سەرۆک بارزانی پارێزەری ئیرادەو شكۆی خەڵكی كوردستانە

وەیسی سەعید وەیسی 

سەنگ و كەسایەتی و كارێزمایی سەرۆك مسعود بارزانی پێویستی بەستایش و باس كردن نییە، بۆیەش ھەمیشە نەیارانی كورد ویستوویانە بیكەنە ئامانج و تیرەكەیان ڕووی لە جەنابیانە، جگەلەوەی بەر لە 58ساڵ لە تەمەنی 16ساڵی دەبێتە پێشمەرگەو لەسەنگەری بەرگریكردن دایەو دەسكەوت و سەركەوتنی گەورەی بۆ گەلی كوردستان تۆماركردوە، لەھەمان كاتیشدا لەماوەی شەڕی داسەپاوی تیرۆرستانی داعشدا سەرپەرشتی ھێزی پێشمەرگەی كوردستانی كردو رێگای نەدا نەیارانی گەلەكەمان پیلانەكانیان دژبە گەلی كوردستان سەربكەوێت، ئەمەش وای كردوە، ھەمیشە به‌ئامانج بگیرێت.

جاری یەكەم نیە راگەیاندنی ئێران دەیەوێت راستیەكان بشێوێنێت و بۆ بەرژەوەندی خۆیان بەكاربھێنێت گوایە قاسم سلێمانی مه‌خموور و هه‌ولێری پاراستووە‌ له‌ ده‌ستی تیرورستانی داعش، كە ئەمەش بەئاشكرا دروویەكی گەورەیە، خۆم شەرەفمندبووم لەگەڵ ھەڤالانم لە لقی ١٠ وەك خۆبەخشێك چوومە سەنگەرەكانی بەرگری لەخاكی پیرۆزی كوردستان، لە میحوەری گوێڕو مەخموور لەنزیكەوە لەناوراِستیەكان دابووم، چاكم لەیادە كێ بوون مەخمووریان رزگاركردەوە ئەووندەی بیری لێ دەكەمەوە نازانم ئەوكات ئاغایی قاسم سلێمانی و دارودەستەكەی لەكەێ بوونە، دیارە پێشتریش خەلِكانێك بەم جۆرە درۆ و قسەبێ بنەمایانە خۆیان تاقی كردووەتەوەو ویستیان خۆیان بكەنە پاڵەوانی مەیدان، بەڵام سوپاس بۆخودا خەڵكی كوردستان بەگشتیی و ھەولێری پایتەخێت بەتایبەتی، زۆر ھۆشیارن وچاك دەزانن كێ بوون ئەوانی پاراست و پاسەوانی كێن لەم سەنگەرانەدا شەھیدو برینداربوون.

دڵنیام ھیچ كەسێكی بەویژدان بڕوا بەم جۆرە قسە بریقەدارو درۆ گەورانە ناكات، دوای رووداوەكانی 16ی ئۆكتۆبەریش كاتێك حەشدی شەعبی و سوپای پاسداران  ویستیان خۆیان تاقی بكەنەوەو بەرەو ھەولێربێن ئەی ئەوكات كێ بوو ھەولێر و قەوارەی سیاسی ھەرێمی كوردستانی پاراست، خۆئەوكاتیش  ھەر ئێران و قاسم سلێمانی نەبوون، بۆیەش كاتی ھاتووە سەرانی كۆماری ئیسلامی بەسیاسەتی ھەڵەیان دابچنەوەو واز لەم جۆرە سیناریۆو درۆیانەیان بھێنن، چیتربەری رۆژ بەبێژینگ ناگیرێت، خەلكی كوردستان چاك دەزانێت بۆچی سەرۆك مسعود بارزانی دەكرێتە ئامانج و جۆرەھا پڕوپاگندەو پیلانی دژدەكرێت، چونكە ھەرئەوە خاوەنی پڕۆژەو بەرنامەی تایبەتی بۆ دامەزراندنی دەوڵەتی كوردی و ئامادەنیە سازش لەسەر مافەڕەواكانی خەڵكی كوردستان بكات و پارێزەری ئیرادەی تاكی كوردەو رێگا نادات كار لەسەر شكاندنی بكرێت.

زۆرترین بینراو