كوردستان لە دۆخێكی مەترسیدار نزیك دەبێتەوە

ئیسماعیل ئیبراهیم

 

دۆخی نەتەوەی كورد لە هەر چوار پارچەی داگیركراو جێگەی نیگەرانییە، رۆژانە پیلانی داگیركەران بەردەوامە، پیلانی تاكتیكی و ستراتیژییان لە دژی نەتەوەی كورد هەیە، ئەوەی ئەمڕۆ لە باكووری كوردستان دەگووزەرێت و بەهەموو شێوەیەك رێگری لە پێشكەوتن و بەدەست هێنانی مافە نەتەوەییەكانی كورد دەكرێت، سیاسەتێكە بە درێژایی دەیان ساڵ بەردەوام بووە، توركیا نەك بە چەوساندنەوەی نەتەوەی كورد لە باكوور نەوەستاوە بەڵكو دەستی بۆ پارچەكانی دیكەی كوردستانیش درێژ كردووە، كەشێكی ناهەمواری لە رۆژئاوا دروستكردووە، بە هەمانشێوەش دەست لە باشووری كوردستانیش وەردەدات و هانی لایەنی توركی لە باشوور دەدات كە كۆسپ بۆ كوردان دروست بكەن بە تایبەتی لە كەركووك، لە هەمانكاتیشدا هەوڵ بۆ پەڕە پێدانی بواری ئابووری لەگەڵ هەرێم دەدات، واتە سیاسەتێكی زۆر زۆڵانە پەیرەو دەكات.
لە رۆژهەڵاتی كوردستانیش بە چاوی خۆمان كورد كوشتن، لە سێدارەدان، زیندانی كرد، ئەشكەنجەدان و هەموو جۆرە چەوسانەوەیەكی نامرۆڤانە دەبینین، وێڕای دۆخی خەراپی ئابووری و سیاسی رژێمی ئێران كەچی بۆ لەنێو بردنی بزووتنەوەی رزگاری خوازی نەتەوەی كورد لەهەر پارچەیەكی دیكەی كوردستان پارەیەكی زۆر خەرج دەكات و هەندێكجاریش هێزی سەربازی رەوانەی ئەو وەڵاتانە دەكات كە ئەگەری سەركەوتنی نەتەوەی كورد تێیدا لە ئارادایە.
رژێمی سوریە بە هەموو ئاڵۆزیی خۆیەوە لە هەموو بوارەكانەوە ئامادە نییە بچووكترین مافی بە نەتەوەی كورد رەوا ببینێت، بە شێوەی تاكتیك ئامادەیە گفتوگۆ بكات لەگەڵ نەتەوەی كورد، بەڵام ئامادە نییە واژوو لەسەر هیچ رێككەوتنێكی ستراتیژی بكات كە مافی مرۆڤی كوردی تێدا بپارێزێت.
عێراقی تایفی و مەزهەبیش كە ئەوەی شكۆ بێت نەیماوە و ئێران حكومی سەربازی و ئابووری و سیاسی لەم وەڵاتە دەكات، لەجیاتی رێككەوتن لەگەڵ نەتەوەی كورد هەر رۆژەو بیانوویەكی پێ دەگرێت، مێژووی عەرەب و كورد ئەگەر خوێناویتر نەبێت لە مێژووی فارس و تورك لەگەڵ كورد ئەوە كمتریش نییە.
لەم دۆخەی كە لە ناوچەكەش هەیە هەموو هەوڵی وڵاتانی داگیركەر بۆ ئەوەیە كورد بە بێ ئیمتیاز و سفر بەدەست لێ بێتە دەرەوە.
واتە نەتەوەی كورد لە هەر چوار پارچەكە ئەوەی دۆست بێت نییەتی، هەموو ئەو رێككەوتنانەی لەگەڵ لایەنێك یا بەشێك دەكرێت شتی تاكتیكین، بۆیە پێویستە كورد بە تایبەتی سەركردایەتی سیاسی كورد لەهەر چوار پارچەی كوردستان بیر لە دۆزینەوەی رێگە چارەیەك بكەنەوە، زۆر دڵنیام لە ستراتیژییەتی وەڵاتانی داگیركەری كوردستان، نەمانی ئەم كیانەی باشوور لە ئەولەوییەتی كارەكانیانە، ئەوان بۆ هیچ كارێكی دوژمنكارانە لە ئاست نەتەوەی كورد سل ناكەنەوە. ئەوان بەدوای هەر جۆرە بیانوو یا دەرفەتێك دەگەرێن كە هەڵبكوتنە سەر هەرێمی كوردستان، بۆیە دەبێ سیاسەتێكی ژیرانە و دوور بینانە پیادە بكرێت بۆ رووبەروو بوونەوەی هەر پێشهاتێكی دووژمنكارانە.
دەبێ سەركردایەتی سیاسی كوردستان بزانێت هەموو ئەو رێككەوتنانەی لەگەڵ كورد دەكرێت كۆنكرێتی نین و تاكتیكین، بەتایبەتی رێككەوتنە ئابوورییەكان.
بۆ ئەم قۆناغە تەبایی و یەكڕیزی و پشتگیریكردنی یەكتری هەموو لایەنە سیاسییەكانی كوردستانی دایك وەك هەناسە پێویستە.
ئەركی سەرۆكایەتی هەرێمی كوردستان، وەك گەورەترین مەرجەعی شەرعی و یاسایی و سیاسی زۆر قورسە، دەبێ زیاتر لە هەموو لایەنەكانی دیكە واقعییانەتر و قوڵتر لە رابردوو دۆخەكە تاوتوێ بكات و هەنگاوی پێویستی بۆ بهاوێژێت و خۆی بۆ هەر ئەگەرێك ئامادە بكات. جگە لەمەش قۆناغەكە وادەخوازێت یەكخستنی ناو ماڵی كوردستانی گەورە بكرێتە ئەولەوییەتی كارەكان.

زۆرترین بینراو