كۆرۆنا نەبووە رێگر لەبەردەم توركیا بۆ بۆردوومانكردنی گوندەكانی هەرێمی كوردستان

كۆرۆنا نەبووە رێگر لەبەردەم توركیا بۆ بۆردوومانكردنی گوندەكانی هەرێمی كوردستان

"لە سنووری دهۆك زیاتر لە 250 گوند بەهۆی پەكەكە و بۆردوومانەكانی توركیاوە چۆڵكراون"


رەمەزان هەرنی – زاری كرمانجی : بە دەیان ساڵە فڕۆكە جەنگییەكانی توركیا گوند و ناوچە سنووریەكانی كوردستان لە سنووری پارێزگای دهۆك بۆردوومان دەكەن، بەو هۆیەوە سەدان گوند چۆڵكراون و ژمارەیەك قوربانیشی هەبووە، ئەمساڵ كە ڤایرۆسی كۆرۆنا بەرۆكی جیهانی گرتووە، هەرێمی كوردستان لەو پەتا كۆشندەیە بێبەش نەبووە، بەڵام كۆرۆناش نەیتوانی بۆردوومانی توركیا بۆ سەر گوندەكانی هەرێمی كوردستان رابگرێت.
ئەلند ئەمیر، بەرێوەبەری ناحیەی چەمانكێ‌ لە سنووری قەزای ئامێدی بە زاری كرمانجی راگەیاند:" بەهۆی هەبوونی بنكەو بارەگاكانی پارتی كرێكارانی كوردستان "پەكەكە" فڕۆكە جەنگییەكانی توركیا بەردەوام گوندەكانی مەسیحییەكان لە سنووری ناحیەی چەمانكێ‌ بۆردوومان دەكەن ترس و دڵەڕاوكێ‌ بڵاو دەكەنەوە لە ناوچەكەدا بەو هۆیەوە ژمارەیەك گوند چۆڵكراون، لەم دوو مانگەی رابردوو كە تەواوی جیهان لە وەستان بووە بەهۆی ڤایرۆسی كۆرۆنا بەڵام توركیا بەردەوام بوو لە بۆردوومانكردنی سنووری ناحیەی چەمانكێ‌ سەر بە قەزای ئامێدی.
شەعبان خەلیل بەرواری، بەرێوەبەری ناحیەی دینارتە لە سنووری قەزای ئاكرێ‌ بۆ زاری كرمانجی گووتی:" لە سنوری ناحیەی دینارتە لە قەزای ئاكرێ‌ ماوەیەكی زۆرە بەهۆی بەردەوامی جوولەكانی پەكەكە لەناوچەكەدا ژمارەیەكی یەكجار گوند چۆڵكراون كە خاوەن گوندەكان خاوەن رەزو باغ و كاری كشتوكاڵین، بەڵام بەهۆی بوونی پەكەكە ماوەی چەند ساڵە كەس ناتوانێت لەسەر لادێیەكانی خۆی بژیت و كارەكانی رۆژانە بیكات كە بژێوی ژیانیان لەسەر گوندەكانیانە.
گووتیشی:" پەكەكە زیاتر خۆی لەو گوندانە نزیكدەكاتەوە كە ئاوەدانن بۆ ئەوەی نەكەونە بەر بۆردوومانی فڕۆكەكانی توركیا، بەڵام فڕۆكەكان لەهەر شوێنێك پەكەكە ببینن بۆردوومان دەكەن بۆیە تەواوی ئەو گوندانەی پەكەكە لێیان نزیكە چۆڵكراون و ژیانی رۆژانەیان لەدەست چووە كاری باغ و ئاژەڵداری نەماوە لەو گوندانە بەهۆی ئەوەی گەراونەتەوە سەنتەری شارەكان، ئەگەر ئەم مەترسییەی ئێستا پەكەكە لەسەر گوندەكان نەبوایە خەڵكی ئەو گوندانە لەسەر گوندەكانیان دەمانەوە كاری رۆژانەی خۆیان دەكرد بۆ بەرێوەبردنی ژیانی خۆیان كە بژێوی ژیانیان لەسەر گوندەكانە".
