەتێك نییە بە سەر كورد. من ئەو قسە پڕو وپوچانەی پرۆستۆ و ڕەتدكەمەوە وەك كورد داوا دەكەم سزا بدرێت. لەگەڵ ئەوەشدا دەزانم خودی ئەم كەسە ئاڕاستە دەكرێت بە فیتی لایەن و كەسانی تر بۆ مەرام ئامانجێكی تر، بەڵام دواجار ئەم جۆرە هەوڵانە ئەم جۆرە قسانە كاریگەری خرابیان دەبێت جۆرێك لە بوێری و دەستكراوەی بە دووژمنانی كورد دەدەدات بۆ دژایەتی زیاتری ماف و دەخوازیە ڕەواكانی .( ئانارشیزم ) دەستەواژەێكی سیاسیە بۆ ئەم جۆرە كەس و تاقم و حزبانەیە كە هەمیشە بە ئاراستەی جیاوازی كۆمەلگە و دژی هەموو شتێكی كۆمەلگە رێدەكە لەگەڵ هیچ دۆخێك جێگیر نین و بە باش دەلێن خراپ و بە خراپ دەلێن باش هەمیشە بۆ كێرەشێوێنی (فوچی ) ی كۆمەلگە كار دەكەن. دەبێت ئەمانە سڕ بكرێن رێگریان لێبكرێت بۆ ئەوەی كەڕای توخمی زیاتر دا نەنێن ".
لەو بارەوە، یادگار ئیسماعیل مامۆستای زانكۆ بە زاری كرمانجی گووت" هەرێمی كوردستان، باشوور، دوای خەباتی 87 ساڵ لە عێراقی دروستكراوی كۆلۆنیالیزم وەك پێكهاتەیەكی یاسایی و سیاسی هاتۆتە بوونەوە. كوردستانیانی باشوور زیاتر لە 200 هەزار قوربانیان بۆ خۆڕێبەری و زیاتریش داوە، ئەگەر سیاسییەكان كاریان بۆ بكردایە. هەرێمی كوردستان بەرهەمی راستەوخۆی كەمدەرامەتترین قوربانی و شەهیدی ڕێگەی ئازادیە، ناكرێت كیمیا باران، ئەنفال، كۆمەڵكوژیی، شەڕ و مافی سروشتی زمان و بوونی سیاسی و ئابووری بكرێتە قوربانی خۆبەڕێوەبردنێكی خراپ و بەرهەڵستكار ی ناڕەسەن و نا كوردستانی؛ كوردستان لە هەموومان گەورەترە".
ئەو مامۆستای زانكۆ دەڵێت" ناپرژێمە سەر ناوی ئەو كەس و لایەن و جاشانەی بانگەشە بۆ هەڵوەشانەوەی قەوارە و پێكهاتەی یاسایی و سیاسی و هەرێمی كوردستان دەكەن. بەداخەوە، ئەوان دەریان خست هەرگیز جێگرەوەی دەسەڵاتی ئێستا نابن و شایان نین و گەلی كوردستان پشتیان پێ نابەستێت. ئەمانە زیاتر لەو دژەدامەزراوە (ئانارشیست) و مافیایانە دەچن كە سوود لە قەیران وەردەگرن بۆ داهات و سامان كۆكردنەوە. لەوە داخرابتر، دوای نزیكەی 100 ساڵ لە فەرمانڕەوایی بەغداد بەسەر كوردستان، بوونی خواستی وەهایە كە پێی وابێت دەسەڵات لەدەست ئەو نەبێت دەبێت بڕووخێت! ئەمە نەك تەنیا لاوازی ئەو بەناو بەرهەڵستكارانە نیشان دەدات، بەڵكو دەریدەخات هیچ پلانێكیان بۆ دوارۆژێكی باشتر و گرتنە دەسەڵاتیش نیە؛ كەواتا تا لە بێهیوا دووربكەوینەوە باشترە".
دووپاتی كردەوە، چۆن بە ئیمڕۆ گەیشتین رابردووێكی تاڵە، رێگە ڕاستەكە ئەوەیە پرسە نێوخۆییەكان هەرگیز تێكەڵ نەكرێن. بەداخەوە، تۆی بەناو بەرهەڵستكار كە. داوای بڕینی بودجە و داهاتی هەرێمی كوردستان لە عێراق دەكەیت راستەوخۆ ئەو دەنگدەرانەی ئێوەن كە بە بانگەشەی قەبە بۆ دەنگپێدانتان هەڵتان خەڵەتاندن؛ بڕینی بودجە و قوتی خەڵك لە بەغدا بە پلە یەك كاریگەری لەسەر خەڵكی هەژار و نەدار و چینی كرێكارە، بە زمانی چەپبوونی خۆیان! سەرەڕای ئەوەش، خراپی بارودۆخی ئابوری بە شێوەیەكی كاتی، كە هەر تێدەپەڕێت، پاساوێكی لاواز و نا بابەتیە. كورد و كوردستانیان بارودۆخی زۆر خراپتریان لەم بارودۆخە تێپەڕ كردووە. وەك ڕوونە گەلە كۆمەكێیەكی هەرێمی تەواوكاری هێرشەكانی 16 ی ئۆكتۆبەرە؛ هەوڵی لاوازكردنی تەواوەتی هەرێم یان هەر سڕینەوەی دەدرێت ئەگەر بۆیان بلوێت.
