سەرۆكی شارەوانی بلێ: بلێ پێویستی بە چەند پڕۆژەیەكی دیكەی خزمەتگوزاری هەیە

سەرۆكی شارەوانی بلێ: بلێ پێویستی بە چەند پڕۆژەیەكی دیكەی خزمەتگوزاری هەیە

رەمەزان هەرنی- شارۆچكەی بلێ: لە سنووری شارۆچكەی بلێ لە دەڤەری بارزان ژمارەیەك پڕۆژەی خزمەتگوزاری ئەنجامدراون. سەرۆكی شارەوانیش گلەیی ئەوە دەكات كە وەكو پێویست پڕۆژە لە سنووری شارەوانیی بلێ ئەنجام نەدراون و لەپلانماندایە لە چوار ساڵی داهاتوودا پڕۆژەی زیاتر لە سنوورەكە ئەنجام بدەین و شەقامەكانی بلێ بە دوو ساید بكەین.
نادر محەمەد، سەرۆكی شارەوانی بلێ بە زاری كرمانجی گۆت:" نزیكەی ساڵێكە وەكو سەرۆكی شارەوانی لە بلێ دەست بەكاربوومە، لەگەڵ دەستبەكاربوونم دەستمان كرد بە ئەنجامدانی پڕۆژە، ئەوەی بینیم پڕۆژە زۆر كەم بوون لەناو سەنتەری شارۆچكەی بلێ، چونكە زۆربەی كۆلانەكانی تێهەڵەكردنیشی وەك پێویست نەبوون، سەرەڕای قیرتاو نەكردنیان، كۆنكریت نەكراون شارۆچكەی بلێ زۆر مەغدوورە، بەهۆی خراپی رێگا ناوخۆیەكان هەندێك ماڵ بە ئەستەم هاتووچۆیان دەكرد بەتایبەتی لەوەرزی زستاندا كە ژمارەیان چوار كۆلان بوون، توانیمان ئەو چوار كۆلانە چارەسەریان بۆ بدۆزینەوە.
سەرۆكی شارەوانی بلێ گووتیشی:" شەقامی سەرەكی رێزان - بلێ كە بەردەوام ئاو دەهاتەوە سەر شەقامی گشتی توانیمان چارەسەری پێویست بۆ بدۆزینەوە لەگەڵ كۆمپانیای پاپا گرووب توانیمان شەقامەكە چارەسەری بۆ بدۆزینەوە، دەڤەری بارزان بەگشتی بە ناوچەیەكی ژینگەپارێزیی و سرووشتی ناسراوە، بەڵام لەناو سەنتەری شارۆچكەی بلێ رێژەیی سەوزایی زۆر كەمبوو، بۆیە ئەمساڵ دەستمانكرد بە چاندنی سێ جۆر نەمام كە ژمارەیان زیاتر لە هەزار نەمام بوو، سەرەتا لە شەقامی گشتی دەستمان پێكرد و توانیمان پرۆژەكە بۆ قۆناغی یەكەم تەواو بكەین و رووخساری شارۆچكەكە بگۆڕین، ئەو نەمامانە سەوزایەكی جوان دەبەخشن بە شارۆچكەكە و رێژەی سەوزایی لەچاو ساڵانی رابردوو زۆر زیادیكردووە.
نادر، ئەوەشی خستەروو:" بە رێژەیەكی فراوان شەقامە گشتییەكانی سنووری شارەوانی بلێ نۆژەنمان كردوونەتەوە بە بڕی 45 ملیۆن دۆلار لەسەر بودجەی وەزارەتی دارایی كە پێشتر ئەو شەقامە سەرەكیانە قیرتاوكرابوون، بەڵام بەهۆی زۆری بارانبارین و هاتووچۆی زۆر شەقامەكان هەمووی ببوونە چاڵ و تاسە، بۆیە بەخۆشحالیەوە ئەوانیش تەواوبوونە، ئێستا سەرەڕای ئەوەی پڕۆژەی ئاوی 51 گوندی دەڤەری بارزان لە قۆناغی جێبەجێكردندایە، بەڵام پرۆژەیەكی كۆنی ساڵی 2014 مابوو تەواو نەكرابوو سەر لەنوێ دەستمان پێ كردۆتەوە بەبری 519 ملیۆن دینار كە كۆنكریتكردنی ژمارەیەك كۆڵانی ناو سەنتەری بلێ بە درێژای زیاتر لە 10 هەزار مەتر لە خۆ دەگرێت و قێرتاوكردنی زیاتر لە چوار هەزار مەتر دووجا لەناو سەنتەری بلێ، ئەم پڕۆژانە لەلایەن كۆمپانیای بەڵاڤ جێبەجێ دەكرێن، كە ئێستا لە قۆناغی كۆتایی دایە، لەگەڵ قێرتاوكردنی شەقامی سەرەكی گوندی گەڵاڤا لە رۆژهەڵاتی بلێ بە بری زیاتر 267 ملیۆن دینار كە زیاتر لە 920 مەتر دووجا شەقامی سەرەكی ناوخۆیی قیرتاو كراون".
نادر محەمەد، سەرۆكی شارەوانی بلێ جەختی لەوەشكردەوە:" بەپێی ئەو پلانەی لە حكوومەتی هەرێمی كوردستان دانراوە، وەكو سەرۆكایەتی شارەوانی بلێ پلانمان بۆ چوار ساڵی ئایندە داناوە كە ژمارەیەك پڕۆژەی نوێ لە سنووری بلێ ئەنجام بدەین، لەساڵی 2020 گەرەكی زیفكێ و بانك لە بلێ لەگەڵ چەند گەرەكێكی تر سەر لەنوێ دروست دەكرێنەوە لەرووی رێگاوبانەوە، بەگشتی سەنتەری شارەكە زۆر بێ خزمەتگواریە لە هەموو روویەكەوە، بۆیە پلانمان هەیە پڕۆژەی زیاتر ئەنجام بدەین، لەپلانیشماندایە دووسایدێك لە دەرەوەی سەنتەری بلێ دروست بكەین بۆ ئەوەی قەڕەبالغی لەناو سەنتەری شار كەم بكرێتەوە، بەتایبەتی ساڵانە لە مانگی ئادار دا میوانێكی زۆر سەردانی دەڤەری بارزان و مەزاری نەمران لە بارزان دەكەن، شەقامەكەش ئەوەندە فراوان نیە، بۆیە بیرمان لەدروستكردنی دووسایدی دەرەوەی شارۆچكەكە كردووە كە لە داهاتوودا، بۆیە لەگەڵ خاوەن موڵكەكان گفتوگۆ دەكەین، بۆ دروستكردنی شەقامەكە، لە هەمانكاتدا بڕیارە كۆڵانەكانی ناو سەنتەری بلێ هەمووی قێرتاو بكەین، لە هەمانكاتدا بریارە دووسایدی دیكە لە سەنتەری بلێ دروست بكەین بۆ سەر رێگای سەرەكی ئاكرێ كە یاریگای وەرزشی و ئامادەیی بلێ سوود لەو دوو سایدە دەبینن".

زۆرترین بینراو