كاتی دانانی پارێزگارێك بۆ هەولێر دیاری كرا

كاتی دانانی پارێزگارێك بۆ هەولێر دیاری كرا

چل ڕۆژ زیاتره‌، د.فرسه‌ت سۆفی پارێزگاری هه‌ولێر به‌هۆی كۆرۆنا گیانی له‌ده‌ست داوه‌، تا ئێسته‌ كه‌س وه‌ك شوێنگره‌وه‌ی بۆ پۆستی‌ پارێزگاری‌ هه‌ولێر دانه‌نراوه‌ و پۆسته‌كه‌ به‌وه‌كاله‌ت به‌ڕێوه‌ ده‌بردرێت .
فرسه‌ت سۆفی دوای تووشبوونی به‌ ڤایرۆسی كۆرۆنا، ڕۆژی‌ سێ تشرینی دووه‌م به‌مه‌به‌ستی چاره‌سه‌ر ره‌وانه‌ی ده‌ره‌وه‌ی وڵات كرا و له‌ 18ی‌ هه‌مان مانگ كۆچی‌ دوای‌ كرد.
د.فرسه‌ت سۆفی له‌ ساڵی 1978 له‌ شارۆكه‌ی چۆمان له‌دایكبووه‌، مانگی ئه‌یلوولی ساڵی رابردوو وه‌ك 41ـه‌مین پارێزگاری هه‌ولێر ده‌ستبه‌كاربوو،.
له‌ سۆشیال میدیا و تۆڕی كۆمه‌ڵایه‌تی ناوی هه‌ندێك كه‌س بڵاو بووه‌ته‌وه‌ كه‌ گوایه‌ ده‌بنه‌ پارێزگاری‌ هه‌ولێر، به‌ڵام ئه‌ندامێكی‌ ئه‌نجوومه‌نی پارێزگای هه‌ولێر زانیاری له‌وباره‌یه‌وه‌ ده‌خاته‌ڕوو.
سه‌وری عیسمه‌ت ئه‌ندامی ئه‌نجوومه‌نی پارێزگای هه‌ولێر، راگه‌یاند " پۆستی پارێزگار پۆستێكی گرنگ و هه‌ستیاره‌، ئه‌و كه‌سانه‌ی داده‌ندرێن پێویسته‌ شیاو بێت و بتوانێ ئه‌و ئه‌ركه‌ قورسه‌ به‌ڕێوه‌ ببات".
دووپاتیشی‌ كرده‌وه‌ "هێشتا هیچ كه‌سێك بۆ پۆستی‌ پارێزگاری‌ هه‌ولێر یه‌كلا نه‌كراوه‌ته‌وه‌.
دوای‌ پشووه‌كانی سه‌ری ساڵ، ئه‌م پۆسته‌ پڕده‌كرێته‌وه‌ كه‌ به‌ركه‌وته‌ی‌ پارتی دیموكراتی كردستانه"‌.

زۆرترین بینراو