بە گووتەی ئەو مامۆستای زانكۆ" پیلانێكی سێ كۆ یەك هەیە لە ناوچەكە دژی پێكهاتەی یاسایی و سیاسی هەرێمی كوردستان، باشوور، ئێستاش ئاماژەكانی ڕوونتر دەردەكەون. ئەمە لە كاتێكدایە رۆڵی نەرێنی ئەو بەناو بەرهەڵستكارانە ئەركی خەڵكی هەرێمی كوردستان ی بە پلە یەك ئینجا دەسەڵات (بە زمانی خۆیان) زۆر قورستر كردووە و لاوازیان كردووە. ئەمە دەریدەخات بەرهەڵستكارەكانی باشوور لاواز و بێ پلان و بێ متمانە و ستراتیژن، چونكە بەرهەڵستكاری كارا و كردارەكیی هەرگیز ئەو دەسەڵات و قەوارەیە لاواز ناكات كە بۆ گرتنەدەستی دەسەڵاتەكەی بەشێوازی دێمۆكراتی خەبات بكات و هیوای بە گرتنە دەسەڵات بێت".
هەڵگورد عەبدولوەهاب جوندیانی چاودێری سیاسی لە كوردستان بە زاری كرمانجی گووت" هەرێمی كوردستان قەوارەیەكی سیاسی و ئیداریی یاساییە لەباشووری كوردستان، لەدەستوری عراقدا بەروونی ئاماژەی پێكراوە، لەروویی نەتەوەییشەوە، هەرێمی كوردستان تاكە قەوارەیەكی یاساییە كە بەپێی دەستوری عراق متمانەی نێودەوڵەتیشی وەرگرتووە، ئەم قەوارەیەش هەروا بەخۆڕایی دانەمەزراوە بەڵكو نەتەوەی كورد لەپێناویدا رووبارێك خوێنیبەخشیوە و شاخێك لە كەلەسەر و ئێسك و پروسكی جینۆسایدكراوانی ئەنفال و راگواستنی خەڵك و سوتماككردنی ولاتێك بۆتە قوربانی.
زیاتر گووتی" ئەم قەوارەیە موڵكی هیچ حزبێكی سیاسی نییە، بەڵكو موڵكی گەلی كوردستان و نەتەوەی كوردە لەباشووری كوردستان، هەر كەس و لایەنێك بەهەر بیانوێكەوە بێت داوای هەڵوەشاندنەوەی ئەم قەوارەیە بكات، پێویستە لەخانەی خیانەتكاری بە نەتەوەی كورد و خەباتی سەد ساڵی هەژماربكرێت و قورسترین سزا بدرێت و لەئاستی نەتەوەیی و كۆمەڵایەتیشدا ریسوابكرێن".
ئاماژەشی بەوەدا" لەئێستادا هەر چوار دەوڵەتی داگیركەری كوردستان، بەچڕی كار لەسەر تێكشكاندنی بونیادی هەرێمی كوردستان دەكەن، مانەوەی ئەم قەوارەیە بەزیندوویی و بەهەژموون بۆ هەموویان جێگای مەترسییە بۆ ئەو بەشە كوردستانیانەی كە داگیریانكردووە، هەر چوار دەوڵەتە داگیركەرەكە سەرباری بوونی ناكۆكی و دوژمنایەتی مێژوویی و مەزهەبی لەنێوانیاندا بەڵام بۆ پیلانگێڕی بۆ لەناوبردنی یان بێهەژموونكردنی قەوارەكە رێك و گونجاون، لەم هەوڵانەشیان زۆر جار وەكیل و بریكارە ناوخۆكانیان بەكاردەهێنن".
لای خۆشیەوە، وەیسی سەعید ئەندامی پەرلەمانی كوردستان بە زاری كرمانجی گووت " بەداخەوە جارێكی تر سۆران عومەر ررق وكینەی خۆی دەربری بەرامبەر ئەزموونی سیاسی هەرێمی كوردستان كە لەسایەی دا بووبێتە ئەندامی پەرلەمان ئەمڕۆش هەقیەتی داوای ڕوخانی قەوارەی هەرێمی كوردستان بكات!. كەئەمەجاری یەكەمی نییە بەم شێوەیە دژایەتی ئەزموونی سیاسی هەرێمی كوردستان بكات، بەڵام لەدوای لێ سەندنەوەی پارێزبەندیەكەی لە پەرلەمانی كوردستان دەوێت لەم رێگایەوە زیاتر رق و كینەی خۆی دەرببڕی چونكە شین و ڕۆڕۆ و گریان و هانابردنێ بۆ هەندێك لایەن تاكو بەرگری لێ بكەن هیچ دادێكی نەدا، بۆیە كەسێك ئاوا بۆ كورسیەكەی خۆی بگری ئەبێ هەرئەمەی لێ چاوەرێ دەكرێ كە دژایەتی گەلەكەی بكات داوای هەڵوەشانەوەی قەوارەی دەستوری هەرێم بكات، كە بەرهەمی خەباتی سەدان ساڵەی رۆڵەكانی گەلی كوردستانە كە لەپێناوی رۆژێكی وەهادا خەباتیان بۆ كردووە".
