فاتیمە زەڵمی،ئامادەم مڵوانكە زێڕەكەم بفرۆشم بۆ كڕینی كتێبێك

فاتیمە زەڵمی،ئامادەم مڵوانكە زێڕەكەم بفرۆشم بۆ كڕینی كتێبێك

دیمانە محەمەد ئامۆكەیی- سلێمانی: فاتیمە زەڵمی ئافرەتێكی پڕ وزەو سەلیقە جوان ئەو خەڵكی هەوارمانی خاوەن دەیان نوسەر و ئەدەب دۆست و سیاچەمانەیە، یەكێكە لەو ئافرەتانەی بەشێكی كاتی رۆژانەی بەخوێندنەوە دەباتەسەر، لە دیدارێكی تایبەتدا لەگەڵ زاری كرماجی باس لە گرنگی خوێندنەوەی كتێب و شوێنی لە دایكبوونی خۆی دەكات و دەڵێت"خەڵكی گوندی زەڵم لە ڕۆژێكی زستانی و لە ئاوارەی لە ڕۆژهەڵات لەشارەدێی قەڵاجێ چاوم بە ژیان هەڵهێناوە، لە خێزانێكی ئایینی و میانڕەو ڕۆشنبیر پەروەردەو گەورە كراوم، دەرچووی بەشی تەكنەلۆژیای كارەبام و خۆشبەختانە هەر لەتەمەنی منداڵییەوە خولیای خوێندن و كتێب لە زیهنیمدا گەشەیكرد، ئەمەش لە سایەو لوتفی خێزانەكەمەوە بووە چون هەمیشە هاندەرم بوون و بەئێستاشەوە هەن، ئەمەش وایكرد بەردەوامبم لە خوێندنەوەو دونیای كتێبدا".
فاتیمە دەشڵێت" لە ئێستادا خوێندەوارێكی زۆرمان هەیە، بەڵام خوێنەرێكی كەم هۆكاری ئەمەش بەندە دەیگەڕێنمەوە بۆسیستەمی پەروەردەی خێزانی، پاشان سیستەمی پەروەردەی كۆمەڵگە، بەپلەی یەك خێزان، چون خێزان پایەی یەكەمە بۆ هاندانی منداڵەكەی بۆ بەكلتوركردنەوەی خوێندنەوە، پاشان كۆمەڵێك هۆكاری دیمان هەیە وەك تەشەنەكردنی تەكنەلۆژیاو سۆشیاڵ میدیاو كایەی سیاسی كە ئەمانە فاكتەرێكن بۆ لاوازبوونی ئاستی ڕۆشنبیری تاك و بیری تاك بۆلای كۆمەڵێك كاری بێ ماناو پوچ، بەمەش خولیای خوێندن كەمدەبێتەوە، بۆیە خوازیارم هەر لەقۆناغی سەرەتاییەوە خوێندن بكرێتە كلتور بۆ منداڵەكانمان و هاندەریان بین لە قۆناغی سەرەتاییەوە، بەمەش دەتوانین كۆمەڵگەیەكی تەندروست بونیاد بنێن."
ئەو پێشی وابوو خوێندنەوە خۆراكی مێشكەو گووتی" هەركەسێك ئەمەی ئەزموون كردبێت دەزانێت كەوایە، نەك تەنیا خۆراكی مێشك، بەڵكو خۆراكی ڕۆح و جەستەشە، بەڕای من خوێندنەوە هێندەی وەرزش كاریگەری ئەرێنی لەسەر دڵ و دەروون و جەستەی مرۆڤ هەیە هۆكارێكە بۆ تەندروستیەكی باش."
فاتیمە زەڵمی، لە بارەی تەرخانكردنی كات بۆ خوێندنەوە گووتیشی" لەوەتەی فامم كردوە خۆم بە مەغدور زانیوە گەر ڕۆژێك بەسەرمدا تێپەڕیبێت و پەڕەیەكم نەخوێندبێتەوە، هەوڵمداوە بەپێی مەجال بخوێنمەوە، لەهەموو بوارێكیشدا دەخوێنمەوە بێ جیاوازی گەر لە مانگێكدا دە پەرتووك بخوێنمەوە هەوڵدەدەم ئەو دە پەرتووكە هەریەكەو لە بابەتێك بێت، چون خوێنەر پێویستە شارەزابێت لە هەموو بوارێكدا."
ئەوەشی خستەڕوو" بچوكترین دەرفەتم بۆ بڕەخسێت لەهەر كوێ بم دەخوێنمەوە تەنانەت لە شوێنە گشتیەكانیش هەمیشە پەرتووكێك وەك هاوڕێ لەناو جانتاكەم هاوسەفەرمە، لەماڵەكەی خۆشماندا كتێبخانەیەكم هەیە هێندەی خۆم ئەو پەرتوكانەی لەنێو رەفەكان هەن خۆش دەوێن و تاكە سەروەتی من لەم دونیا كتێبخانەكەمە، كتێب لای من شتێكی تایبەتەو هەر هاوڕێیەكەم بە دیاری كتێبێكم بۆ بێنێت لای من لەهەموو شتێك بەنرخ ترە، بۆیە پارەشم لەبەردەست نەبێت ئامادەم ئەو مڵوانكە زێڕەی لەبەرمە بفرۆشم، بۆ كڕینی ئەو كتێبەی كە ئارەزوومەندم بۆی، چونكە دەتوانرێت لە ڕێگای خوێندنەوە دەڕك بەمرۆڤ بوونی خۆت بكەیت، مرۆڤ گەوهەرێكی شاراوەیە، تەنیا بەخوێندنەوە ئەو گەوهەرە ئاشكرا دەبێت."
فاتیمە محەمەد، تیشكی خستە سەر كاریگەریەكانی تەكنەلۆژیا بەسەر خوێندنەوە و رایگەیاند" تەكنەلۆژیا ئامێرێكی خزمەتگوزاریی تاڕادەیەك بەسوودە، بەڵام دەتوانین بڵێین كاریگەری نەرێنی زۆر زۆرە لەسەر خوێندنەوە، هۆكارێكی كاریگەرە بۆ بەفیڕۆدانی كات."
لەدوا پەیڤەكانیشیدا ئەوەشی گووت"بوونی كتێبخانە لە سوچێكی ماڵ ئەوپەڕی بەختەوەری مرۆڤە، كتێب وەك ڕۆڵەی مرۆڤ وایە چۆن باوان بەبینینی ڕۆڵەكانیان ماندوویەتییان ئەحەسێتەوە، بینینی پەرتوكیش لەماڵ بۆ خۆی گەورەترین بەختەوەرییە، ئەمە تەنیا كەسانێك دەرك بەمە دەكەن چێژیان لەم خۆشیە دیبێت.

زۆرترین بینراو