سەرۆكی شارەوانی سرێشمە: لە ماوەیەكی نزیكدا پڕۆژەمان دەبێت

سەرۆكی شارەوانی سرێشمە: لە ماوەیەكی نزیكدا پڕۆژەمان دەبێت

كەمال حەمەد حەسەن، سەرۆكی شارەوانی سرێشمە لە دیمانەیەكی هەفتەنامەی زاری كرمانجی ئاماژەی بەوەدا " لە هەندێك پڕۆژەدا بێ ئەزموون بووین و بەهۆی قەیرانی دارایی نەمانتوانییەوە وەك پێویست خزمەت بە هاووڵاتییان بكەین".
د/ دیلمان فەرحان
*ئێوە وەك سەرۆكی شارەوانی سرێشمە تا چەند لە كارمەندەكانتان رازین؟
- رێژەییە هەندێكیان وەك پێویست كارەكانیان جێبەجێ ناكەن هەندێكیشیان كارەكانیان بەرێكی بەڕێ دەكەن.
*پڕۆژەكانی ئەمساڵتان چیبوون؟
- لە ساڵی 2014 دوای دروستبوونی شەڕی داعش و قەیرانی دارایی لە هەرێمی كوردستان پڕۆژەكانمان وەستێندران و دوو پڕۆژەمان هەیە هی ساڵی 2013 و 2014 یەكێكیان %70 پڕۆژەكە تەواو بووە ئەویتریش %35 تەواو بووە، كە تایبەتە بە گەڕەكی ئەیلول لە چەند مانگی داهاتوو دەست بەكار دەبین.
*ساڵی داهاتوو پڕۆژەكانتان چی دەبن؟
- پێیان راگەیاندووین خۆتان ئامادە بكەن لە ئایندەیەكی نزیك پڕۆژەمان دەبێت, ئەوانیش ئاوەڕۆ و كۆنكرێتی رێگاوبانەكانە.
* زۆربەی رێگا لاوەكییەكان كێشەیان هەیە بۆ چاكناكرێن؟
- لەسەرەتادا بۆ بێ ئەزموونی خۆمان دەگەرێتەوە، بەڵام ئێستا ساڵا بە ساڵا پڕۆژەكانمان باشتر بەڕێوەدەچن.
* كێشەی ئاوەڕۆ هەبوو ئایا چارەسەر كراون؟
- كێشەی ئاوەڕۆ تەنها لە گەڕەكی شكان ماوە كارمەندانی بەڕێوەبەرایەتی ئاوەڕۆ لە هەولێر سەرەدانیان كردین، كێشەكە بەرزكراوەتەوە بۆ پارێزگای هەولێرو لەوێش بۆ مالییە ئەگەری هەیە ئەمساڵا كاری لەسەر بكرێت.
*ئەو پڕۆژانەی كە ئەنجامدراون رەزامەندی خەڵكی ناوچەكە لەسەر بووە؟
-لەسەرەتای دەستبەكار بوونم لە ساڵی 2001 تا ساڵی 2014 پڕۆژەمان هەبووە، وەك رەزامەندی پێویستە خەڵك بڕیاری لەسەر بدات، بەڵام دەنگدانەوەیەكی باشی هەبووە.

زۆرترین بینراو