زیاتر گووتی" دڵنیاین چۆن گەلی كوردستان لەرابردوودا خەونی دوژمنانیان لە گۆڕناوەوخەونی دەیان گروپی تیرۆرستی وەك داعشی لە گۆڕناوە، بەهەمان شێوەش خەونی سۆران عومەر و هاوبیرانیشی لەگۆڕدەنێ و هەرێمی كوردستانیش بەپارێزراوی دەمێنێتەوە. ئیدی پێویستە لە سۆران و هاوئاوازەكانی بپرسین كە داوای هەڵوەشانەوەی حكومەتی هەرێم دەكەن نازانن دوای نەمانی حكومەتی هەرێم هەزارانی وەك تۆ خاوەنی شەرەف و كەرامەت و حەرەمی ماڵی خۆشتان نابن ، دەزانی ئەم حكومەتە بێ جیاوازی خزمەتی هەمووان دەكات بەڵگەش ئەوەیە نوزەی تۆو دەیانی تری وەك تۆ لەژێر ئەزموونی ئەم حكومەتە هەڵدەقوڵێ كە بۆی ڕەخساندوون ، بەڵام ئێوە بە بێ ویژدانی و بە پشتیوانی نەیارانی كورد ئاوازی خیانەتكارانە دەڵێنەوە".
ئەو ئەندامەی پەرلەمانی كوردستان دەڵێت" ئەگەر سۆران عومەر ڕاست دەكات با بڕوات سەرێك لە شاری كەركوك بدات، لەوەتەی خیانەتی 16 ئۆكتۆبەری لێ كراوە بزانە حاڵ و گوزەرانی كوردانمان لەوێ چۆنە ؟ چۆن ڕایان دەگوازن و خانوو دووكانەكانیان تێكدەدەن و گەنم و دانەوێڵەو بەرهەمەكانیان دەسووتێنن زەوی و زاریان داگیر دەكرێت، مەرد بەبڕۆ لە جیاتی دروشمی ڕوخانی هەرێم بەرزبكەیتەوە، مافی كوردانی كەركوك بگێڕێنەوە، گەر بۆشت نەكرا ئەوا دەتوانی داوای هاوكاری لە دلسۆزانت بكەی !. بەڵام دڵنیام تۆش و دەیانی وەك ئەو تەنها و تەنها دژی قەوارەی دەستوری هەرێمی كوردستانن و كە بۆشتان ناچێتەسەر و هەزارانی وەك ئێوە ئەم خەونەیان لەگەڵ خۆیان بردووەتە ناوگۆڕ و ئێوەش هەمان چارەنووستان دەبێت".
د . ڤیان سەبری سەرۆكی فڕاكسیۆنی پارتی لە ئەنجومەنی نوێنەرانی عێراق بە زاری كرمانجی راگەیاند" هەرێمی كوردستان هەرێمێكی فیدڕاڵییە لە عێراقدا، هەرسێ دەسەڵاتی یاسادانان و راپەڕاندن و دادوەری هەیە، لەسەر ئاستی نێودەوڵەتی نوێنەرایەتی زۆربەی زۆری وڵاتانی لێیە و هەرێمێكی باوەڕ پێكراوە، پەیوەندی سیاسی و دیبلۆماسی لەگەڵ وڵاتانی دنیادا زۆر بەهێزە، لە رووی جوگرافیا و ئەمنی و سەربازی شوێنێكی ستراتیژیە و هەمیشە دوژمنان چاویان لەسەر هەڵكەوتەی جوگرافیای ناوچەكەدا هەیە، لەرووی ئابووریەوە خاوەن پێگەیەكی ستراتیژی بەهێزە، بەهۆی نەوت و سامانە سرووشتییەكان".
زیاتر گووتی" قەوارەی هەرێمی كوردستان بە رەنج و خەباتی هەزاران شەهید درووست بووە و وەها با ئاسانی قبوولی هەلوەشاندنەوەی ناكرێت، ئەوانەی ئەو جۆرە قسانە دەكەن چاویان بە دەستكەوت و پێشڤەچوونەكانی هەرێمی كوردستان هەڵناێت، بۆیە وەك فڕاكسیۆنی پارتی لە پەرلەمانی عێراق ئیدانەی ئەم جۆرە داواكاری و قسانە دەكەین، پێویستە لێپێچینەوە لەگەڵ ئەو جۆرە كەسانە بهێتە كردن كە سوكایەتی بە پیرۆزی و سەروەریەكانی كوردستان دەكەن".

 

 

زۆرترین بینراو