عەبدولواحید برادۆستی: ئەمساڵ نەوت بۆ سەرجەم قوتابخانەكانی سنووری سیدەكان دابین دەكەم

عەبدولواحید برادۆستی: ئەمساڵ نەوت بۆ سەرجەم قوتابخانەكانی سنووری سیدەكان دابین دەكەم

موڕشید محەمەد– هەولێر: لە دیمانەیەكی هەفتەنامەی زاری كرمانجیدا، عەبدولواحید برادۆستی گەنجێكی سەرمایەداری شاری هەولێر باس لە كار و چاڵاكییەكانی دەكات و دەڵێت" لە ماوەیەكی نزیكدا نەوتی سپی بەخۆڕای بەسەر تەواوی قوتابخانەكانی دەڤەری سیدەكان دابەش دەكەین، دووپاتی كردەوە، لەژێر سایەی ئارامی كوردستان بووەمەتە سەرمایەدار بۆیە ئامادەم هەموو هاوكاریەك پێشكەش بە هاووڵاتییان و چین و توێژەكان و كەرتەكانی حكومەت بكەم .
عەبدولواحید برادۆستی لە 23 – 6 – 1980 لە شارۆچكەی كەسنەزانی سەر بە پارێزگەی هەولێر لە دایك بووە، لە هەمان شوێن كارگە و كۆمپانیایەكی هەیە بە ناوی ( فریاس ) كە تایبەت بە دروست كردنی كەل و پەل و پێداویستی پاككەرەوە وەك زاهی، فاس، كلۆر، لیتۆر و كلینس لە شارەكانی هەولێر، سلێمانی، دهۆك دابەشی دەكات و رەوانەی زۆربەی شارەكانی عێڕاقیش دەكات، لە كارگەكەدا 179 كەس كاری تێ دەكات و توانراوە هەلی كاریان بۆ بڕەخسینین كە 134 كەسییان خاوەن خێزانن و سەرچاوەی داهاتییان كارگەكەیە.
لەبارەی پێشكەش كردنی هاوكاری بە كەرتی پەروەردە، عەبدولواحید برادۆستی لە دەستپێكی قسەكانیدا بۆ زاری كرمانجی گووتی" لەسەرجەم قوتابخانەكانی شارۆچكەی كەسنەزانی هەولێر بە ئاگاداری بەڕێوەبەرایەتی پەروەردە و زۆربەی مامۆستایان، دەستی هاوكاریم بۆ درێژكردووە لە هەر پێویستییەییان هەبووبێت، لە دابین كردنی مۆلیدەی كارەبا و كورسی و مێز و نۆژەن كردنەوەی بینای هەندێ قوتابخانە، هەروەها ساڵی رابردوو لە رێوڕەسمێكدا نەوتی سپییم بەسەر تەواوی قوتابخانەكانی سنووری كەسنەزان و قوتابخانەكانی ناحیەی سیدەكان و برادۆست لە سنوری پەروەردەی سۆران دابەش كردووە، ئەمەش هاوكاریەكی باش بوو بۆ قوتابخانەكان و قوتابییان و فێرخوازانیش توانیان سوودی لێ ببیننن . هەروەها هەموو هەوڵێك دەدەم قوتابخانەیەك بە شێوازێكی ئەندازەی و سەردەمییانە لە ناحیەی سیدەكانی سەر بەقەزای سۆران وەك هاوكاریەك بۆ كەرتی پەروەردە درووست بكەم و لە رێگەی زاری كرمانجیش بەڵێن بە بەڕێوەبەرایەتی پەروەردە و تەواوی مامۆستایانی سنووری سیدەكان دەدەم، بۆ ئەمساڵی خوێندنیش نەوتی سپییان بەسەر دابەش دەكەین .
