فریشتەی ئاژەڵە بریندارەكانی سەر شەقام

فریشتەی ئاژەڵە بریندارەكانی سەر شەقام

رەمەزان هەرنی- سلێمانی : ئافرەتێك ماوەی نزیكەی 10 ساڵە كار لەسەر چارەسەكردنی ئاژەڵەكانی سەر شەقام دەكات و تا ئێستا ژیانی چەندین ئاژەڵی رزگار كردووە و دەووربەری ماڵەكەی ئەوان بۆتە شوێنێكی ئارام بۆ مانەوەی ئاژەڵە چارەسەركراوەكان.
فریشتە نەجات، ئافرەتێكی دانیشتوی شاری سلێمانی یە، ئەو لەبارەی كارەكەیەوە بە زاری كرمانجی گوت"خزمەتكردن و بایەخدان بە سەگ لای من حەز نییە، بەڵكو بیركردنەوەو تێگەیشتن و هەستكردنە بە بوونی ئەو ئاژەڵەی كە بەردەوام لەلایەن هاوڵاتیان بەگشتی و منداڵان بەتایبەتی ئازار دەدرێت، بۆیە نزیكەی 10 ساڵە بەهاوكاری هاوسەرەكەم، ژیانی خۆم تەرخان كردوە بۆ پاراستن و خزمەتكردنی سەگەكانی سەر شەقام و لە ئێستادا دەوروبەری ماڵەكەمان بۆتە شوێنێكی ئارام بۆ مانەوەی ئەوان".
فریشتە ئاژەڵەكانی تریشی فەرامۆش نەكردووە و دەڵَێ"جگە لە سەگ، هەر ئاژەڵێكی دیكە پێویستی بەهاوكاری ئێمە بووبێت چارەسەرمانكردووەو فەرامۆشمان نەكردوە"، ئەوەش دەڵَێ"لەوڵاتی ئێمەدا بەپلەی یەك سەگ ئازار دەدرێت، بۆیە منیش زیاتر بایەخم بەو ئاژەڵەداوە، هەندێك لەو سەگانە دوای چارەسەر دراون بە خەڵكانی ئاژەڵ دۆست و هەندێكیشیان لای خۆمانن و بەبەردەوامیش سەگ و پشیلە لەدەوروبەری ماڵەكەماندا بونیان هەیە"،
فریشتە پێی وایە سەگ و پشیلە لەو كۆمەڵگایە وەكو پێویست بایەخیان پێ نادرێ و خزمەت ناكرێن، بۆیە دەڵێ"زۆرینەی ئەو سەگ و پشیلانەی خزمەتمان كردون پێویستیان بەچارەسەری پزیشكی هەبووەو هەندێكیان نەشتەرگەرییان بۆ كراوە، بەگشتی تێڕوانینی كۆمەڵگا بۆ راگرتنی ئاژەڵی وەكو سەگ و پشیلە، لەئاستێكی نزمدایە و بەكارێكی ناپەسەند وێنا دەكرێت"،
لەسەر روانینی هاوڵاتیان بۆ كارەكەیان، فریشتە دەڵَێ"هەندێك خەڵك بەكارێكی باشی دەزانن و دەستخۆشیمان لێدەكەن، بەپێچەوانەشەوە هەندێكی تر بەباشی نازانێت"،
ئەوەی فریشتەی نیگەرانكردووە لە بارەی ئەو كارە باشەی بۆ ئاژەڵان دەیكەن، هیچ لایەن و رێكخراوێكی مەدەنی و حكومیی و رێكخراوەكانی پەیوەست بە مافی ئاژەڵان، دەستخۆشیان لێ نەكراوەو سەپاس نەكراون.

زۆرترین بینراو