فاكتەرەكانی هەڵوەشاندنەوەی پرۆسەی هاوسەرگیری

هۆزان هێرش

بە گەڕانەوە بۆ ئامارە فەرمییەكانی پەیوەست بە پرۆسەی هاوسەرگیری و جیابوونەوەو هەڵوەشانەوەی پرۆسەكە، دەبینین كە ساڵ لە دوای ساڵدا ریژەی جیابوونەوەو تەلاقدان ربەرەو هەڵكشان و زیادبوون دەچێت، لێرەدا پێویستە بپرسین، ئایا هۆكارەكانی زۆربوونی رێژەی جیابوونەوەی هاوسەرگیری كامانەن، بۆچی زۆرێك لە كچ و كوڕان دوای ماوەیەكی كەم لە پرۆسەكە دووچاری گرفت و ئاریشەی كۆمەڵایەتی دەبنەوەو رێگای دادگا و تەلاق دەگرنەبەر؟
بێگومان هۆكارو فاكتەرەكان فرە چەشن و جۆراوجۆرن، یەكێك لەو هۆكارانەش ئەنجامدانی پرۆسەی هاوسەرگیریە لە تەمەنێكی پێنەگەیشتوو، واتە كچ و كور لە تەمەنێكی نەگونجاو ژیانی هاوسەری پیك دەهێنین كە لەڕووی بایەلۆجی و سایكۆجی ئامادەو لەبار نین بۆ هەڵگرتنی بەرپرسیارییەتی ئەم پرۆسە گرنگە، بۆیە لە ژیانیانیاندا سەركەوتوو نابن و سەرەنجام دووچاری كێشە دەبنەوە تا دەگاتە جیابوونەوە.
یەكێكی تر لە هۆكارە بەرچاووەكانی پرۆسەی هاوسەرگیری، بریتییە لە ناپاكی هاوسەری، كاتێك كچ و كورێك دەچنە نێو پرۆسەكە، دوای چەند ساڵیك پەیوەندی لەگەڵ كەسانی تر دەبەستن، بەمەش كێشە دەكەوێت نێوانیان تا دەگاتە حالەتی جیابوونەوە، لە كاتێكدا پرۆسەی هاوسەرگیری پرۆسەیەكە لەسەر بنەمای خۆشەویستی و رێزگرتن و وەفاو راستگۆیی بنیات دەنرێت، هەر كاتێكتیش ئەم بنەمایانە روخان و نەمان، ئەوا پرۆسەكەش دەروخێت و تەلاق دێتەكایەوە.
لە كۆمەڵگەكانی شەرقی و كوردستان بە تایبەتی، ڕابردووی كچ و كوڕان پێوەرن بۆ هاوسەرگیری، بە تایبەتیش بۆ كچان، بەو مانایەی كاتێك كچێك هاوسەرگیری دەگات، بەڵام رابردووی خۆشەویستی لەگەڵ كەسی تر هەبووە، كاتێك لەگەڵ كەسێكی تر هاوسەرگیری دەگات بەڵام راستیەكان وەكخۆی باس ناكات لەگەڵ ئاشكرابوونی راستییەكان، ئەوا كێشەی دەكەوێتە نێوانیان، چونكە زۆربەی پیاوانی شەرقی بوونی رابردوو و باكگراوەندی خۆشەویستی كچان قبوول ناكەن، بۆیەش لەڕووی دەروونی تووشی دڵەراوكی دەبن و كێشەو ئاژاوە دەكەوێتە نێوانیان.
پێویستە كچان و كوڕان بەوپەری بەرپرسیارییەتییەوە لە پرۆسەی هاوسەرگیری بڕوانن، دوور بكەونەوە لە بریاردانی پێشوەختەو بێ ئامادەگی، هەروەها دوور بكەونەوە لە ناپاكی و بێ بەهاكردنی پرۆسەكە و دروستكردنی كێشەو گرفت بۆ خێزانەكانی تر. هاوسەرگیری پرۆسیەكی ئەبەدییە نەك كاتی، لە حاڵەتی تەواو تەنگانە نەبێت، نابێت پەنا ببرێتە بەر جیابوونەوە، بۆیە پێویستە لە دوای پێكهێنانی هاوسەرگیری دەبێت كچ و كورەكە خۆیان یەكلابكەنەوەو بۆ دروستكردنی خێزانێكی تەندروست بژن، چونكە لە زانستی كۆمەڵناسیدا، خێزانی تەندروست بە بناغەی پێكهێنانی كۆمەڵگەی تەندروست دادەنرێت، بە پێچەوانەوەی خێزان فاشل و نا تەندروست، بەرهەمەكەی كۆمەڵگایەكی دواكەوتوو و ناتەندروستە.

 

زۆرترین بینراو