شەهلا ساڵح: یاریزانانی تایكواندۆ ئاشتیخوازو میانڕەون

شەهلا ساڵح: یاریزانانی تایكواندۆ ئاشتیخوازو میانڕەون

زاری كرمانجی- سۆران: شەهلا ساڵح, مامۆستا لەبەشی سیاسەتی زانكۆی سۆران و كاپتنی هۆڵی تایكواندۆی كچان خاوەنی پشتێنەی سوور لەم یارییە, لە دیمانەیەك بۆ لاپەڕِەی وەرزشی هەفتەنامەی زاری كرمانجی باسی لە یاری تایكواندۆ كردو گووتی" تایكواندۆ یەكێكە لەو وەرزشە گرنگ و پێویستیانە كە دەبێ هەموو تاكێك چ لە قۆناغی سەرەتایی یان ناوەندی فێری ببێت, چونكە ئەم وەرزشە تەنها كار لە سەربەهێزی بەدەنی تاك ناكات، بەڵكو ئیرادەیەكی بە هێزو ئاكارو رەفتارێكی ئەخلاقیانەت پێدەبەخشێت, كە یارمەتیدەرێكی زۆرە بۆ گەشەی رۆح و توانای جەستەیی".
سەرەتای دەستپێكردنی شەهلا لە یاری تایكواندۆ, دەگەڕێتەوە بۆساڵی 2008، ئەو كاتەی لەبەشە ناوخۆیی كچان خولێكی تایكواندۆ لەلایەن دوومامۆستای كچ كرایەوە, دواتر لەژێر سەرپەرشتی هەردوو راهێنەری خاوەن ئەزموون (محەممەد دیدی و مامۆستا شێرزاد) بەردەوامی بە راهێناندا, بەڵام بەهۆی سەرقاڵبوونی بە خوێندن لەم ماوەیدا كەمتر راهێنان دەكات.
دواتر مامۆستا شەهلا گووتی" راستە تایكواندۆ وەرزشێكی هونەری جەنگیە، بەڵام زۆربەی هەرە زۆری كات لەهەموو شوێنێكی جیهاندا بەو شێوەیە یاریزان و راهێنەرەكانی ئەم بوارە ئاشتیخوازو هێمن و میانڕەون".
سەبارەت بە وەرزشی تایكواندۆ لە دەڤەری سۆران گووتیشی" هۆڵەكەمان تاكە هۆڵی تایكواندۆی كچانە لەم ناوچەیە، مایەی خۆشبەختیە جیاوازتر لەرابردوو ئێستا دایك و باوكان رۆژانە كچەكانی خۆیان ئەهێنن بۆفێربوونی ئەم وەرزشەو هاندەرو پاڵپشتێكی باشیشیان دەكەن, بۆیە پێویستە هزری خەڵك بەرامبەر وەرزش بۆهەردوو رەگەز بەتایبەت بۆكچان ئاسایی ببێتەوە، چونكە كردەیەكی پێویستە بۆ تەندروستی مرۆڤ لە كۆمەڵگە, كە تەندراوە بەجۆرەها كێشە وەك كێشەی (كۆمەلایەتی , ئابووری, سیاسی و سایكۆلۆژی), وەرزش هۆكارێكە بۆ هێوربوونەوەو ئاشتكردنەوەی مرۆڤ و بڵاوكردنەوەی رۆحی كاركردنی بەكۆمەڵ و دەستە, ئەو بەرەنگارییانەی لێرە هەیە بێجگە لە تێڕوانینی هەڵەی خەڵك بۆ وەرزشی تایكواندۆ نەبوونی پاڵپشتی ماددی و مەعنەویە لەلایەن لایەنە پەیوەندییدارەكان".
پتر تیشكی خستە سەر یارمەتی و پاڵپشتی خانەوادەكان بۆ وەرزش بە گشتی و تایكواندۆ بە تایبەتی و گووتی" بەئیرادەو حەزی خۆم دواتر پاڵپشتی ماڵەوە توانیومە بەردەوام بم, لێرەوە سوپاسی خانەوادەكەم دەكەم كە هەموو كات تێگەیشتووانە مامەڵەیان كردوە، لەكاتێكدا كۆمەڵگە هەندێك لەوكارانەی سودبەخشن بەعەیبە دەبینێ, بەڵام بە پێچەوانەوە هەندێك تێڕوانین و كردەوە هەیە نەك بۆ كچ بەڵكو پێوسیتە كوڕانیش خۆیان لێ بەدوور بگرن, كەچی بەخراپ و عەیبە نابیندرێ, تایكواندۆی سۆران بەهەوڵ و هیممەتی راهێنەرە سەركەوتووەكان لەئاستێكی باشدایە، یاریزانەكانمان لە هەردوو رەگەز ئاستێكی باشیان هەیە، بەتایبەت كوڕەكانمان لەزۆربەی خولەكان ئەنجامی بەرچاوییان بەدەستهێناوە هەمیشە لە پلەكانی یەكەم و دووەم بوون".
شەهلا ئەو ئارەزووەی هەیە كە لە داهاتوودا ببێتە ناوبژیوانی یاری تایكواندۆو وەك خۆی گووتی" چەندین خولم بینیووەو پشتیوان بە خوا بەردەوام ئەبم بۆ خزمەتی زیاتری خەڵك لەپێناو دەروون و جەستەیەكی باشترو بەهێزتر بۆ داهاتوویەكی گەشتری مرۆڤایەتی".

بابەتى پەیوەندیدار وەرزشى

زۆرترین بینراو