سیروان بیەیی: كوردستان خاكێكی لەباری تەكنیكی سیخوڕی سێكسییە

سیروان بیەیی: كوردستان خاكێكی لەباری تەكنیكی سیخوڕی سێكسییە

وتووێژ- سوبحان شكۆ
سیروان بیەیی، نووسەر و لێكۆڵەری هەواڵگری لە وتووێژێكی تایبەت بە زاری كرمانجی رایگەیاند: "كوردستان لەژێر هەڕەشەیەكی ڕاستەقینەی تەكنیكی سیخوڕی سێكسی دایە، بەو پێیەی دەزگا هەواڵگرییەكانمان تا ئێستا نەگەیشتوونەتە ئاستی ململانێی هەواڵگریی جیهانی، دەكرێت بەشێك لە كەسایەتییە باڵاكانی كوردستان بكەونە ناو ئەم تەڵەیەوە(ئەگەر نەكەوتبن!)، ئێستا ئێران گەورەترین هەڕەشەیە بۆسەر كوردستان تا بگات بە ئامانجەكانی و سڵ لە هیچ تەكنیكێك ناكاتەوە".
لە دەستپێكی دیمانەكەدا، سیروان بیەیی، لە بارەی سیخوڕی سێكسی گووتی "(سیخوڕی سێكسی) چەمكێكی بازاڕییە بۆ بەدەستهێنانی زانیاریی هەواڵگری، بە بەكارهێنانی جۆرێكی تایبەت میتۆدی ئاژانسێكی هەواڵگری، كە تیایدا ئەندامێك یا هەواڵدۆزێكی دەزگایەكی هەواڵگری یا ئاسایش هەوڵدەدات زانیاری هەواڵگری لە كەسێك بەدەست بهێنێت بە دروستكردنی پەیوەندیی سۆزداریی یا پەیوەندیی سێكسی لەگەڵ كەسێك كە هەڵگری چەند زانیارییەكی دیاریكراوی هەواڵگرییە، لەهەمانكاتدا بنیادنانی متمانە كە ببێتە هۆی ئاشكرا كردنی، جا چ بە ئاگایی یا بێ ئاگاییانە، زانیاریی هەواڵگری كە سوودیان هەبێت بۆ دەزگایەك یا هەڕەشەی ئەوە بكات كە ئەگەر كەسە سێكس لەگەڵ كراوەكە زانیارییە پێویستەكە نەدركێنێت تووشی تەنگوچەڵەمەی مەزنی دەكەن بەهۆی ئاشكرا كردنی ئابڕووچوونەكەی و خیانەتی نیشتیمانی، ئەمجۆرە تێوەگلانە لە چەمكسازیی هەواڵگریدا پێی دەوترێت (تەڵەی هەنگوینی) كە پێناسەكەی بەم جۆرەیە، بریتییە لە هونەری هەڵخەڵەتاندنی دوژمن لەڕێگەی تەڵەیەكی سێكسییەوە، تیایدا ئامانجەكە رووبەڕووی بەڵگەی وێنەیی دەكرێتەوە، ئەمەش هۆكارە بۆ هەڕەشە كردن لە پیشە و نێوزڕاندنی كەسی ئامانج، لەمەوە بۆمان دەردەكەوێت پێناسەكە تەنیا لە رەگەزێكی تایبەتیدا كورت نابێتەوە بەڵكو هەردوو رەگەزەكان دەكاتە ئامانج بەبێ جیاواز و بەگوێرەی دۆخی پێویستیی بەرژەوەندی هەواڵگری وڵاتێكی دیاریكراو. ئاشكرایە، دەزگا هەواڵگرییەكان بۆ دەستخستنی زانیاری، بەئامانجی پاراستنی بەرژەوەندی و ئاسایشی نیشتیمانی، هەموو كارێك ئەنجام دەدەن بۆ ئەوەی بتوانن وڵاتەكەیان بپارێزن. بەم هۆیەشەوە، تەنانەت بەر لە جەنگی جیهانی یەكەم سیخوڕیكردن بەهۆی سێكسەوە لەلایەن ژاپۆنییەكانەوە ئەنجام دراوە. ئەمە بەڵگەیە لەسەر ئەوەی مێژووی ئەم پیشەیە دەگەڕێتەوە بۆ زیاتر لە یەك سەدە. بەرلە دەستپێكردنی جەنگی جیهانیی دووەم(لەكاتی جەنگەكەشدا)، نازییەكان و سۆڤیەتییەكان ئەم تەكنیكەیان لەدژی یەكتر پەیڕەو كرد، كە تەنانەت گەیشتە ئاستێك سۆڤیەت توانی بەرپەرچی هێرشێكی مەزنی نازییەكان لەساڵی 1942 بداتەوە بەهۆی ئەو زانیارییانەی ئافرەتێك لە فەرماندە سەربازییەكان، بەهۆی سەرجێیكردن لەگەڵیدا، وەریگرتبوو. ئەمە پێمان دەڵێت، گرنگ نییە میتۆدەكانی پاراستنی وڵات چین، گرنگ ئەوەیە بە چ شێوەیەك ئەنجام دەدرێن. كچ و ئافرەتی جوان(تەنانەت كوڕە قۆزەكانیش) هەمیشە دەتوانن رۆڵی خۆیان بگێڕن لەم چەندەدا، بەتایبەتی لە وڵاتانی جیهانی سێیەمدا كە شەرەفی سێكسی تیایاندا بایەخێكی زۆری پێدەدرێت. سەڕەڕای پێشكەوتنی تەكنەلۆژیا، ئەم میتۆدە هێشتاش دەتوانێت رۆڵی باڵای هەبێت لە فریودانی كارمەندی هەواڵگری، سەربازیی، و سیاسەتمەدار و دارێژەرانی سیاسەتی وڵاتێك. سروشتی ئەم میتۆدە بەشێوازێكە، ئەگەر راهێنانی چڕی لەسەر كرابێت، كەسایەتی مرۆڤ بەتەواوی دەستەمۆ دەكات و هەرچییەكی هەیە بۆ فریودەرە سێكسیەكە دەیدركێنێت".
