قایمقامەكانی دەڤەری سۆران هۆشداریان بە فەرمانگەكان داوە

قایمقامەكانی دەڤەری سۆران هۆشداریان بە فەرمانگەكان داوە

موڕشید برادۆستی – چۆمان : لەگەڵ پێكهێنانی كابینەی نۆیەمی حكومەتی هەرێمی كوردستان چەند رێنمای و بڕیار تایبەت بە فەرمانبەران دەرچوونە و یەكێك لە بڕیارەكان پابەند بوونی فەرمانبەرانە بە دەوامی رۆژانە .
یەكەم كۆبوونەوەی ئەنجومەنی وەزیرانی هەرێم، كە لە 15ی تەمموزی 2019 لە هەولێر ئەنجامدرا، بڕیاردرا دەوامی فەرمانبەران زیادبكرێت. دواتر وەزیرەكانیش دوای دەستبەكاربوونیان، یەكەم بڕیاریان زیادكردنی دەوامی فەرمانبەران بوو .بەهۆی قەیرانی دارایی و پاشەكەوتی مووچە‌، لە دوای ساڵی 2014ەوە دەوامی فەرمانگەكان كەمكرایەوە و چەند رۆژێكی هەفتەش بۆ فەرمانبەران دەكرایە پشوو، بەڵام لەگەڵ لابردنی پاشەكەوت دەوامی هەندێك لە فەرمانگەكان زیادكرا و دواتریش لە كۆبوونەوەی ئەنجومەنی وەزیراندا بڕیاردراوە دەوامی سەرجەم فەرمانگەگەكان زیادبكرێت.
وەزارەت و قایمقامەكان، فەرمانبەرانی بەڕێوەبەرایەتی و فەرمانگە و بنكەكانیان لە دەوامی رۆژانە ئاگادار كردۆتەوە، قائیمقامی چۆمانیش لە بارەی دەوام كردنی فەرمانبەران رای دەگەیێنێت، تەواوی فەرمانگەكانی سنوورەكەییان لە بڕیارێكی ئەنجومەنی وەزیران ئاگادار كردۆتەوە رێگە بە كەمتەرخی نادەین.
هەنگاوەكانی قایمقامیەتی چۆمان لە كاتێدایە، ئەنجومەنی وەزیرانی كوردستان بە بڕیاری فەرمی دەوامی ئاسایی فەرمانبەران لە كاتژمێر 8ی بەیانی تاكو 3ی دووا نیوەڕۆ دیاری كردووە و ئەو بڕیارەش بووەتە گشتاندن بۆ سەرجەم دام و دەزگاكانی حكومی لە كوردستان .
ئەحمەد قادر قایمقامی قەزای چۆمان بە زاری كرمانجی راگەیاند" بڕیارێكی حكومەتی هەرێمان پێگەیشتووە و تێدا دەوامی سەرجەم دام و دەزگاكانی حكومی دیاری كراوە و دەوام لە سەعات 8ی بەیانی تا 3ی پاش نیوەڕۆ بۆ هەموو فەرمانبەران دیاری كراوە و ئێمەش ئەو بڕیارەمان بە فەرمانگە و بنكەكان گەیاندووە .
زیاتر گووتی" دووای گەیاندنی بڕیارەكە دواتر چاودێری ووردمان كرد و دەركەوت چەند فەرمانگەیەك لە سنووری كارگێڕیمان پابەندی ئەو بڕیارە نین بۆیە لە هەنگاوی یەكەم هۆشداری توندمان پێدان بێگومان لە هەر كەمتەرخەمیەكی تر لە دەوامی فەرمانگەكان ببینین سزای توندییان دەدەین و بە پێی یاسایا مامەڵەییان لەگەڵ دەكەین .
بە گووتەی یاسا ناسان، بڕیارەكەی حكومەت بۆ زیادكردنی كاتەكانی دەوام، تەواو یاساییە، حەسەن مستەفا ماستەر لە یاسا بۆ زاری كرمانجی دەڵێ " بەپێی یاسایی راژەی شارستانی ژمارە 24ی ساڵی 1960 هەمواركراوی عێراق، كە لە هەرێم كاری پێدەكرێت دراوە، كە دەبێت فەرمانبەران پابەندی دەوامی رەسمی بن بەو خشتە ‌و شێوازەی كە لەلایەن فەرمانگەكانیانەوە بۆیان دیاریدەكرێت . دەشڵێ " هەر فەرمانبەرێك پابەندی ئەو بڕیارە نەبێت سزا دەدرێت .
ئەو بڕیارەی ئەنجومەنی وەزیران بووەتە جێگەی رەزامەندی هاووڵاتییان و ئەو كەسانەی بە مەبەستی ئیش و كار روو لە دام و دەزگاكانی حكومەت دەكەن، هەوار ئەحمەد گەنجێكی دانیشتووی سۆرانە دەڵێت " لە ساڵانی رابردوو كەمترخەمی زۆر لە بەڕێوەبەر و فەرمانبەرانی بەشێك لە فەرمانگە و بەڕێوەبەرایەتیییەكان بەدی دەكرا و پابەندی دەوامی خۆیان نەئەبوون، هەروەها بە شێوەیەكی باش رێز لە هاووڵاتییان و ئەوانەی بۆ راپەڕاندنی ئیش و كارەكانییان روویان لە فەرمانگەكان دەكرد نەئەگیرا، ئەو بڕیارەی ئەنجومەنی وەزیران دڵخۆشی كردووین و ئومێد دەكەین بەو شێوەیە بەردەوام بێت .
كەلسووم قادر ئافرەتێكی دانیشتووی گەڕەكی ئازادی دیانایە بە زاری كرمانجی گووت " پێویستە هەموو لایەك هاریكار بن بۆ پابەند بوون بە دەوامی ئاسایی، چونكە خەلك بێزار بووە لەو كەمتەرخەمییەی لە بەشێكی زۆری فەرمانگە و بەڕێوەبەرایەتییەكانی حكومی هەیە، چەندین جار ئیش و كارمان هەبووە لە كاتژمێر 12 كۆتاییان بە دەوام هێناوە و شوێنی دەوام لەلایەن فەرمانبەر و بەڕێوەبەرەوە چۆڵ كراوە .
لای خۆشیەوە، كرمانج عزەت قایمقامی قەزای سۆران بە زاری كرمانجی راگەیاند" هەموو فەرمانبەرانمان لە دام و دەزگاكانی حكومی لە سنووری سۆران لە بڕیاری ئەنجوومەنی وەزیران لە بارەی كاتی دەوام ئاگادار كردۆتەوە بێگومان هەر فەرمانبەرێك پابەندی دەوام نەبێت لەو كاتەی دیاری كراوە سزا دەدرێت . گووتیشی" لە ئێستادا كیشەی سەرەكی بەشێك لە فەرمانگە و بەڕێوەبەرایەتییەكانمان میلاكیان زۆرە و هەندێكیان میلاكییان كەمە، هەوڵی تەواو دەدەین ئەو كێشەیە چارەسەر بكەین .

 

زۆرترین بینراو