شەهلا: حەز بە كاری ئازاد دەكەم

شەهلا: حەز بە كاری ئازاد دەكەم

هۆژین شەوكەت – زاری كرمانجی : شەهلا رەشید تەمەن ٢٧ ساڵ دانیشتووی شاری سۆرانە، تا قۆناغی شەشەمی ئامادەیی خوێندووە، ساڵی ٢٠١٣ وەك بەرپرسی كتێبخانەی دەزگای زاری كرمانجی بۆ راگەیاندن و روشنبیری دەست بەكار دەبێت، وەك خۆی باسی لێوە دەكات، پاڵپشتی بەرێوەبەر و كارمەندانی زاری كرمانجی وایكردووە لە پاڵ ئەركەكەی خۆی وەك بەرپرسی كتێبخانە، دەست بە كاری رۆژنامەوانی یش بكات و بەرپرسیاریەتی لاپەڕەی تەندروستی هەفتەنامەی زاری كرمانجی وەربگرێ،
شەهلای ژیاندۆست لە دیمانەیەكی تایبەت بە زاری كرمانجی باس لە ژیان و كارەكانی دەكات و دەڵێ‌"ماوەی ٨ ساڵە لە دەزگای زاری كرمانجی كار دەكەم، سەرەتا وەك بەرپرسی كتێبخانەی زاری كرمانجی دەست بەكاربووم، دواتر بە پاڵپشتی بەرپرسی دەزگاو هاوكارانم دەستم كرد بە كاری رۆژنامەوانی، لەئێستادا هەم بەرپرسی لاپەڕەی تەندروستیم و هەمیش بەرپرسی كتێبخانەم"،
شەهلا وەك كچێك باس لە بەربەستەكانی ژیان و پاڵپشتی خانەوادەكەی دەكات"بە دڵنیایەوە وەكو تەواوی كچانی ئەو نیشتمانە، بەربەست زۆرە لە بەردەممان، بەڵام پاڵپشتی و دڵسۆزی و خۆشەویستی خێزانەكەم، نەیهێشتووە هەست بەم بەربەستانە بكەم، هەمیشە دایك و باوكم، هەوڵ دەدەن پشت بە خۆم ببەستم و ئازایانە كار بكەم، هەر ئەوەش وایكردووە هەست بە رەقی بەربەستەكان نەكەم"،
شەهلا باس لە كتێبخانەی زاری كرمانجی و كەم و كوڕییەكانی دەكات و دەڵێ‌"كتێبخانەكەمان لە ١١ بەشی سەرەكی پێكدێت جگە لە بەشی زمانەوانی، كەم و كورتی زۆرمان لە كتێبخانە هەیە، وەك نەبوونی بەشێكی تایبەت بە منداڵان كە زۆرجار لە كاتی سەردانیكردنی باخچە و قوتابخانە ئەهلییەكان، منداڵان داوای كتێبی منداڵانەیان كردووەو ئێمە نەمانبووە، كتێب بردن و هێنانەوە لەلای ئێمە بە مەرجە، هیچ كەسێك ناتوانێت كتێب بە دڵی خۆی ببات و بیهێنێتەوە، ئەوانەی كتێب دەبەن ناویان لای خۆمان دەنووسین و ژمارە و ناسنامەی لێوەردەگرین، ماوەی دوو هەفتەی بۆ دادەنێێن بۆ گەڕاندنەوەی كتێبەكان"،
شەهلا لە ئەرك و كارەكەیدا هەرگیز ماندوو نابێ و پێی وایە هەر كارێك خۆشی بەخش و ئارامكەرەوەی دڵ بێ، ماندووبوونی نییە و بۆیە دەڵێ‌ تا سەر ئیسقان رازیم لە كارەكەمدا و هەرگیز وازی لێ ناهێنم، ئەوەش دەڵێ‌"هەمیشە حەز بە كاری ئازاد دەكەم، هەر كارێك دڵخۆش و ویژدانم تێدا ئاسوودە ببێ، بێ دوو دڵی دەیكەم، ژیانم خۆشدەوێت راستە بەربەست هەبووە، بەڵام تا ئێستا هیچ شتێكی لێ نەسەندوومەتەوە كە بێ ئومێدم بكات، بە پێچەوانەوە گەلێك شتی باشی پێبەخشیوم"،
لەبارەی رەنگەكانیشەوە شەهلا دەڵێ‌"حەز بە هەموو رەنگێك دەكەم و هیچیان بەلامەوە تایبەت نین، ژیان بە رەنگەكانەوە جوانە، هەر رەنگێك لە من بوەشێتەوە، ئەوم بەلاوە جوانە"،
شەهلا تاكو ئێستا ژیانی هاوسەرگیری پێكنەهێناوە و بە پێكەنینەوە دەڵێ‌"ژیانی هاوسەرگیریم پێكنەهێناوە و بیریشم لێی نەكردۆتەوە، راگەیاندن زۆر شتی لێسەندمەوە، بەڵام لە پاڵ ئەوەشدا زۆر شتم بەدەست هێناوە"،
شەهلا لە ژیانیدا ترسی لە یەك شت هەیە كە لە دەستی بدات، بەڵام هەروەكو خۆی گوتەنی با ئەو شتە پارێزراو بێ لای خۆم"تەنها ئاوات بەوە دەخوازم پێی شاد ببم".

زۆرترین بینراو