سیروان بیەیی، زیاتر لەبارەی سیخوری سێكسی لە نێو دامەزراوە و شوێنە گشتییەكانەوە گووتی "مەرج نییە تەنیا كەسانی خاوەن پێگەی باڵا لە دەزگا هەواڵگریی و دامەزراوە سیاسییەكان بكرێنە ئامانج یا ئەم كارە ئەنجام بدەن، جاری وا هەیە هاووڵاتییەكی ئاسایی دەخرێتە ناو وەها تەڵەیەكەوە. بۆ نموونە، لە وڵاتە هەستیارەكاندا وەك ئیسرائیل و ئێران ئەم تەكنیكە لەناو هۆتێلەكاندا پەیڕەو دەكرێت و وێنە گیراوەكە دەخرێتە ناو داتا بانكێكی تایبەت بە دەزگا هەواڵگرییەكە و لەكاتی پێویستدا لەدژی ئەم كەسە بۆ ئەنجامدانی كارێك بۆ بەرژەوەندی ئەوان بەكار دەهێنرێتەوە. ئابڕووبردن یا ئابڕووچوونیش لە كۆمەڵگایەك بۆ كۆمەڵگایەكی تر دەگۆڕدرێت. بەڵام سەبارەت بە كۆمەڵگایەكی وەك كۆمەڵگای كوردستان كە (شەرەف) رۆڵێكی باڵای تێدا دەگێڕێت، خاكێكی بەپیتی ئەم تەكنیكەیە. بەهۆی نەریت و ئایینەوە، لە زۆربەی وڵاتانی سێیەمدا، بەرپرسان دەكرێنە ئامانج بۆ ئەوەی لەم ڕووەوە بتوانن زانیاریی پێویست بەدەست بهێنن. تا ئەو كاتەی پیشەی سیخوڕی هەبێت، رۆمیۆیەك هەیە دەستی دەگاتە هەموو نهێنییەكان".
لە زۆربەی حاڵەكاندا ئافرەت دەبێتە كەرستەیەكی گونجاو بۆ دانانی ئەم تەلەیە، لە وەڵامی پرسیاری بۆچی ئافرەت كەرەستەیەكی واباشە بەلای ئەوانەی ئەم كارە دەكەن بییەی گووتی" بەشێكی دانەبڕوای سروشتی مرۆڤ ئەنجامدانی كردەی سێكسییە، جا هەیانە بۆ وەچەخستنەوە و بەردەوامیدان بە ژیانە، هەشیانە تەنیا بۆ خۆشییەكی كاتی و مەرامێكی هەواڵگرییە. هەروەك ئاشكرایە لەشفرۆشی و سیخوڕی دوو لەپیشە هەرەكۆنەكانی جیهانن. لەكاتێكدا رەنگە ئەمە وەك شتێكی ئاسایی لێكبدرێتەوە، بەڵام بەدڵنیاییەوە لەسەر حەقیقەت رونراوە. لەڕووی مێژووییەوە، هەم ئافرەت هەم پیاو جوانی و كەسایەتی كاریزمی وەك ئامرازێك بەكارهێناوە بۆ لەخشتەبردنی و خستنەتەڵەی كەسانی خاوەن دەسەڵات بۆئەوەی زانیاری لێیانەوە وەچنگ بخەن. واپێدەچێت شێوازی هەرەكۆنی سیخوڕی، بەتایبەتی هەواڵگریی مرۆیی، خەریكە دووبارە سەردەردەهێنێتەوە. بەشێكی هۆكارەكە رەنگە بۆئەوە بگەڕێتەوە كە وڵاتان توانیویانە بەشێوەیەكی پێشكەوتووانە پەرە بە دەزگا بەرگرییەكانی وڵاتەكەیان بدەن، بەتایبەتی وڵاتانی رۆژئاوا، ئەمەش دوژمنەكانیان ناچاركردووە بە گەڕانەوە بۆ میتۆدە كۆنەكانی سیخوڕی. یەكێتی سۆڤیەتی جاران بەشێكی تایبەتی لەناو دەزگای هەواڵگریی وڵاتەكەی(KGB) كردبووەوە بۆ ئەوەی بتوانێت لە جەنگی سارددا بەرپەرچی ئەمریكییەكان بداتەوە.