شەهید سامان هەردەم لە سەنگەرەكانی بەرگریدا هەوڵی بەرزكردنەوەی مەعنەویاتی هاورێیەكانی دەدا

شەهید سامان هەردەم لە سەنگەرەكانی بەرگریدا هەوڵی بەرزكردنەوەی مەعنەویاتی هاورێیەكانی دەدا

بەرەڤان شاكر سلێمان لاچ- دهۆك: گەلی كوردستان گەلێكی خۆڕاگر و گیان فیدایە و هەزاران ساڵە خەبات لە پێناو ئازادی و سەربەخۆی دەكات. هەڵبەت ئەم ماوە زۆرەی خەبات و تێكوشان بێ قۆربانیدان نەبووە، بەڵكو هەزاران گەنج و لاوی ئەم نەتەوەیە خۆیان كردووە بە قەلغانی پاراستنی ئەم نەتەوەیە.
لەم ژمارەی هەفتەنامەی زاری كرمانجی دەست دەكەین بە نووسینەوەی چەند وێستگەیەكی ژیان و خەباتی شەهید(سامان موحسن شێخ عومەر).
شەهید سامان لە 30 ی ئاداری ساڵی 1995 لە كۆمەڵگای موقبلێ چاوی بە دونیا هەڵهێناوە، شەهید وەك هەر منداڵێكی ئەو كاتی كوردستان ملی داوەتە بەر خوێندن، توانیویەتی تا قۆناغی ناوەندی درێژە بە خوێندن بدات، دواتر لە ساڵی 2010 چەكی شەڕەفی پێشمەرگایەتی لە شان دەكات و لە فەرماندەی هەڵگورد دەستبەكار دەبێت، دواتر لە ساڵی 2011 دەگوازرێتەوە بۆ لیوای 7ی پیادەی سۆران.
شەهید سامان لە ساڵی 2014 ژیانی هاوسەرگیری لەگەڵ خاتوو( دلژین سالح) پێكدێنێت و خاوەنی دوو منداڵە بە ناوەكانی ( ڤینا، دیدا).
نەقیب محەمەد دۆسكی، هاوسەنگەر و هاورێی شەهید سەبارەت بە كەسایەتی شەهید دەڵێت: شەهید لە رووی هاورێیەتییەوە كەسێكی بەوەفا و رێزدار بوو، هەردەم رێزی لە كەسانی تر دەگرت، بۆ ئەوەی دڵی هاورێیەكی خۆشبكات ئامادەی هەموو هاوكارێك بوو، كەسێكی كۆمەڵایەتی و رووخۆش بوو.
لە رووی پێشمەرگایەتییەوە كەسێكی بووێر بوو، چەكدارێكی دەست سووك بوو، هەردەم لە سەنگەرەكانی بەرگریدا هەوڵی بەرزكردنەوەی مەعنەویاتی هاورێیەكانی دەدا.
دوا بیرەوەری من و شەهید لە دوای كۆنترۆلكردنەوەی باشیك بوو، دوای ئەوەی توانیمان ناوچەكە بە تەواوی كۆنترۆل بكەین، وویستمان بۆ چەند ساتێك پشوو بدەین و هەر لە هەمەری سەربازی هاتینە دەرەوە من پەیوەندیم بە كچەكەی خۆمەوە كرد، كچی من و شەهید هەردووكیان ناویان ڤینا بوو، دوای ئەوەی پەیوەندیەكەم تەواوكرد لە پشت هەمەر هاتەدەر و پێكەنی و گووتی بۆ بەس تۆ كچێكت هەیە بە ناوی ڤینا، گووتیشی وا منیش پەیوەندی لەگەڵ ڤینای خۆم دەكەم.
محسن شێخ عومەر، باوكی شەهید دەڵێت: شەهید سامان لە تەمەنێكی بچوكدا دەستی دایە خەبات، زۆر هەوڵمدا خوێندنی تەواو بكات، بەڵام زۆر حەزی لەوە دەكرد كەوا ببێتە پێشمەرگە، لە ناو خێزاندا كەسێكی گووێرایێل و خەمخۆر بوو، كەسێكی هەست ناسك بوو، سەبارەت بە شەهید هەرچی بگوترێت هەر كەمە.
لیوا بەهرەم عەریف یاسین، سەبارەت بە كەسایەتی شەهید دەڵێت: شەهید سامان توانیبووی لە ماوەیەكی كەمدا دڵی هەموو لایێك بۆ خۆی رابكێشێت، كەسێك بوو جێگای متمانە بوو، لەدەست دانی شەهید بۆ هەموومان كەلێنێكی گەورەبوو.
عەلی محەمەد، هاوسەنگەری شەهید دەڵێت: ئێمە لە باشیك بووین و بارودۆخەكە زۆر جێگیر نەبوو، لە رۆژی 17-11-2-2016 بۆمبێك بە ئۆتۆمبڵێكی سەربازیماندا تەقیەوە، دواتر سامان شەهیدبوو و دوو پێشمەرگەی تر بریندار بوون، ئەگەر چی كارەساتێكی زۆر ناخۆشە هاورێ و هاوسەنگەرەكەت شەهید بێت، بەڵام وویستمان بگەینینە نەخۆشخانە، بەڵام بە داخەوە گیانی پاكی سپارد.
لە كۆتایدا بنەماڵەی شەهید دەڵێن: بنەماڵەكەمان هەر لەسەرەتای دەستپێكردنی شۆڕشی دووەمی بارزانەوە بووە بە بەشێك لە شۆڕش، هەر لەسەرەتاوە شەهیدبوون و خۆفیدایكرنمان لە پێش چاو بووە.
راستە لە دەستدانی كوڕێكی گەنج و خێزاندار برینێكی گەوررەیە بۆ ئێمە، بەڵام لە پێناو كوردستان ئامادەین خۆشمان بە قوربان بكەین. ئەگەر چی سامان تەمەنێكی بچوكی هەبوو و خەونی زۆری هەبوون، بەڵام تەمەن رێگەی نەدا.
بەڵام ئەگەر لایەنی پەیوەندی دار بتوانێت بۆ ئەوەی زیاتر ئاوڕ لە خێزان و منداڵەكانی شەهید بداتەوە، چونكە تا رۆژی شەهیدبوونیشی پێی نەنایە ناو خانوی خۆی و تا ئێستاش هەر قەردارە و قەردەكانی دەدەینەوە.

بابەتى پەیوەندیدار جۆراوجۆر

بیروڕا

زۆرترین بینراو