ناوبراو روونی دەكاتەوە، خۆشبەختانە توانیومە هاوكاری پێشكەش بە لاوانیش بكەم، لە ماوەی رابردوودا جل و بەرگی وەرزشیم بۆ سەرجەم تیپەكانی سنووری ناوەندی لاوانی سیدەكان دابەش كردووە و لە كەسنەزان و هەولێریش دەستی لاوانم گرتووە و لە ئێستادا لەسەر ئەركی خۆم سەرقالًَی درووست كردنی خانووێكم بۆ لاوانی كەسنەزان و زۆربەی كارەكان بە كۆتای هاتووە . هاوكاریەكان تەنها كەرتێك نەی گرتۆتەوە، چەندین مزگەوت ناوەكانییان پارێزراوە كاری نۆژەن كردنەوەمان بۆ كردووە و چەندین كەل و پەل و پێداویستیم بۆ دابین كردوون، هەرچی پێویستیش بێت و لە توانای مندا بێت درێغی ناكەم .
لە بەردەوامی قسەكانیدا، عەبدواحید برادۆستی دەڵێ " ئێمە رۆڵەی ئەو حكومەتەیین لە ژێر ئەو ئارامییەی هەیە بووینەتە سەرمایەدار و خۆم بەقەرزاری حكومەت دەزانم، جێخۆیەتی بەشێك لە سەرمایەی دەستمان دەكەوێت بیبەخشین بە كەرتەكانی پەروەردە و تەندرووستی و كەرتەكانی تر، چونكە، لە هەموو وڵاتانی پێشكەوتوو، بڕەپارەیەك لە داهاتی سەرمایەدار و كۆمپانیایەكان، بۆ حكومەتە، بە نمونە لە وڵاتێكی وەكو ئەڵمانییا، لە هەر پڕۆژە و كارێكی گەورەدا 19%ی بۆ حكومەتە و بە یاسا ئەمە جێگیر كراوە، كەچی حكومەتی هەرێم ئێمەی ناچار بەمە نەكردووە بۆیە پێویستە هاوكاربین .
ئەو گەنجە سەرمایەدارە ئاشكراشی كرد" لەشەڕی داعش بە ئاگاداری فەرماندەسەربازییەكان و پێشمەرگەكان دەستی هاوكاریم بۆ زۆربەی میحوەرەكانی بەرەی جەنگ درێژ كردووە و تەنها لە ماوەیەكی شەڕی داعشدا 800 ئاژەڵی وەك بزن و مەڕ بۆ بەرەكانی جەنگی رەوانە كردووە. هەروەها بۆ سەدان ماڵی كەمدەرامەت رایەخ و پێداویستی نێوماڵی دابین كردووە لەگەڵ ئەمەشدا لە سنووری كەسنەزان مانگانە موچەی 40 خانەوادەی شەهید دابین دەكات، پێویستە لە شوێنەكانی تریش سەرمایەدارەكان هاوكاری خانەوادەی پێشمەرگە و كەس و كاری شەهیدان بكەن، چونكە هەم دەبێتە كارێكی مرۆیی و هەم دەبێتە ئاسانكاریەكیش بۆ كەس و كاری شەهیدان و دەتوانرێ كەمێك لە معاناتییان كەم دەبێتەوە.
لە 100 دام و دەزگا و شوێنی جیا جیای حكومی و حزبی لە بەرمبەر كارەكان و پێشكەش كردنی هاوكاری، خەڵاتی رێزلێنانم پێبەخشراوە، عەبدولواحید برادۆستی گووتیشی " هەرلەم چوارچێوەیەدا لە سەردانێكمدا بۆ لای نێچیرڤان بارزانی سەرۆكی هەرێمی كوردستان بەڕێزییان لە بەرامبەر كارە مرۆیی و خێرخوازیەكانم و درێژ كردنی دەستی هاوكاری بۆ خەلك دەستخۆشی لێكردم و ستایشی كردم كە هەلی كارم بۆ دەیان كەس رەخساندووە و دەستی هاوكاری بۆ حكومەت و حزب و هاووڵاتییان درێژ دەكەم، پشتگیری خۆی پێ راگەیاندم ئەمە گەورەترین شانازییە بۆمن.

" هەوڵی تەواو دەدەم قوتابخانەیەكی مۆدێرن لەسەر ئەركی خۆم دروست بكەم "

زۆرترین بینراو