عەبدولوەهاب سلێمان: زیاتر لە 950 شوێنەوار لە دەڤەری سۆران تۆمار كراون

عەبدولوەهاب سلێمان: زیاتر لە 950 شوێنەوار لە دەڤەری سۆران تۆمار كراون

دیدار- ڕائیب شێروانی: عەبدولوەهاب سلێمان، بەڕێوەبەری بەڕێوەبەرایەتی شوێنەواری سۆران لە دیدارێكدا لەگەڵ هەفتەنامەی زاری كرمانجی دیاركرد:" لە سنووری قەزاكانی سۆران زیاتر لە 950 شوێنی شوێنەواری هەن، لەسەر بابەتی شوێنەوار خەڵكانێك كە بەنیاز بوونە شوێنەوار ئاودیو بكەن گیراون، سزا دراون، بەند كراون و ئێستاش كۆمەڵێك كەس لەسەر شوێنەوارەكان لە بەندیخانەكانن، لەبەر دەستدرێژی كردن و ئاودیوكردن و مامەڵەكردن بە شوێنەوارەكان. دەشڵێ:" پێویستە مۆزەخانەیەكی گونجاو و مۆدێرن و سەردەمیانە بۆ پارێزگاری كردن و پێشكەش كردنی ئەو شوێنەوارانە بە هاووڵاتیان لە سۆران بكرێتەوە.
بەڕێوەبەری بەڕێوەبەرایەتی شوێنەواری سۆران رایگەیاند:"بەڕێوەبەرایەتی شوێنەواری سۆران لە ساڵی 2006 دامەزرا، سەرەتا بنكە بوو، بەڵام لە ساڵی 2009 بڕیاری بەڕێوەبەرایەتی دەرچوو، هەر لە ساڵی 2006 كە بنكەی شوێنەوار لە سۆران كرایەوە، پێشتر لە ساڵی حەفتاكان لەلایەن بەرێوەبەرایەتی گشتی شوێنەواری بەغداوە رووپێوێك كرا بوو بۆ هەر چوار قەزای سۆران، چۆمان، مێرگەسۆر و رواندز بە گوێرەی ئەو رووپێویە، تەنیا 51 شوێنی شوێنەواری تۆمار كرابوون، بەڵام دواتر كە بەڕێوەبەرایەتی شوێنەواری سۆران دامەزرا ئێستا توانیومانە نزیكەی 950 شوێنی شوێنەواری تۆمار بكەین، كە ئەو شوێنەوارانە لە قەڵا، قولە،گۆڕستان، گرد، ئەشكەوت و پەناگە و كۆمەڵێك شتی دیكەی شوێنەواری لە خۆ دەگرێت.
عەبدولوەهاب سلێمان، ئاماژەی بۆ ئەوەش كرد:" نەك هەر لە سۆران، بەڵكو لە سەرتاسەری جیهان، لە كوردستان، لە عێراق، هەمیشە زێدەڕۆیی لەسەر شوێنەوارەكان هەیە، لەبەر ئەوەی كە شوێنەوارەكان زۆربەی زۆریان لەسەر رووی ئەرز نینە و دیار نینە، زۆر جار هەبووە پاش هەڵكۆڵینی شوێنێك جا بۆ هەر پڕۆژەیەك بێت، تەنانەت زۆرجار لە ئەنجامی پرۆژەیەكی حكوومی لە ئەنجامی دروستكردنی رێگایەك، لە ئەنجامی دروستكردنی پردێك و بینایەك كەلوپەلی شوێنەواری دۆزراوەتەوە، ئەوەش بە زێدەڕۆیی كردن هەژمار ناكرێت، ئەگەر چی حاڵەتی لەو شێوەیەشمان هەبووە كە زێدەرۆیی كراوەتە سەر شوێنەوارەكان، ئەوەش لەسەرتاسەری جیهان ئەو دیاردەیە هەیە، هیوادارین بنبڕ بكرێت و نەمێنێت، بەڵام هەمیشە لە بواری شوێنەوار ئەو جۆرە دەستدرێژییە هەبووە و روودەدات.
بەڕێوەبەری بەڕێوەبەرایەتی شوێنەواری سۆران ئاشكراشی كرد:" لەسەر بابەتی شوێنەوار خەڵكانێك كە بەنیاز بوونە شوێنەوار ئاودیو بكەن گیراون، سزا دراون، بەند كراون و ئێستاش كۆمەڵێك كەس لەسەر شوێنەوارەكان لە بەندیخانەكانن، لەبەر دەستدرێژی كردن و ئاودیوكردن و مامەڵەكردن بە شوێنەوارەكان.
عەبدولوەهاب سلێمان، بەڕێوەبەری بەڕێوەبەرایەتی شوێنەواری سۆران زیاتر گوتی:" سۆران وەكو مەركەزێك وایە بۆ قەزاكانی دیكەی دەوروبەر، لەرووی ئیدارییەوە زۆربەی كاروبارەكانی ئیداری ئەو چوار قەزایە سۆران وەكو ناوەندێكە كە ئیش و كاری ئیداریی لەوێ بەڕێوەدەبرێن، لەرووی شوێنەواریشەوە پێویست وابوو كە مۆزەخانەیەك هەبێت كە ئەو كەلوپەلانەی كە لە ئەنجامی هەڵكۆڵینەكان كە لەلایەن تیمە بیانییەكان و تیمە ناوخۆییەكان دەدۆزرێنەوە، تەنانەت كۆمەڵێك شوێنەوار لەلایەن هاووڵاتیانەوە پێشكەش بە بەڕێوەبەرایەتیەكەمان دەكرێن، هەندێكی دیكەش لەلایەن دەزگا ئەمنییەكانەوە كە لە قاچاخچییەكانەوە دەگیرێن دەدرێن بە بەرێوەبەرایەتیەكەمان پێویستە مۆزەخانەیەكی گونجاو و مۆدێرن و سەردەمیانە بۆ پارێزگاری كردن و پێشكەش كردنی ئەو شوێنەوارانە بۆ هاووڵاتیان بكرێتەوە بۆ ئەوەی شوێنەوارەكان پێشكەش بە هاووڵاتیان بكرێن".

زۆرترین بینراو