كلارا عۆدیشۆ، سەرۆكی فراكسیۆنی كلدانی و سریانی و ئاشووری لە پەرلەمانی كوردستان بە زاری كرمانجی راگەیاند:" مەسیحیی نشینەكانی سنووری قەزای ئامێدی و ئاكرێ‌ بەردەوام لە ترس و دڵە راوكێدا دەژین بەهۆی بۆردوومانی بەردەوامی فرۆكەكانی توركیا لە ناوچەكەدا، گوندەكانی مەسیحیەكان لە سنووری قەزای ئاكرێ‌ زۆربەیان كشتوكاڵین، بەڵام چەند ساڵێكە بەهۆی ترسی بۆردوومانەوە نەیان توانیوە پەڕە بە كشتوكاڵی خۆیان بدەن بۆیە بە ناچاری تا ئێستا نزیكەی حەوت گوندی مەسیحی نشین لە قەزای ئاكرێ‌ چۆڵكراون ئەوانەی لەسەر لادێیەكانیش ماون هیچ كارێكیان پێ‌ ناكرێت بەهوی بۆردوومانی بەردەوامی فڕۆكە جەنگییەكانی توركیا.
سەرۆكی فراكسیۆنی كلدانی و سریانی و ئاشووری لە پەرلەمانی كوردستان جەختی لەوەشكردەوە:" بەرێگای حكوومەتی عێراق و لایەنە پەیوەندیدارەكان داوای راگرتنی بۆردوومانمان كردووە، بەڵام بە كردار حكوومەتی عێراق نەیتوانیوە هیچ لەو بارەیەوە بكات بە ئەركی خۆی هەڵنەستاوە بۆردوومان بەردەوامە، ژمارەیەك گوند تا ئێستا چۆڵكراون، حكوومەتی هەرێمی كوردستان بەردەوام خەمخۆر و پاڵپشتی ئێمەیە، بەڵام پێویستە توركیا ئەم بۆردومانە رابگرێت تا مەسیحییەكان دەست بە ژیانی ئاسایی خۆیان لە گوندەكانیان بكەنەوە".
ئیدریس هەركی، سەرۆكی لیژنەی ئەمنی لە ئەنجوومەنی پارێزگای دهوك بۆ زاری كرمانجی ئاشكرای كرد:" لە سنووری پارێزگای دهۆك بەهۆی پەكەكە و بۆردوومانی فڕۆكەكانی توركیا زیاتر لە 250 گوند چۆڵكراون ئاوەدان نەكراونەتەوە، لە سنووری دەڤەری نەهلە لە ناحیەی دینارتە و ناحیەكانی چەمانكێ‌ و شێلادزێ‌ لە سنوری قەزای ئامێدی بەهۆی پەكەكە و بۆردومانەكانی توركیا هیچ خزمەتگوزارییەك نەگەیشتوتە ئەو گوندانە، وەك ئەنجوومەنی پارێزگای دهۆك داوامان كردووە زیان پێكەوتوانی بۆردوومانەكانی توركیا لە هەرێمی كوردستان قەرەبوو بكرێنەوە بەهۆی ئەوەی زیانی زۆر بە ئابووری ئەو ناوچانە گەیشتووە".
سەرۆكی لیژنەی ئەمنی لە ئەنجوومەنی پارێزگای دهوك زیاتر دەڵێ:" بەفەرمی داوامان كردووە ئەو گوند و ناوچانەی هاووڵاتیانی سڤیل لێی نیشتەجێن بەهیچ شێوەیەك بۆردوومان نەكرێن، بە زمانی كوردی، عەرەبی، توركی و ئینگلیزی داوامان لە توركیا كردووە داوای لێبوردن بكات لە ئەوانەی زیانیان بەركەوتووە، هەروەها قەرەبوو بكرێنەوە، جگە لەوەی ئەم بۆردوومانەی بەهۆی هەبوونی بنكە و بارەگاكانی پەكەكە لە سنوری پارێزگای دهۆك رابگرێت".

 

زۆرترین بینراو