بەدەر لە ئافرەتان، پیاوانیش رۆڵی باڵا دەگێڕن لەم چەندەدا. دەشێت پیاوێك رۆڵی لەخشتەبردنی ئافرەتێك بگێڕێت كە لە دەزگایەكی هەواڵگریدا كار دەكات بەتایبەت ئەگەر ئەم ئافرەتە لە شووكردنی دواكەوتبێت. جگە لەمەش، جاری وا هەیە ئەم لاوە قۆزە دەتوانێت هەر لەم رێگایەوە پیاوەكانیش لەخشتەبەرێت، ئەمەش لەڕێگەی راكێشانی سەرنجی ئەو پیاوە بەلای خۆیدا بۆ ئەنجامدانی كردەی هاوڕەگەزبازی. میتۆدەكانی ئەنجامدانی كاری سیخوڕی زۆر و زەوەندن، سیخوڕی سێكسی تەنیا یەكێكە لەمانە. سەڕەڕای ئەمەش، لە رۆژهەڵاتی ناوەڕاست ئافرەت كلیكی كۆكردنەوەی زانیارییە لە رێگای مرۆڤەوە. ئافرەتە رووسییەكان لەم نێوەندەدا دەكەونە چەقی تەكنیكەوە. رۆڵی ئافرەت ئەوەندە گرنگە كە دەتوانێت ببێتە هۆی راگرتنی جەنگێكی مەترسیداری نێوان دوو وڵات یا بەپێچەوانەوە ببێتە هۆی هەڵگیرساندنی جەنگێكی وەها. لە جەنگی جیهانیی دووەمدا تەنانەت ئەم هونەرە خۆی خزاندە ناو پێخەفی ئەدۆلف هیتلەر كە بووە هۆی ئاشكراكردنی نەخشەی جەنگی نێوان ئەڵمان و رووسەكان كە لەم جەنگەدا بەهۆی ئەم ئافرەتەوە رووسیا لە داگیركارییەكی راستەقینە رزگاری بوو. زیڤی لیڤنی، وەزیری پێشووی دادی ئیسرائیل، خۆی دان بەوەدا دەنێت كە لەگەڵ چەندین سەركردەی عەرەبدا خەوتووە بۆ خزمەتكردن بە وڵاتەكەی".
لەكۆتایی وتووێژەكەدا، سیروان بیەیی ئەمەی خستەڕوو: " كاری سیخوڕی بەتەواوی نەبەستراوەتەوە بە سیخوڕی سێكسی، ئێستا میتۆدی پێشكەوتووتر هاتووە. بەكارهێنانی ئینتەرنێت لەم سەردەمەدا ئامرازی هەرە سەرەكییە بۆ كۆكردنەوە زانیاری لەسەر بەرپرسە باڵاكان. كار گەیشتۆتە ئەوەی لەم سەردەمەدا تەنانەت ئەگەر لاپتۆپەكە كوژاوەش بێت، دەزگا هەواڵگرییەكان دەتوانن گوێیان لە دەنگی تۆ بێت، یان ئەگەر شاشەكەی كراوە بێت، دەتوانن تەنانەت كامێراكە چالاك بكەن و وێنەش بگرن(لەوكاتەشدا كە تۆ خەریكی كردەی یاسایی لەگەڵ خێزانەكەتدا. ئەگەریش ویستێك هەبێت بۆ خۆپاراستن یەكەم كارێك كە كەسێك ئەنجامی بدات بۆ خۆپاراستن لەم تەڵەیە بریتییە لە دووركەوتنەوە لە بۆنە فەرمییەكان، بەتایبەتی كارمەندانی دەزگا هەواڵگرییەكان. ئافرەتە سیخوڕەكان(پیاوەكانیش) بەشێوەیەك راهێنانیان پێ دەكرێت كە بتوانن لایەنی هەستیی خۆیان كۆنترۆڵ بكەن لەكاتی سەرجێیكردندا وە بەشێوەیەكی دەستكردانە خۆیان وادەرخەن كە لە سێكسەكەدا جیددین و گەیشتوونەتە لووتكەی چێژ، كە لەڕاستیدا وانییە! جگە لەمەش، پێویستە دەزگا هەواڵگرییەكان بەشێكی تایبەت بۆ بەرەنگاربوونەوەی ئەم تەكنیكە بكەنەوە، جگە لەمەش دەكرێت ئێمەی كوردیش بەشێك بین لە بەكارهێنانی ئەم تەكنیكە لەدژی نەیارانمان".

 

زۆرترین بینراو