شەهید رێبوار تا دوا هەناسە ئامادە نەبوو سەنگەرەكانی بەرگری جێبێڵێت

شەهید رێبوار تا دوا هەناسە ئامادە نەبوو سەنگەرەكانی بەرگری جێبێڵێت

محەمەد ئاموكەیی- هەریر: لەم ژمارەی هەفتەنامەی زاری كرمانجی دەگەرێینەوە بۆ نووسینی چەند وێستگەیەكی ژیان و خەباتی شەهید(رێبوار علی عمر شەنگە).
شەهید رێبوار، لە رۆژی 14-4-1975 لە نێوان سنوری ئێران و عێراق لەدایك بووە، لەبەر ئەوەی شەهید لە رێگای ئاوارەبوون لە دایك بووە هەربوویەش ماونراوە بە رێبوار، رێبوارێك تا دوا هەناسەی ژیان رێبواری رێگای سەربەخۆی كوردستان بووە.
شەهید رێبوار، تاكو قوناغی چواری سەرەتایی لە قوتابخانەی شەڕەفخان لە شاروچكەی هەریر خوێندوویەتی.
شەهید لە ساڵی 1993 پەیوەندی بە رێزەكانی پێشمەرگەوە دەكات و بە پلەی مولازمی یەك لە بەتالیونی سپیلك دەست بە خەباتی چەكداری دەكات، لە ساڵی 1996 بۆ ماوەیەكی كاتی لە دەوامی فەرمی مۆڵەتی پێدەدرێت و دوای ماوەیەك دەگەرێتەوە بۆ سەر ئەركی پێشمەرگایەتی، لە ساڵی2000 دەكرێتە بەرپرسی پاسەوانانی سكرتاریەتی یەكێتی قوتابیانی كوردستان.
لە ساڵی 2012 بەهۆی جەلتەی دڵەوە لە خەباتی پێشمەرگایەتی دووردەبێتەوە، دواتر لە ساڵی 2013 لە رێزەكانی هێزی 80ی سەر بە وەزارەتی پێشمەرگە درێژە بە خەباتی خۆی دەدات.
دوای دەستپێكردنی هێرشی تیرۆرستانی داعش، شەهید رێبوار بەشداری دەكات لە پاراستنی كوردستان و لە سەنگەرەكانی پێشەوەی بەرگری ئامادەی بەرگریكردن بووە، لە زۆربەی داستان و هێرشەكانی دەشتی كەركوك و ئەو دەڤەرە بەشدار بووە.
شەهید رێبوار لە ساڵی 2015 لە میحوەری مەلا عەبدوللا باری تەندروستی تێك دەچێت و دوای هەوڵدانێكی زۆر هاوسەنگەرەكانی وویستوویانە رازی بكەن بۆ ئەوەی بگەرێتەوە، بەڵام شەهید رێبوار تەئكیدی كردووتەوە لەوەی تا دوا هەناسە ئامادە نابێت سەنگەرەكانی بەرگری جێبێڵێت، بە داخەوە لە میحوەری مەلا عەبدوللا و لە كاتی ئەركی پێشمەرگایەتی لە رۆژی 23ـ3ـ2015 بە هۆی جەلتەی دلەوە رێبوار عەلی ماڵئاوای دەكات و دەگاتە كاروانی شەهیدانی كوردستان.
هاورێ و هاوسەنگەرێكی شەهید دەڵێت: شەهید رێبوار كەسایەتیێكی نەرمونیانی هەبوو، توانی ئەوەی هەبوو خۆی لەگەڵا هەموو بارودۆخ و كەسێكدا بگونجێنێت، كەسێكی لەسەرخۆبوو و بیری لە هەموو كارێك دەكردەوە، لە زۆربەی بڕیار و پرسەكاندا پرسم بە شەهید دەكرد، هەموو كەسێكی خۆش دەویست، لە رووی نیشتیمان پەروەرییەوە و كەسێكی تا بڵێی دڵ سۆز و نیشتیمان پەروەر بوو.
هاورێی شەهید بەردەوام بوو و گووتی: خۆزگە من لە شوێنی ئەو شەهیدبامە بەس ئەو سەڵامەت بوایە، چونكە كەسێك بوو سوودی بۆ هەموو كەسێك هەبوو، لە هەموو بوارێكەوە كەسێكی لێهاتوو بوو.
لە كۆتایدا بنەماڵەی شەهید دەڵێت: بۆ ئێمە سەربەرزییە كەوا بە خوێنی رولەی ئێمە وا كوردستان ئازاد و ئارامە، ئەمە یەكەم شەهید و دوا شەهیدیمان نابێت، بە ماڵ و گیان ئامادەین خۆمان بكەین بە قەلغان بۆ پاراستنی خاكی پیرۆزی كوردستان.

 

 

زۆرترین بینراو